నస్పూర్, ఆర్.కె న్యూస్: శ్రీరాంపూర్ ఏరియాలోని శాంతి స్టేడియం వేదికగా ఈ నెల 30, 31 తేదీలలో సింగరేణి సంస్థ స్థాయి అథ్లెటిక్స్ పోటీలను అత్యంత వైభవంగా నిర్వహించనున్నట్లు ఏరియా జనరల్ మేనేజర్ మునిగంటి శ్రీనివాస్ వెల్లడించారు. ఆదివారం ఈ మేరకు ఆయన ఒక ప్రకటన విడుదల చేశారు. ఈ క్రీడా సంబరాలను 30వ తేదీన జీఎం స్వయంగా ప్రారంభించనున్నారు. సింగరేణి వ్యాప్తంగా ఉన్న 11 ఏరియాల నుండి క్రీడాకారులు ఈ పోటీలలో పాల్గొననున్నారు. వీరిని మొత్తం ఆరు జట్లుగా విభజించి పోటీలను నిర్వహించనున్నారు. ఈ రెండ్రోజుల పాటు పురుషులకు, మహిళలకు విడివిడిగా అథ్లెటిక్స్, రన్నింగ్ పోటీలు నిర్వహించనున్నారు. వీటితో పాటు ప్రత్యేకంగా పురుషులకు ఈత పోటీలు, మహిళలకు త్రో బాల్ పోటీలను ఏర్పాటు చేశారు. క్రీడాకారులందరికీ మెరుగైన వసతులు కల్పించేలా ఏర్పాట్లు పూర్తి చేసినట్లు జీఎం వివరించారు. ఈ పోటీలలో అత్యుత్తమ ప్రతిభ కనబరిచిన విజేతలను సింగరేణి జట్టుకు ఎంపిక చేస్తామని జీఎం తెలిపారు. ఇక్కడ ఎంపికైన వారు జాతీయ స్థాయిలో జరిగే కోల్ ఇండియా అథ్లెటిక్స్ పోటీలలో సింగరేణి సంస్థ తరపున ప్రాతినిధ్యం వహిస్తారని ఆయన పేర్కొన్నారు. ఈ అవకాశాన్ని క్రీడాకారులు అందిపుచ్చుకోవాలని ఆయన పిలుపునిచ్చారు.