2 January 2026

కార్మికుల సమస్యలు పరిష్కరించాలని డిమాండ్
సానుకూలంగా స్పందించిన యాజమాన్యం

నస్పూర్, ఆర్.కె న్యూస్: ఐఎన్‌టీయూసీ సెక్రటరీ జనరల్, రాష్ట్ర కనీస వేతనాల సలహా మండలి చైర్మన్ బి. జనక్ ప్రసాద్ ఆదేశాల మేరకు శుక్రవారం శ్రీరాంపూర్ ఓపెన్ కాస్ట్ గనిని ఐఎన్‌టీయూసీ కేంద్ర కమిటీ నాయకులు సందర్శించారు. సంఘం సీనియర్ కేంద్ర ఉపాధ్యక్షులు జెట్టి శంకర్ రావు, ఉపాధ్యక్షులు గరిగ స్వామి, పి. తిరుపతి రాజు గని పిట్ కార్యదర్శి ఓరం జగన్ నేతృత్వంలో ఎస్సార్పీ ఓసీపీని సందర్శించారు. మధ్యాహ్నం రెండవ షిఫ్ట్ సమయంలో నాయకులు నేరుగా ఎలక్ట్రికల్ సూపర్వైజర్లు, టెక్నీషియన్లు, ఈపీ ఆపరేటర్లు, ఇతర కార్మికులను కలిసి వారి సమస్యలను అడిగి తెలుసుకున్నారు. ఈ సందర్భంగా కార్మికులు ఎదుర్కొంటున్న ప్రధాన సమస్యలను నాయకులు గుర్తించారు. ఈపీ ఆపరేటర్లు, ఎలక్ట్రికల్ ఫోర్‌మెన్లు, హెల్పర్ల కొరత వల్ల ఉన్న సిబ్బందిపై పనిభారం పెరుగుతోందని, దీనివల్ల భద్రత మరియు ఉత్పత్తి దెబ్బతింటున్నాయని కార్మికులు వాపోయారు. అలాగే ఎనిమిది గంటల నిరంతర పని వల్ల కలిగే అలసటను దృష్టిలో ఉంచుకుని లంచ్ అవర్ కల్పించాలని డిమాండ్ చేశారు. ఈ సమస్యలపై నాయకులు యాజమాన్యంతో చర్చించగా, సానుకూల చర్యలు తీసుకుంటామని హామీ లభించింది. ఈ కార్యక్రమంలో షిఫ్ట్ ప్రతినిధులు, టెక్నీషియన్లు, ఈపీ ఆపరేటర్లు, కార్మికులు పెద్ద సంఖ్యలో పాల్గొన్నారు.

జిల్లా నేతల సమక్షంలో నిర్వహణ.. విజయవంతం చేయాలని పిలుపు

నస్పూర్, ఆర్.కె న్యూస్: నస్పూర్ మండల పద్మశాలి సంఘం, శ్రీ లక్ష్మి గణపతి శివ మార్కండేయ దుర్గ మాత దేవాలయ నూతన కమిటీల ఎన్నిక ఈ నెల 4వ తేదీ ఆదివారం ఉదయం 10 గంటలకు నిర్వహించనున్నట్లు ఎన్నికల బాధ్యులు కుందారపు రమేష్, చిలువేరు శరవందం శుక్రవారం ఒక ప్రకటనలో తెలిపారు. మంచిర్యాల జిల్లా పద్మశాలి సంఘం అధ్యక్షులు గాదాసు బాపు, గౌరవ అధ్యక్షులు గడ్డం సుధాకర్, మంచిర్యాల పట్టణ అధ్యక్షులు రాం సత్తయ్య, మందమర్రి పట్టణ అధ్యక్షులు చిలగాని సుదర్శన్ ముఖ్య అతిథులుగా హాజరై, ఈ ఎన్నికల ప్రక్రియను పర్యవేక్షిస్తారని పేర్కొన్నారు. దేవాలయ అభివృద్ధి, సంఘం పురోగతిని కాంక్షించే ప్రతి ఒక్కరూ ఈ కార్యక్రమంలో భాగస్వాములు కావాలని కోరారు.

ఐబీ చౌరస్తాలో బీసీ హక్కుల పోరాట సమితి వినూత్న నిరసన..

