20 December 2025

• జిల్లా కలెక్టర్ కుమార్ దీపక్ చేతుల మీదుగా గోడప్రతుల ఆవిష్కరణ

నస్పూర్, ఆర్.కె న్యూస్: మంచిర్యాల జిల్లా కేంద్రంలో త్వరలో ప్రారంభం కానున్న నెక్స్ ఐరా ఐటీ కంపెనీ, సాఫ్ట్‌వేర్ శిక్షణ కేంద్రం (స్టార్టప్) గోడప్రతులను జిల్లా కలెక్టర్ కుమార్ దీపక్ తన ఛాంబర్‌లో ఆవిష్కరించారు. శుక్రవారం రాత్రి జరిగిన ఈ కార్యక్రమంలో కంపెనీ మేనేజింగ్ డైరెక్టర్ మోతే శరత్ చంద్ర, రాష్ట్రపతి అవార్డు గ్రహీత, సైకాలజిస్ట్ గుండేటి యోగేశ్వర్ పాల్గొన్నారు. ఈ సందర్భంగా నిర్వాహకులు మాట్లాడుతూ.. మంచిర్యాలలో తొలిసారిగా ఆర్టిఫిషియల్ ఇంటెలిజెన్స్, డాటా సైన్సెస్, ఎంబెడెడ్ సిస్టమ్స్, డెవాప్స్ వంటి అత్యాధునిక సాంకేతిక అంశాలపై శిక్షణ ఇవ్వనున్నట్లు తెలిపారు. రాష్ట్ర ప్రభుత్వం ప్రోత్సహిస్తున్న సాఫ్ట్‌వేర్ నైపుణ్యాభివృద్ధి (స్కిల్ డెవలప్‌మెంట్) సదుపాయాలను కూడా ఇక్కడ కల్పిస్తున్నట్లు కలెక్టర్‌కు వివరించారు. అనంతరం కలెక్టర్‌కు పచ్చని మొక్కను అందించి, త్వరలో జరగనున్న ప్రారంభోత్సవానికి ముఖ్య అతిథిగా ఆహ్వానించగా ఆయన సానుకూలంగా స్పందించారు.

వాసవి క్లబ్ సేవా కార్యక్రమాలకు దక్కిన అరుదైన గుర్తింపు
హైదరాబాద్‌లో ఘనంగా సత్కారం

నస్పూర్, ఆర్.కె న్యూస్: అంతర్జాతీయ వాసవి క్లబ్ ఆధ్వర్యంలో 2025 సంవత్సరానికి గాను జిల్లా వీ 107 ఏ పరిధిలో చేపట్టిన విశేష సేవా కార్యక్రమాలకు గుర్తింపుగా రీజియన్ చైర్‌పర్సన్ కేశెట్టి వంశీకృష్ణకు ‘ఉత్తమ చైర్‌పర్సన్’ అవార్డు లభించింది. హైదరాబాద్‌లోని క్లాసిక్ 3 కన్వెన్షన్ హాల్‌లో నిర్వహించిన వేడుకల్లో ఆయనను ఈ పురస్కారంతో ఘనంగా సత్కరించారు. మంచిర్యాల, కుమురం భీం ఆసిఫాబాద్ జిల్లాల పరిధిలోని 15 వాసవి క్లబ్‌లకు రీజియన్ చైర్‌పర్సన్‌గా వంశీకృష్ణ అద్భుతమైన సేవలు అందించారు. క్లబ్ సభ్యత్వ నమోదును భారీగా పెంచడంతో పాటు, సుమారు 15 లక్షల రూపాయల వ్యయంతో పలు ప్రజాహిత కార్యక్రమాలు చేపట్టారు. ముఖ్యంగా చిరు వ్యాపారులకు ఆర్థిక చేయూతనిచ్చేందుకు వడ్డీ లేని రుణాలు అందజేయడం, నిరుపేద విద్యార్థులకు నోటు పుస్తకాలు, విద్యార్థివేతనాలు పంపిణీ చేయడం వంటి కార్యక్రమాల ద్వారా ఆయన విశేష గుర్తింపు పొందారు. ఉత్తమ రీజియన్ చైర్‌పర్సన్‌గా అవార్డు అందుకున్న వంశీకృష్ణను జిల్లా గవర్నర్ ఇల్లందుల కిషోర్, అంతర్జాతీయ అధికారులు ముక్త శ్రీనివాస్, శ్రీనివాస్, సిరిపురం రాజేష్, కటకం హరీష్, కొండ చంద్రశేఖర్, బాల సంతోష్, పుల్లూరి బాలు మోహన్ అభినందించారు. అలాగే తోటి జర్నలిస్టులు, ఓం అష్టోత్తర యోగా పీఠం సభ్యులు ఆయనను అభినందనలతో ముంచెత్తారు. మానవ సేవయే మాధవ సేవగా భావించి ఆయన చేస్తున్న కృషిని పలువురు కొనియాడారు.

