31 December 2025

శ్రీరాంపూర్ లో ముగిసిన కంపెనీ స్థాయి క్రీడా పోటీలు
విజేతలకు బహుమతులు ప్రదానం చేసిన ఏరియా జనరల్ మేనేజర్ మునిగంటి శ్రీనివాస్

నస్పూర్, ఆర్.కె న్యూస్: క్రీడలు ఉద్యోగులలో శారీరక దృఢత్వాన్ని పెంపొందించడమే కాకుండా, మానసిక స్థైర్యాన్ని, జట్టు భావనను పెంపొందిస్తాయని శ్రీరాంపూర్ ఏరియా జనరల్ మేనేజర్ మునిగంటి శ్రీనివాస్ అన్నారు. శ్రీరాంపూర్ ఏరియా శాంతి మైదానంలో వర్క్స్ పీపుల్స్ స్పోర్ట్స్ అండ్ గేమ్స్ అసోసియేషన్ ఆధ్వర్యంలో నిర్వహించిన కంపెనీ స్థాయి అథ్లెటిక్స్, త్రోబాల్, స్విమ్మింగ్ క్రీడా పోటీల ముగింపు వేడుకలు బుధవారం అత్యంత వైభవంగా జరిగాయి. వివిధ ఏరియాల నుంచి తరలివచ్చిన క్రీడాకారులు ఈ పోటీల్లో ఉత్సాహంగా పాల్గొని తమ నైపుణ్యాన్ని ప్రదర్శించారు. ఈ వేడుకలకు శ్రీరాంపూర్ ఏరియా జనరల్ మేనేజర్ మునిగంటి శ్రీనివాస్ ముఖ్య అతిథిగా హాజరై, వివిధ విభాగాల్లో విజేతలుగా నిలిచిన క్రీడాకారులకు ట్రోఫీలు, పతకాలు, ప్రశంసా పత్రాలను అందజేశారు. అనంతరం జనరల్ మేనేజర్ మాట్లాడుతూ.. క్రీడల్లో గెలుపు ఓటములు సహజమని, అయితే క్రీడాకారులు ప్రదర్శించే క్రమశిక్షణ, పట్టుదల, క్రీడా స్ఫూర్తి అత్యంత కీలకమని పేర్కొన్నారు. ఇక్కడ ప్రదర్శించిన ప్రతిభను రాబోయే కోల్ ఇండియా స్థాయి పోటీల్లోనూ ప్రదర్శించి సంస్థకు గర్వకారణంగా నిలవాలని ఆకాంక్షించారు. పోటీల్లో ఓడిపోయిన వారు నిరుత్సాహపడకుండా, నిరంతర సాధనతో భవిష్యత్తులో విజయాలు సాధించాలని పిలుపునిచ్చారు. క్రీడలు ఉద్యోగులలో శారీరక దృఢత్వాన్ని పెంపొందించడమే కాకుండా, మానసిక స్థైర్యాన్ని, జట్టు భావనను పెంపొందిస్తాయని ఆయన తెలిపారు. ఇటువంటి పోటీల వల్ల సంస్థలో ఆరోగ్యకరమైన వాతావరణం ఏర్పడుతుందని, క్రీడల అభివృద్ధికి యాజమాన్యం ఎల్లప్పుడూ పూర్తి సహకారం అందిస్తుందని హామీ ఇచ్చారు. ఇదే సందర్భంలో ఉద్యోగులందరికీ ఆంగ్ల నూతన సంవత్సర శుభాకాంక్షలు తెలియజేస్తూ, రాబోయే ఏడాది అందరి జీవితాల్లో సుఖసంతోషాలు నింపాలని కోరుకున్నారు. ఈ కార్యక్రమంలో ఎస్వోటు జీఎం, స్పోర్ట్స్ వైస్ ప్రెసిడెంట్ ఎన్. సత్యనారాయణ, గుర్తింపు సంఘం బ్రాంచ్ సెక్రటరీ బాజీ సైదా, అధికారుల సంఘం శ్రీరాంపూర్ ఏరియా అధ్యక్షులు కే. వెంకటేశ్వర్ రెడ్డి, డీజీఎం (పర్సనల్), చీఫ్ కోఆర్డినేటర్ ఎస్. అనిల్ కుమార్, స్పోర్ట్స్ సెక్రటరీ సృజన్ పాల్ స్పోర్ట్స్ సూపర్వైజర్ చాట్ల అశోక్, జాన్ వెస్లీ, పర్సా శ్రీనివాస్, ఎం. నరేందర్ రెడ్డి, సిహెచ్. రమేష్, కోఆర్డినేటర్ ఎస్. నరసయ్య, జనరల్ కెప్టెన్ శ్రీనివాస్, ఇండోర్ కెప్టెన్ తోట సురేష్, వివిధ ఏరియాల కోఆర్డినేటర్లు, క్రీడాకారులు, ఉద్యోగులు పెద్ద సంఖ్యలో పాల్గొన్నారు.