భారతరత్న ఇవ్వాలని డిమాండ్

మంచిర్యాల, ఆర్.కె న్యూస్: దేశంలోనే తొలి మహిళా ఉపాధ్యాయురాలు సావిత్రిబాయి పూలే జయంతిని కేంద్ర ప్రభుత్వం అధికారికంగా ‘జాతీయ ఉపాధ్యాయ దినోత్సవం’గా నిర్వహించాలని జాతీయ బీసీ హక్కుల పోరాట సమితి డిమాండ్ చేసింది. శుక్రవారం మంచిర్యాల పట్టణంలోని ఐబీ చౌరస్తాలో గల అంబేద్కర్ విగ్రహం వద్ద నాయకులు మోకాళ్లపై నిలబడి వినూత్న రీతిలో నిరసన వ్యక్తం చేశారు. ఈ సందర్భంగా నాయకులు మాట్లాడుతూ.. మూఢనమ్మకాలు రాజ్యమేలుతున్న కాలంలోనే సావిత్రిబాయి పూలే ఎన్నో అడ్డంకులను ఎదుర్కొని అణగారిన వర్గాలకు విద్యను అందించిన ధీరవనిత అని కొనియాడారు. అటువంటి గొప్ప వ్యక్తిని కేంద్ర ప్రభుత్వం గుర్తించకపోవడం బీసీ మహిళల పట్ల వివక్ష చూపడమేనని మండిపడ్డారు. సావిత్రిబాయి పూలేకు తక్షణమే ‘భారతరత్న’ ప్రకటించాలని, కేంద్ర సెక్రటేరియట్‌లో ఆమె విగ్రహాన్ని ప్రతిష్టించాలని డిమాండ్ చేశారు. ఈ డిమాండ్లు నెరవేరే వరకు బీసీ మహిళలను చైతన్యం చేస్తూ ఉద్యమాన్ని ఉధృతం చేస్తామని హెచ్చరించారు. ఈ కార్యక్రమంలో జిల్లా అధ్యక్షులు గుమ్ముల శ్రీనివాస్, కార్యదర్శి శాఖ పోరి భీమ్సేన్, నాయకులు గజెల్లి వెంకటయ్య, చంద్రగిరి చంద్రమౌళి, రాజన్న చారి, అంజయ్య తదితరులు పాల్గొన్నారు.

•  ఆర్.కె న్యూ టెక్ గని మేనేజర్‌కు హెచ్‌ఎంఎస్, తెలంగాణ జాగృతి వినతి

నస్పూర్, ఆర్.కె న్యూస్: సింగరేణి వ్యాప్తంగా గుర్తింపు, ప్రాతినిధ్య కార్మిక సంఘాల కాలపరిమితి ముగిసిన నేపథ్యంలో, అన్ని రిజిస్టర్డ్ సంఘాలకు సమాన హోదా కల్పించాలని హెచ్‌ఎంఎస్, తెలంగాణ జాగృతి నాయకులు డిమాండ్ చేశారు. శుక్రవారం శ్రీరాంపూర్ ఏరియాలోని ఆర్.కె న్యూ టెక్ గని మేనేజర్‌ కూరపాటి శ్రీనివాస్ కు ఈ మేరకు వినతి పత్రం సమర్పించారు. ఈ సందర్భంగా హెచ్‌ఎంఎస్ నాయకులు తులా అనిల్ కుమార్ మాట్లాడుతూ, 2023 డిసెంబర్ 27న జరిగిన సింగరేణి గుర్తింపు సంఘం ఎన్నికల గడువు 2025 డిసెంబర్ 27తో ముగిసిందని గుర్తుచేశారు. సెంట్రల్ లేబర్ కమిషనర్ ఆదేశాల ప్రకారం గుర్తింపు సంఘం కాలపరిమితి రెండేళ్లు మాత్రమేనని, ఆ గడువు ముగిసిన వెంటనే ప్రస్తుత హోదా రద్దవుతుందని స్పష్టం చేశారు. కొత్త ఎన్నికలు నిర్వహించే వరకు అన్ని రిజిస్టర్డ్ కార్మిక సంఘాలను సమానంగా చూడాలని, మైన్స్ కమిటీ, పిట్ సేఫ్టీ కమిటీ సమావేశాలకు అన్ని సంఘాల ప్రతినిధులను ఆహ్వానించాలని, కార్మికుల సమస్యలపై నిర్వహించే అన్ని అధికారిక చర్చల్లో అన్ని సంఘాలకు భాగస్వామ్యం కల్పించాలని కోరారు. ఈ కార్యక్రమంలో హెచ్‌ఎంఎస్ నాయకులు సురేందర్, అనిల్ అడ్లూరి, సంపత్, తెలంగాణ జాగృతి నాయకులు మరియు పెద్ద సంఖ్యలో కార్మికులు పాల్గొన్నారు.