12 March 2024

క్యాన్సర్ వ్యాధి పై ప్రతి ఒక్కరు అవగాహన కలిగి ఉండాలి
శ్రీరాంపూర్ ఏరియా జీఎం బి. సంజీవ రెడ్డి

ఆర్.కె న్యూస్, నస్పూర్: సింగరేణి యాజమాన్యం ఉద్యోగులతో పాటు కుటుంబ సభ్యుల ఆరోగ్య పరిరక్షణకు అధిక ప్రాధాన్యత ఇస్తుందని శ్రీరాంపూర్ ఏరియా జీఎం బి. సంజీవ రెడ్డి అన్నారు. మంగళవారం శ్రీరాంపూర్ ప్రగతి స్టేడియంలోని సిఇఆర్ క్లబ్ లో సింగరేణి యాజమాన్యం ఆధ్వర్యంలో క్యాన్సర్, కిడ్నీ వ్యాధి నిర్ధారణ, నివారణ చర్యల పై అవగాహన సదస్సు నిర్వహించారు. ఈ కార్యక్రమానికి ఏరియా జనరల్ మేనేజర్ బి.  సంజీవ రెడ్డి, సేవా అధ్యక్షురాలు రాధా కుమారి ముఖ్య అతిథులుగా హాజరై కరపత్రాలను విడుదల చేశారు. ఈ సందర్భంగా ఏరియా  జనరల్ మేనేజర్ మాట్లాడుతూ క్యాన్సర్ వ్యాధి పై ప్రతి ఒక్కరు అవగాహన కలిగి ఉండాలని, మొదటి దశలోనే క్యాన్సర్ వ్యాధి నిర్ధారణ జరిగితే నివారించడానికి అవకాశం ఉంటుందన్నారు. మానవ శరీరంలో కిడ్నీలు అత్యంత ముఖ్యమైన అవయవాలని, కిడ్నీలను ఆరోగ్యంగా ఉంచుకోవాలని సూచించారు. ఉద్యోగులు, వారి కుటుంబ సభ్యుల ఆరోగ్య పరిరక్షణలో ఏరియా వైద్య అధికారులు వైద్య సిబ్బంది ఎల్లవేళలా కృషి చేస్తున్నారని, ఈ మేరకు క్యాన్సర్, కిడ్నీ వ్యాధుల పై అవగాహన, వ్యాధి నిర్ధారణ పరీక్షల సదస్సును ఏర్పాటు చేసినట్లు తెలిపారు. ఉద్యోగులతో పాటు వారి కుటుంబ సభ్యులు ఆరోగ్యంగా ఉంటే సంస్థ అభివృద్ధి చెందుతుందని, ఉద్యోగులందరూ తమ తమ ఆరోగ్యాన్ని పరిరక్షించుకోవాలని, అవసరమైన మందులు క్రమం తప్పకుండా వాడాలని సూచించారు. ఏసీఎంఓ డాక్టర్ ఉష, జనరల్ సర్జన్ డాక్టర్ వి శ్రీకాంత్, గైనకాలజిస్ట్ డాక్టర్ జి హరిత, డాక్టర్ లోకనాథ్ రెడ్డిలు పవర్ పాయింట్ ప్రజెంటేషన్ ద్వారా వివిధ వ్యాధుల పై అవగాహన కల్పించారు. ఈ కార్యక్రమంలో ఏఐటీయూసీ బ్రాంచ్ సెక్రటరీ ఎస్.కె బాజీ సైదా, ఎస్వోటు జీఎం వి పురుషోత్తమ రెడ్డి, డీజీఎం (పర్సనల్) పి. అరవింద రావు, డిప్యూటీ సిఎంఓ డాక్టర్ రమేష్ బాబు, బెల్లంపల్లి  డిప్యూటీ సిఎంఓ డాక్టర్ శౌరి, డాక్టర్ మురళీధర్, సీనియర్ పిఓ పి కాంతారావు, ఆసుపత్రి సిబ్బంది తదితరులు పాల్గొన్నారు.

