15 December 2025

శ్రీరాంపూర్ జీఎం మునిగంటి శ్రీనివాస్

ఆర్.కె. న్యూ టెక్ గనిలో 56వ వార్షిక రక్షణ పక్షోత్సవాలు

శ్రీరాంపూర్, ఆర్.కె న్యూస్: రక్షణతో కూడిన ఉత్పత్తి, ఉత్పాదకత సాధించడమే లక్ష్యంగా ప్రతి కార్మికుడు పని చేయాలని శ్రీరాంపూర్ ఏరియా జనరల్ మేనేజర్ మునిగంటి శ్రీనివాస్ పిలుపునిచ్చారు. సోమవారం శ్రీరాంపూర్ ఏరియాలోని ఆర్.కె న్యూ టెక్ గనిలో రక్షణ వారోత్సవాల కార్యక్రమాన్ని ఘనంగా నిర్వహించారు. ఈ కార్యక్రమాన్ని ఏరియా జీఎం మునిగంటి శ్రీనివాస్, రక్షణ వారోత్సవాల ఇన్‌స్పెక్షన్ కమిటీ కన్వీనర్ వి. శ్రీనాథ్, బెల్లంపల్లి రీజియన్ సేఫ్టీ జనరల్ మేనేజర్ రఘుకుమార్ ప్రారంభించారు. ఈ సందర్భంగా ముఖ్య అతిథిగా హాజరైన జనరల్ మేనేజర్ మునిగంటి శ్రీనివాస్ మాట్లాడుతూ, సింగరేణి సంస్థ వ్యాప్తంగా ఆర్.కె. న్యూ టెక్ గనికి ప్రత్యేక గుర్తింపు ఉందని, రక్షణ విషయంలో కూడా అదే స్ఫూర్తిని కొనసాగించాలని పిలుపునిచ్చారు. దేశవ్యాప్తంగా నిర్వహించే 5 స్టార్ రేటింగ్ అవార్డులలో గని ఎంపిక కావడం, రక్షణ పరంగా ఎన్నో అవార్డులు సాధించడం గర్వకారణమన్నారు. కార్పొరేట్ ఏ.జి.ఎం (సిఎంసి) వి. శ్రీనాథ్ మాట్లాడుతూ, ఉద్యోగులు విధులకు హాజరయ్యే సమయంలో తప్పనిసరిగా హెల్మెట్ ధరించాలని, నిర్ణీత సమయాని కంటే 10 నిమిషాలు ముందుగానే ఇంటి నుండి బయలుదేరాలని సూచించారు. ప్రమాద రహిత పని ప్రదేశం కోసం ప్రతి ఒక్కరూ ఏ.బి.సి.డి నియమాన్ని పాటించాలన్నారు. ఇందులో ‘ఏ’ అంటే ఆటిట్యూడ్ (వైఖరి), బి అంటే బిహేవియర్ (ప్రవర్తన), సి అంటే కల్చర్ (సంస్కృతి), డి అంటే డిసిప్లీన్ (క్రమశిక్షణ) అని వివరించారు. ఈ నాలుగు అంశాలను పాటిస్తే ప్రమాదాలకు ఆస్కారం ఉండదని ఆయన గుర్తు చేశారు. ఈ కార్యక్రమంలో ఎస్వోటు జీఎం ఎన్. సత్యనారాయణ, గుర్తింపు సంఘం అసిస్టెంట్ బ్రాంచి సెక్రటరీ ఎం. కొమురయ్య, గని ఏజెంట్  కుర్మ రాజేందర్, గని మేనేజర్ కె. శ్రీనివాస్, ఏరియా రక్షణాధికారి విజయ్ కుమార్, గ్రూప్ ఇంజనీర్ ఏ. మోహన్, గని రక్షణాధికారి కొట్టే రమేష్, గని సంక్షేమాధికారి, పాల్ సృజన్, పిట్ కార్యదర్శి ఆకుల లక్ష్మణ్, ఇన్స్పెక్షన్ కమిటీ సభ్యులు, రక్షణ కమిటీ సభ్యులు తదితరులు పాల్గొన్నారు.

మంచిర్యాల, ఆర్.కె న్యూస్: కేంద్రీయ విద్యాలయ సంఘటన్ 63వ ఆవిర్భావ దినోత్సవ వేడుకలను సోమవారం మంచిర్యాలలోని కేంద్రీయ విద్యాలయంలో ఘనంగా నిర్వహించారు. ఈ సందర్భంగా ప్రిన్సిపాల్ దిలీప్ కుమార్ మాట్లాడుతూ.. దేశవ్యాప్తంగా నాణ్యమైన విద్యను అందించడంలో, విద్యార్థులను భావి భారత పౌరులుగా తీర్చిదిద్దడంలో కేంద్రీయ విద్యాలయాల పాత్ర ఎంతో కీలకమని అన్నారు. కేవిఎస్ స్థాపన లక్ష్యాలను, గత 63 ఏళ్లుగా విద్యా రంగంలో సంస్థ అందిస్తున్న విశేష సేవలను ఆయన వివరించారు. వేడుకల్లో భాగంగా విద్యార్థులు ప్రదర్శించిన సాంస్కృతిక కార్యక్రమాలు ప్రత్యేక ఆకర్షణగా నిలిచాయి. దేశభక్తి గీతాలు, నృత్యాలు, మరియు ప్రసంగాలతో విద్యార్థులు ఆకట్టుకున్నారు. కేవిఎస్ చరిత్ర, విజయాలు మరియు భవిష్యత్ లక్ష్యాలపై విద్యార్థులకు అవగాహన కల్పించారు. అనంతరం విద్యార్థులను ఉత్తమ ప్రతిభ కనబరిచేలా ప్రోత్సహిస్తూ ఉపాధ్యాయులు సందేశం ఇచ్చారు. ఈ కార్యక్రమంలో పాఠశాల సిబ్బంది, విద్యార్థులు పెద్ద సంఖ్యలో పాల్గొన్నారు.