ఐఎన్ టీయూసీ సెక్రటరీ జనరల్ బి. జనక్ ప్రసాద్
సింగరేణి సమస్యల పరిష్కారానికి ప్రభుత్వం సానుకూలం

నస్పూర్, ఆర్.కె న్యూస్: సింగరేణిలో గుర్తింపు సంఘం ఎన్నికలు జరిగి రెండేళ్లు గడుస్తున్నా, కార్మికుల సమస్యలను పరిష్కరించడంలో గుర్తింపు సంఘం ఏఐటీయూసీ పూర్తిగా విఫలమైందని ఐఎన్ టీయూసీ సెక్రటరీ జనరల్ బి. జనక్ ప్రసాద్ విమర్శించారు. బుధవారం నస్పూర్ ప్రెస్ క్లబ్‌లో నిర్వహించిన విలేకరుల సమావేశంలో ఆయన మాట్లాడారు. కార్మికుల సమస్యల పరిష్కారానికి వేదిక అయిన స్ట్రక్చర్ మీటింగ్ ను బహిష్కరించడం సిగ్గుచేటని, ఐఎన్ టీయూసీ చొరవతోనే మళ్లీ సమావేశం జరిగిందని గుర్తు చేశారు. ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వం అధికారంలోకి రాగానే కార్మికుల సంక్షేమం కోసం పలు విప్లవాత్మక నిర్ణయాలు తీసుకుందని జనక్ ప్రసాద్ తెలిపారు. కారుణ్య నియామకాల వయోపరిమితిని 35 నుండి 40 ఏళ్లకు పెంపు, కాంట్రాక్టు కార్మికులకు బోనస్, కోటి రూపాయల ప్రమాద బీమా, సూపర్ స్పెషాలిటీ ఆసుపత్రి నిర్మాణానికి చర్యలు తీసుకున్నట్లు తెలిపారు. ఇటీవల హైదరాబాద్‌లో మంత్రులను కలిసి కార్మికుల చిరకాల డిమాండ్లపై చర్చించినట్లు ఆయన పేర్కొన్నారు. ప్రధానంగా ఆదాయపన్ను మినహాయింపు, సొంత ఇంటి పథకం అమలు, కొత్త బొగ్గు గనుల ప్రారంభం, పెండింగ్‌లో ఉన్న 3,700 కోర్టు కేసుల పరిష్కారానికి లోక్ అదాలత్ నిర్వహణ వంటి పలు అంశాలను ప్రభుత్వం దృష్టికి తీసుకెళ్లామని, వీటన్నింటిపై ముఖ్యమంత్రి సానుకూలంగా స్పందించారని తెలిపారు. గత పదేళ్లుగా సంస్థను దోచుకున్న బీఆర్ఎస్ అనుబంధ సంఘం తీరును ఆయన తూర్పారబట్టారు. ఈ సమావేశంలో సెంట్రల్ సీనియర్ వైస్ ప్రెసిడెంట్లు కాంపల్లి సమ్మయ్య, జెట్టి శంకర్ రావు, నాయకులు కలవేన శ్యామ్, ఏనుగు రవీందర్ రెడ్డి తదితరులు పాల్గొన్నారు.

మంచిర్యాల జిల్లా కలెక్టర్ కుమార్ దీపక్
‘వార్త’ దినపత్రిక కాలసూచికలను ఆవిష్కరించిన కలెక్టర్

నస్పూర్, ఆర్.కె న్యూస్: ప్రజాస్వామ్యంలో ప్రభుత్వం అమలు చేసే అభివృద్ధి, సంక్షేమ పథకాలు అర్హులైన ప్రతి ఒక్కరికీ అందేలా చేయడంలో మీడియా కీలకమైన వారధిలా పనిచేస్తుందని మంచిర్యాల జిల్లా కలెక్టర్ కుమార్ దీపక్ పేర్కొన్నారు. బుధవారం నస్పూర్ లోని సమీకృత జిల్లా కార్యాలయాల భవన సముదాయంలో గల కలెక్టర్ ఛాంబర్ లో ‘వార్త’ దినపత్రికకు సంబంధించిన నూతన సంవత్సర కాలసూచికలను ఆయన ఆవిష్కరించారు. ఈ సందర్భంగా జిల్లా కలెక్టర్ మాట్లాడుతూ, ప్రభుత్వం పేదల కోసం ప్రవేశపెట్టే సంక్షేమ పథకాలను ప్రజలకు సమర్థవంతంగా వివరించాల్సిన బాధ్యత ప్రసార మాధ్యమాలపై ఉందన్నారు. అదే సమయంలో ప్రజలు క్షేత్రస్థాయిలో ఎదుర్కొంటున్న సమస్యలను ప్రభుత్వం దృష్టికి తీసుకురావడం ద్వారా అర్హులైన పేదలకు సంక్షేమ ఫలాలు అందుతాయని ఆయన అభిప్రాయపడ్డారు. సమాజంలో జరుగుతున్న ప్రతి అంశంపై మీడియా ఎప్పటికప్పుడు స్పందించాలని, వార్తా సేకరణలో వాస్తవాలను మాత్రమే ప్రజలకు, ప్రభుత్వానికి తెలియజేయాలని సూచించారు. జర్నలిజం విలువలను కాపాడుతూ సామాజిక అభివృద్ధిలో భాగస్వాములు కావాలని కోరారు. ఈ కార్యక్రమంలో జిల్లా పౌర సంబంధాల అధికారి ఎం. కృష్ణమూర్తి, వార్త దినపత్రిక ప్రతినిధులు కోడూరి శ్రీనివాస్, మేకల భీమయ్య, క్యాతం రాజేష్, ప్రభుదాస్, అహ్మద్, సుభాష్ తదితరులు పాల్గొన్నారు.