3 September 2024

•  శ్రీరాంపూర్ ఇన్చార్జి జీఎం శ్రీనివాస్

ఆర్.కె న్యూస్, నస్పూర్: సెప్టెంబర్ నెల నిర్దేశిత  లక్ష్యాలు సాధించడానికి ప్రతి ఒక్క ఉద్యోగి, అధికారి కృషి చేయాలని శ్రీరాంపూర్ ఇన్చార్జి జనరల్ మేనేజర్ శ్రీనివాస్ అన్నారు. మంగళవారం జనరల్ మేనేజర్ కార్యాలయంలోని సమావేశ మందిరంలో ఏరియా అధికారులతో ఇన్చార్జి జనరల్ మేనేజర్ శ్రీనివాస్ సమీక్ష సమావేశం నిర్వహించారు. ఈ సందర్భంగా ఇన్చార్జి జనరల్ మేనేజర్ మాట్లాడుతూ, గత నెల సాధించిన ఉత్పత్తి, ఉత్పాదకత సమీక్షించారు. రక్షణతో కూడిన ఉత్పత్తి ఉత్పాదకత సాధించడానికి తగిన ప్రణాళికలతో  ముందుకు వెళ్లాలని సూచించారు. గనులలో యంత్రాల వినియోగం 100 శాతం ఉండడానికి ప్రయత్నించాలని, ఉపరితల గనుల్లో ఓబి కాంట్రాక్ట్ కంపెనీలు నిర్దేశిత రోజువారి లక్ష్యాన్ని సాధించడానికి ప్రణాళికలు చేసుకోవాలని సూచించారు. ఈ కార్యక్రమంలో ఎస్వోటు జీఎం సత్యనారాయణ, ఎస్సార్పీ 1,3 గ్రూప్ ఏజెంట్ గోపాల్ సింగ్, ఇందారం ఉపరితల గని ప్రాజెక్ట్ ఆఫీసర్ ఏవీ రెడ్డి, ఆర్.కె గ్రూప్ ఏజెంట్ రాముడు, ఆర్.కె 5, 6 గ్రూప్ ఏజెంట్ శ్రీధర్, డీజీఎంలు పి అరవింద రావు, చిరంజీవులు, ఆనంద్ కుమార్, ఏరియా ఇంజనీర్ చంద్రశేఖర్, ఏరియా రక్షణ అధికారి శ్రీధర్ రావు, డిప్యూటీ సీఎంఓ డాక్టర్ రమేష్ బాబు, క్వాలిటీ మేనేజర్ కె వెంకటేశ్వర రెడ్డి, అన్ని గనుల మేనేజర్లు, రక్షణాధికారులు, అన్ని గ్రూప్ ఇంజనీర్లు తదితరులు పాల్గొన్నారు.

• శ్రీరాంపూర్ ఇంచార్జి జీఎం శ్రీనివాస్

ఆర్.కె న్యూస్, నస్పూర్: 2024-25 ఆర్థిక సంవత్సరానికి శ్రీరాంపూర్ ఏరియా నిర్ధేశిత లక్ష్యాన్ని సాధిస్తామని శ్రీరాంపూర్ ఏరియా జీఎం ఇంచార్జి శ్రీనివాస్ ఆశాభావం వ్యక్తం చేశారు. మంగళవారం జీఎం కార్యాలయంలోని కాన్ఫరెన్స్ హాల్ లో ఏర్పాటు చేసిన సమావేశంలో శ్రీరాంపూర్ ఇంచార్జి జీఎం శ్రీనివాస్ మాట్లాడుతూ, ఆగస్టు నెలలో ఆర్కే5 గని 87 శాతం, ఆర్కే6 గని 103 శాతం, ఆర్కే7 గని 71 శాతం, ఆర్కే న్యూటెక్ గని 107 శాతం, ఎస్సార్పీ 1 గని 76 శాతం, ఎస్సార్పీ 3,3ఏ గని 92, ఐకే1ఏ గని 71 శాతం ఉత్పత్తితో  భూగర్భ గనులు 85 శాతం ఉత్పత్తి సాధించాయని, ఎస్సార్పీ ఓసిపి 52 శాతం, ఐకే ఓసిపి 39 శాతం ఉత్పత్తితో శ్రీరాంపూర్ ఏరియాలో 59 శాతం బొగ్గు ఉత్పత్తి సాధించినట్లు తెలిపారు. భూగర్భ గనుల్లో  పాత మిషనరీల స్థానంలో కొత్త మిషనరీ ఏర్పాటు చేయడం వల్ల, అధిక వర్షాల కారణంగా ఉపరితల గనుల్లో ఉత్పత్తికి విఘాతం కలిగినట్లు తెలిపారు. సింగరేణి సంస్థ ఉత్పత్తి ,ఉత్పాదకతోపాటు కార్మికుల సంక్షేమం, ఆరోగ్యానికి అధిక ప్రాధాన్యత ఇస్తుందన్నారు. కార్మికుల కాలనీల్లో సీజనల్ వ్యాధులు ప్రబలకుండా అవసరమైన చర్యలు చేపడతామన్నారు. ఆగస్టు నెలలో 62 మంది ఉద్యోగులకు వెబ్ కౌన్సిలింగ్ ద్వారా బదిలీలు చేపట్టినట్లు, 14 మంది అభ్యర్థులకు కారుణ్య నియామక పత్రాలు అందజేసినట్లు తెలిపారు. 108 సర్ఫేస్ జనరల్ మజ్దూర్ ఖాళీలను అర్హులైన అభ్యర్థులతో భర్తీ చేస్తామన్నారు. కన్వేయన్స్ డ్రైవర్స్ జీతం గురించి ఇచ్చిన సమ్మె నోటీసు పై ఓనర్స్ తో చర్చించినట్లు, ఓనర్లు సానుకూలంగా స్పందించినట్లు తెలిపారు. ఈ సమావేశంలో ఎస్వోటు జీఎం సత్యనారాయణ, డీజీఎం (పర్సనల్) పి. అరవింద రావు, డీజీఎం (ఐఈడి) చిరంజీవులు, సీనియర్ పిఓ పి. కాంత రావు తదితరులు పాల్గొన్నారు.