నస్పూర్, ఆర్.కె న్యూస్: సింగరేణి ఆవిర్భావ దినోత్సవ వేడుకల్లో భాగంగా ఈ నెల 18వ తేదీన నస్పూర్ డిస్పెన్సరీలో వెల్ బేబీ షోనిర్వహించనున్నట్లు శ్రీరాంపూర్ ఏరియా జీఎం మునిగంటి శ్రీనివాస్ ఒక ప్రకటనలో తెలిపారు. ఈ పోటీలు ఉదయం 10 గంటలకు ప్రారంభమవుతాయని పేర్కొన్నారు. శ్రీరాంపూర్ ఏరియాలో పనిచేస్తున్న సింగరేణి ఉద్యోగుల పిల్లలు ఈ పోటీలకు అర్హులని తెలిపారు. కేవలం 1 నుండి 5 సంవత్సరాల వయస్సు ఉన్న పిల్లలకు మాత్రమే ఈ పోటీలో పాల్గొనే అవకాశం ఉంటుందని తెలిపారు. పోటీలలో పాల్గొనే ఉద్యోగులు తప్పనిసరిగా తమ ఐడి కార్డు, పిల్లల జనన ధృవీకరణ పత్రం, రోగ నిరోధక టీకాల కార్డు వెంట తీసుకురావాలని సూచించారు. అర్హులైన ఉద్యోగులు ఈ అవకాశాన్ని సద్వినియోగం చేసుకోవాలని కోరారు.

సేవా అధ్యక్షురాలు మునిగంటి ఉమారాణి
వైభవంగా దీపాలంకరణ పోటీలు

నస్పూర్, ఆర్.కె న్యూస్: మహిళల భాగస్వామ్యంతోనే వేడుకలకు నిండుదనం చేకూరుతుందని శ్రీరాంపూర్ ఏరియా సేవా అధ్యక్షురాలు మునిగంటి ఉమారాణి అన్నారు. సింగరేణి ఆవిర్భావ దినోత్సవ వేడుకలను పురస్కరించుకుని సోమవారం నస్పూర్ కాలనీలోని మనోరంజన్ సముదాయిలో మహిళలకు దీపాలంకరణ పోటీలను నిర్వహించారు. ఈ కార్యక్రమానికి ముఖ్య అతిథిగా శ్రీరాంపూర్ ఏరియా సేవా అధ్యక్షురాలు మునిగంటి ఉమరాణి హాజరయ్యారు. ఈ సందర్భంగా ఆమె మాట్లాడుతూ, మహిళలు పాల్గొనే ఏ కార్యక్రమమైనా తప్పక విజయవంతం అవుతుందని పేర్కొన్నారు. శ్రీరాంపూర్ పరిసర ప్రాంతాల నుండి మహిళలు పెద్ద ఎత్తున హాజరై ఈ పోటీల్లో పాల్గొనడం సంతోషకరమన్నారు. నిత్యం ఇంటి పనుల్లో బిజీగా ఉండే మహిళలు, సమయం కేటాయించి ఇలాంటి పోటీల్లో తమ ప్రతిభను చాటుకోవడం అభినందనీయమని కొనియాడారు. పోటీల్లో గెలుపొందిన విజేతలకు ఈ నెల 23న సాయంత్రం శ్రీరాంపూర్ కాలనీలోని ప్రగతి స్టేడియంలో జరిగే సింగరేణి దినోత్సవ ప్రధాన వేడుకలలో బహుమతులు అందజేస్తామని ఉమారాణి తెలిపారు. ఈ కార్యక్రమంలో గుర్తింపు సంఘం అసిస్టెంట్ బ్రాంచ్ సెక్రటరీ మోత్కూరి కొమురయ్య, అకౌంట్స్ అధికారి పద్మ, సీనియర్ పర్సనల్ ఆఫీసర్లు ఎస్. సురేందర్, మురళి, ఏఐటీయూసీ నాయకులు కొట్టే కిషన్ రావు, సుజాత, శ్రీలత, సేవా సెక్రటరీ జ్యోతి, సేవా సభ్యురాళ్లు శారద, సునీత, రజిత, శిక్షకురాళ్లు, మహిళలు, చిన్నారులు పాల్గొన్నారు.