• సింగరేణిలో ‘ప్రీ-హైరింగ్ అప్లికేషన్’పై జీఎం జీవీ కిరణ్ కుమార్ సమీక్ష

నస్పూర్, ఆర్.కె న్యూస్: సింగరేణి సంస్థలో కారుణ్య మరియు ఆధారిత నియామక ప్రక్రియను మరింత వేగవంతం చేస్తూ, పూర్తి పారదర్శకతతో నిర్వహించేందుకు డిజిటల్ విధానాన్ని పటిష్టం చేస్తున్నట్లు జీఎం (పర్సనల్) వెల్ఫేర్ అండ్ సీఎస్ఆర్ జీవీ కిరణ్ కుమార్ తెలిపారు. శనివారం సింగరేణి ప్రధాన కార్యాలయం నుండి వీడియో కాన్ఫరెన్స్ ద్వారా వివిధ ఏరియాల పర్సనల్ విభాగం అధికారులతో ఆయన సమీక్ష నిర్వహించారు. ఈ సందర్భంగా ఆయన మాట్లాడుతూ.. టీ-కోడ్ వై ఎంప్లాయ్ అనే ప్రీ-హైరింగ్ అప్లికేషన్ ద్వారా కారుణ్య నియామక కేసులను డిజిటలైజ్ చేసినట్లు వివరించారు. యూనిట్ స్థాయిలో దరఖాస్తులను స్వీకరించడం మొదలుకొని, శాప్ హెచ్ ఆర్ బృందం ద్వారా తుది నియామక ఉత్తర్వులు ఇచ్చే వరకు ఈ ప్రక్రియ కొనసాగుతుందన్నారు. దీనివల్ల డేటా నమోదు, ధృవీకరణ, సీనియారిటీ జాబితా తయారీ, పోస్టింగ్ మరియు ఆన్-బోర్డింగ్ వంటి అన్ని దశల్లో జాప్యం లేకుండా పారదర్శకత సాధ్యమవుతుందని పేర్కొన్నారు. ఈ కొత్త డిజిటల్ విధానంలో మాజీ ఉద్యోగి వివరాల నమోదు, ధృవీకరణ, వైద్య పరీక్షలు (ఐఎంఈ), పుట్టిన తేదీ నిర్ధారణ వంటి అంశాలను క్షుణ్ణంగా పరిశీలిస్తారని తెలిపారు. అనంతరం సీనియారిటీ జాబితాను రూపొందించి, పోస్టింగ్ వివరాలు మరియు జాయినింగ్ ఫార్మాలిటీస్ పూర్తి చేస్తారని వివరించారు. మానవ వనరుల విభాగం తుది సమీక్ష నిర్వహించిన తర్వాతే నియామక ప్రక్రియ పూర్తవుతుందని స్పష్టం చేశారు. ఈ విధానం ద్వారా డాక్యుమెంటేషన్ పక్కాగా ఉంటుందని ఆయన వెల్లడించారు. ఈ కార్యక్రమంలో డిప్యూటీ జనరల్ మేనేజర్ (పర్సనల్) ఎస్. అనిల్ కుమార్, డిప్యూటీ పీఎం జీకే కిరణ్ కుమార్, అన్ని గనుల సంక్షేమ అధికారులు మరియు వివిధ విభాగాల సిబ్బంది పాల్గొన్నారు.

జనవరి 1న ఉత్తర్వుల పంపిణీ
గడువులోగా ప్రక్రియ పూర్తి చేసిన సిబ్బందికి జీఎం అభినందనలు