దేశవ్యాప్తంగా దాదాపు ఆరు లక్షల మంది బొగ్గు పెన్షన్ దారులకు కోల్ మైన్స్ పెన్షన్ స్కీం-1998 ప్రకారం కనీస పెన్షన్ రూ.350 నిర్ణయించబడింది. ఇరవై 24 నుంచి జాతీయ కార్మిక సంఘాలు, బొగ్గు విశ్రాంత ఉద్యోగుల సంక్షేమ సంఘాల ఆందోళనల ఫలితంగా కోల్ మైన్స్ ప్రావిడెంట్ ఫండ్ ఆర్గనైజేషన్ వారి ట్రస్ట్ బోర్డ్ ప్రతిపాదన మేరకు కనీస పెన్షన్ వెయ్యి రూపాయలకు కేంద్ర ప్రభుత్వం ఆమోదం తెలిపింది. నేటి కాలంలో వెయ్యి రూపాయలతో పెన్షన్దారుల కనీస అవసరాలు తీరేనా? ఇట్టి పెన్షన్ రాష్ట్ర ప్రభుత్వాలు చెల్లించే వృధ్యాప్య పెన్షన్ రెండు వేల రూపాయల కన్నా తక్కువ ఉండటం విస్మయం కలిగిస్తోంది. బొగ్గు గనుల్లో పని చేసే వారికి శ్రమ అధికం. గనులలో అధిక వేడి, వెలుతురు, గాలి ఉండక పోవడం తో చాలా మందికి దీర్ఘకాలిక వ్యాధులతో బాధ పడుతూ ఉంటారు. పదవీ విరమణ తరువాత గుండె జబ్బులు, రక్త పోటు, మూత్రపిండాల వ్యాధులతో మరింతగా మంచాన పడుతున్నారు. బొగ్గు గని కార్మికులు దేశానికి వెలుగు నిచ్చే కాగడాలు, అంతే కాని సేవా రంగంలో పని చేసే ఉద్యోగులు కారు. ప్రభుత్వ ఉద్యోగులకు వారు పని చేసే కాలంలోని జీతం కంటే ప్రస్తుతం పెన్షన్ సొమ్ము ఎక్కువగా ఉంది. బొగ్గు కార్మికులు ఏ పాపం చేశారు? వారికి ప్రభుత్వ ఉద్యోగుల కంటే పెన్షన్ తక్కువ రావడానికి కారణం ప్రభుత్వాలు వారి సేవలను గుర్తించుట లేదు. బొగ్గు కార్మికులను యాజమాన్యాలు యంత్రాలను చూసినట్లుగా కాలం చెల్లిన యంత్రాలను మూలకు వేసినట్లుగా పని దిగి పోయిన కార్మికుల పట్ల ఏ మాత్రం శ్రద్ధ వహించుట లేదు. బీద వర్గాలకు జారీ చేసే తెల్ల కార్డులకు కూడా అర్హత లేకుండా జీవిస్తున్నారు. ఈ వేయి రూపాయలతో వారి బాధలు తీరవు. గత 24 సంవత్సరాల నుంచి కరువుభత్యంతో కూడిన కనీస పెన్షన్ 10 వేళా రూపాయలు చెల్లించాలని ఎన్నో సార్లు కేంద్ర ప్రభుత్వ మంత్రులకు, అధికారులకు విన్నవించుకున్నారు. పెన్షన్ ఫండ్ లో కొరత ఉందని, రోజు రోజుకు పెన్షన్ దారుల సంఖ్య పెరగడం, బొగ్గు పరిశ్రమలో నూతన నియామకాలు తగ్గడంతో పెన్షన్ ఫండ్ బలహీన పడుతుంది. గతంలో దివాన్ హౌసింగ్ ఫైనాన్స్ కంపెనీ వారు  727 కోట్ల రూపాయల మోసం వలన కూడా పెన్షన్ ఫండ్ తగ్గింది. గతంలో నిర్ణయించిన టన్ను బొగ్గు కు 10 రూపాయలు పెన్షన్ ఫండ్ లో జమ చేయడం పూర్తి స్థాయిలో అమలు కావడం లేదు. టన్ను బొగ్గు  అమ్మకం పై 20 రూపాయలు వసూలు చేయాలని ప్రతిపాదనలు వచ్చాయి. బొగ్గు యాజమాన్యాలు వారు ఆర్జిస్తున్న లాభాల నుంచి ఐదు శాతం పెన్షన్ ఫండ్ లో జమ చేయాలని, పెన్షన్ ఫండ్ బలోపేతం కొరకు కేంద్ర,రాష్ట్ర ప్రభుత్వాలు,బొగ్గు యాజమాన్యాలు ప్రతి సంవత్సరం బొగ్గు విశ్రాంత కార్మికులకు ప్రత్యేక నిధి ఏర్పాటు చేసి శాశ్వత ప్రతిపాదనలు చేస్తే బొగ్గు పెన్షన్ దారుల కష్టాలు తీరుతాయి తప్ప వేయి రూపాయలతో వారి కష్టాలు తీరవు.

