మంచిర్యాల మున్సిపల్ పరిధిలో మానవ వ్యర్థాల శుద్ధీకరణ కేంద్రం ఏర్పాటు చేసేందుకు జిల్లా కేంద్రంలోని శ్రీనివాస గార్డెన్స్, దొరగారి పల్లె ప్రాంతాల్లో ప్రభుత్వ స్థలాలను జిల్లా కలెక్టర్ బదావత్ సంతోష్ పరిశీలించారు. శుక్రవారం జిల్లా అదనపు కలెక్టర్ (స్థానిక సంస్థలు) బి. రాహుల్, మున్సిపల్ కమిషనర్ మారుతి ప్రసాద్, మండల తహశీల్దార్ భోజన్నతో కలిసి మానవ వ్యర్థాల శుద్ధీకరణ కేంద్రం ఏర్పాటుకు ప్రభుత్వ స్థలాలను పరిశీలించారు. ఈ సందర్భంగా జిల్లా కలెక్టర్ మాట్లాడుతూ ప్రభుత్వ ఆదేశాల మేరకు మంచిర్యాల మున్సిపల్ పరిధిలో మానవ వ్యర్థాల శుద్ధీకరణ కేంద్రం ఏర్పాటు చర్యలు తీసుకోవడం జరుగుతుందని తెలిపారు. ప్రభుత్వ ఆదేశాల మేరకు చిన్నపిల్లలు, వయోవృద్ధుల ఉల్లాసం కొరకు మున్సిపాలిటీలలో పార్కుల ఏర్పాటులో భాగంగా మంచిర్యాల మున్సిపాలిటీలోని రాముని చెరువు, రామనగర్ ప్రాంతాల్లో చేపట్టిన పార్కుల అభివృద్ధి పనులను పరిశీలించారు. పనుల నిర్వహణ పై సంబంధిత అధికారులు ప్రత్యేక దృష్టి సారించి పనులను వేగవంతం చేసి త్వరగా పూర్తి చేసేలా చర్యలు తీసుకోవాలని తెలిపారు. ఈ కార్యక్రమంలో మున్సిపల్ అధికారులు, సంబంధిత అధికారులు తదితరులు పాల్గొన్నారు.