నస్పూర్, ఆర్.కె న్యూస్: శ్రీరాంపూర్ ఏరియాలో పనిచేస్తున్న 338 మంది ఉద్యోగులకు సర్వీసు లింక్డ్ పదోన్నతుల ప్రక్రియను నిర్ణీత సమయంలో పూర్తి చేసినట్లు ఏరియా జనరల్ మేనేజర్ మునిగంటి శ్రీనివాస్ తెలిపారు. ఈ పదోన్నతులకు సంబంధించిన ఉత్తర్వుల కాపీలను 2026 జనవరి 1వ తేదీన ఆయా గనుల విభాగాల్లో కార్మికులకు అందజేయనున్నట్లు వెల్లడించారు. ఈ ప్రక్రియను గడువు కంటే ముందే పూర్తి చేయడంలో కీలక పాత్ర పోషించిన పర్సనల్ విభాగం ఉద్యోగి కె. శ్రీధర్‌ను శనివారం జీఎం ప్రత్యేకంగా అభినందించి బహుమతిని అందజేశారు. పారదర్శకంగా, వేగంగా పని పూర్తి చేసిన సిబ్బందిని ఈ సందర్భంగా ఆయన కొనియాడారు. కార్యక్రమంలో డీజీఎం (పర్సనల్) ఎస్. అనిల్ కుమార్, డివై పీఎం ఎం. రాజేష్, సీనియర్ పీవోలు ఎస్. సురేందర్, మురళీ,యు పర్సనల్ విభాగం సిబ్బంది పాల్గొన్నారు.

రిటైర్డ్ కార్మికులకు బోనస్ నిలిపివేయడం దుర్మార్గం
ఏఐటీయూసీ రాష్ట్ర అధ్యక్షులు వాసిరెడ్డి సీతారామయ్య

నస్పూర్, ఆర్.కె న్యూస్: సింగరేణి సంస్థలో కొంతమంది అధికారులు నిరంకుశంగా వ్యవహరిస్తూ సంస్థ కీర్తిప్రతిష్టలను దెబ్బతీస్తున్నారని ఏఐటీయూసీ రాష్ట్ర అధ్యక్షులు వాసిరెడ్డి సీతారామయ్య మండిపడ్డారు. శనివారం ఆయన ఒక ప్రకటన విడుదల చేస్తూ, కార్మికుల పట్ల యాజమాన్యం అనుసరిస్తున్న వ్యతిరేక విధానాలను తీవ్రంగా ఖండించారు. పదవీ విరమణ చేసిన కార్మికులకు లాభాల వాటా, దీపావళి బోనస్ (పీఎల్ఆర్) చెల్లించడానికి క్వార్టర్ ఖాళీ చేయాలనే నిబంధన పెట్టడం గతంలో ఎన్నడూ లేదని ఆయన గుర్తుచేశారు. గతంలో క్వార్టర్ ఖాళీ చేయని పక్షంలో కేవలం గ్రాట్యూటీ మాత్రమే నిలిపివేసేవారని, ఇప్పుడు బోనస్‌లను కూడా ఆపడం విడ్డూరంగా ఉందన్నారు. అధికారుల ఈ కొత్త నిబంధనలు రిటైర్డ్ కార్మికులను తీవ్ర ఇబ్బందులకు గురిచేస్తున్నాయని ఆవేదన వ్యక్తం చేశారు. విద్యుత్ సంస్థల నుండి సింగరేణికి రావాల్సిన 40 వేల కోట్ల రూపాయలకు పైగా బకాయిలను రాబట్టడంలో అధికారులు పూర్తిగా వైఫల్యం చెందారని సీతారామయ్య విమర్శించారు. ఒకవైపు సంస్థకు రావాల్సిన నిధులపై నిర్లక్ష్యం వహిస్తూనే, మరోవైపు సింగరేణి కార్యకలాపాలు లేని జిల్లాల్లో కోట్లాది రూపాయలు ఖర్చు చేయడం ఎంతవరకు సమంజసమని ప్రశ్నించారు. ప్రభుత్వానికి సింగరేణి నిధులు ధారాళంగా ఇస్తున్నప్పుడు, కార్మికుల హక్కుల విషయంలో ఎందుకు వెనుకాడుతున్నారని నిలదీశారు.

అవతరణ వేడుకలపై వివక్ష

సింగరేణి అవతరణ దినోత్సవం అనేది కార్మికులు, వారి కుటుంబ సభ్యులు జరుపుకునే గొప్ప పండుగని, అయితే ఈ ఏడాది నిధులు లేవనే సాకుతో వేడుకలను కేవలం జనరల్ మేనేజర్ కార్యాలయాలకే పరిమితం చేయడం అన్యాయమన్నారు. బడ్జెట్ తగ్గించి కార్మికులను రెచ్చగొట్టే ప్రయత్నం చేస్తున్నారని, సంస్థ భవిష్యత్తును నిర్వీర్యం చేయడానికి పూనుకున్న అధికారులు భవిష్యత్తులో తగిన మూల్యం చెల్లించుకోక తప్పదని హెచ్చరించారు. కార్మిక వ్యతిరేక విధానాలను ఏఐటీయూసీ తరపున తీవ్రంగా ప్రతిఘటిస్తామని సీతారామయ్య స్పష్టం చేశారు.