✍ ఆళవందార్ వేణు మాధవ్,
ఉప ప్రధాన కార్యదర్శి, సింగరేణి రిటైర్డ్ ఎంప్లాయిస్ వెల్ఫేర్ అసోసియేషన్
📱 8686051752, 📍హైదరాబాద్.

ఏఐటీయూసీ నాయకులు

ఆర్.కె న్యూస్, నస్పూర్: శ్రీరాంపూర్ ఏరియాలోని ఆర్.కె న్యూ టెక్ గని కార్మికులు ఎదుర్కొంటున్న సమస్యలను తక్షణమే పరిష్కరించాలని ఏఐటీయూసీ నాయకులు తెలిపారు. ఈ మేరకు మంగళవారం గని మేనేజర్ స్వామి రాజు కు ఏఐటీయూసీ నాయకులు వినతి పత్రం అందజేశారు. ఈ సందర్భంగా ఏఐటీయూసీ డిప్యూటీ ప్రధాన కార్యదర్శులు కె. వీరభద్రయ్య, ముస్కె సమ్మయ్య, శ్రీరాంపూర్ బ్రాంచ్ కార్యదర్శి ఎస్.కె బాజీ సైదాలు మాట్లాడుతూ మాట్లాడుతూ గుర్తింపు కార్మిక సంఘం ఎన్నికలు జరిగి మూడు నెలలు కావస్తున్నా సింగరేణి యాజమాన్యం ఇప్పటివరకు గుర్తింపు ధృవీకరణ పత్రాన్ని అందజేయకపోవడంతో కార్మికుల సమస్యలు పరిష్కారానికి నోచుకోవడం లేదన్నారు. నూతన ఎస్.డి.ఎల్ యంత్రాలను అందుబాటులోకి తీసుకురావాలని, యాజమాన్యం కార్మికుల పై పని భారం తగ్గించాలని, కేటగిరి ప్రకారం కార్మికులకు పనులు కేటాయించాలని, క్యాంటీన్ లో మెనూ ప్రకారం నాణ్యమైన టిఫిన్స్ ఉద్యోగులకు అందించాలని, సపోర్ట్ మెన్లకు అవసరమైన పనిముట్లు పని స్థలాల్లో అందుబాటులో ఉంచాలని, వర్క్ నామ్స్ ప్రకారం కార్మికులకు పనులు కేటాయించాలని అన్నారు. ప్రమోషన్ పాలసీకి అనుగుణంగా కార్మికులను ఒకే పనికి పంపించకుండా అన్ని పనులకు పంపించడం వల్ల ప్రమోషన్లు రాకుండా అన్యాయం జరుగుతుందన్నారు. కార్మికులు ఎదుర్కొంటున్న అన్ని సమస్యలను సత్వరమే పరిష్కరించాలని, లేని పక్షంలో ఆందోళన కార్యక్రమాలు చేపడతామని సింగరేణి యాజమాన్యాన్ని హెచ్చరించారు. ఈ కార్యక్రమంలో శ్రీరాంపూర్ బ్రాంచ్ ఉపాధ్యక్షులు కొట్టె కిషన్ రావు, ఏరియా కార్యదర్శి సంపత్, పిట్ కార్యదర్శి ఆకుల లక్ష్మణ్, కాంట్రాక్ట్ వర్కర్స్ యూనియన్ బెల్లంపల్లి రీజియన్ కార్యదర్శి అఫ్రోజ్ ఖాన్, పిట్ సహాయ కార్యదర్శి సందీప్, నాయకులు నరసయ్య, శంకరయ్య, సిద్ధం అజయ్, నారాయణ, మల్లేష్, శ్రీకాంత్, తిరుపతి రెడ్డి తదితరులు పాల్గొన్నారు.