5 January 2026

ముల్కలపేట యువతకు వాలీబాల్ కిట్ పంపిణీ చేసిన నీల్వాయి ఎస్సై
కొత్త చట్టాలు, సైబర్ నేరాలపై అవగాహన కార్యక్రమం

వేమనపల్లి, ఆర్.కె న్యూస్: యువత చెడు వ్యసనాలకు దూరంగా ఉండి, క్రీడల్లో రాణించడం ద్వారా ఉజ్వల భవిష్యత్తును నిర్మించుకోవాలని నీల్వాయి ఎస్సై జగదీశ్వర్ రెడ్డి పిలుపునిచ్చారు. చెన్నూరు గ్రామీణ సీఐ బన్సిలాల్ ఆదేశాల మేరకు సోమవారం ముల్కలపేట గ్రామ యువకులకు ఆయన వాలీబాల్ క్రీడా సామాగ్రిని (కిట్) అందజేశారు. ఈ సందర్భంగా గ్రామంలో రోడ్డు భద్రతా కమిటీని ఏర్పాటు చేయడంతో పాటు, వివిధ సామాజికాంశాలపై యువతకు, గ్రామస్థులకు అవగాహన కల్పించారు. ఈ సందర్భంగా ఎస్సై జగదీశ్వర్ రెడ్డి మాట్లాడుతూ.. యువత మత్తు పదార్థాలకు బానిసలై తమ జీవితాలను నాశనం చేసుకోవద్దని హెచ్చరించారు. భారతీయ నూతన న్యాయ చట్టాలు, రవాణా నిబంధనల పట్ల ప్రతి ఒక్కరూ కనీస అవగాహన కలిగి ఉండాలన్నారు. ముఖ్యంగా ప్రస్తుత కాలంలో యువత మొబైల్ ఫోన్లలో జూదం వంటి గేమింగ్ యాప్‌లకు ఆకర్షితులవుతున్నారని, అటువంటి వాటికి దూరంగా ఉండాలని సూచించారు. సైబర్ నేరగాళ్ల పట్ల అప్రమత్తంగా ఉండాలని, అపరిచిత వ్యక్తులకు తమ బ్యాంకు ఖాతా వివరాలు, ఇతర వ్యక్తిగత సమాచారాన్ని ఎట్టి పరిస్థితుల్లోనూ వెల్లడించవద్దని కోరారు.

• మంచిర్యాలలో బీసీ నేత గజెల్లి వెంకటయ్య నిరసన దీక్ష

మంచిర్యాల, ఆర్.కె న్యూస్: తెలంగాణలో బీసీలకు 42 శాతం రిజర్వేషన్లు అమలు చేసిన తర్వాతనే మున్సిపల్, కార్పొరేషన్ ఎన్నికలు నిర్వహించాలని డిమాండ్ చేస్తూ మంచిర్యాల జిల్లా కేంద్రంలోని మున్సిపల్ పార్కులో పద్మశాలి సంఘం, తెలంగాణ ఉద్యమకారుల ఐక్యవేదిక అధ్యక్షుడు, బీసీ నేత గజెల్లి వెంకటయ్య సోమవారం నిరసన దీక్ష చేపట్టారు. ఈ సందర్భంగా ఆయన మాట్లాడుతూ.. అధికారంలోకి వస్తే బీసీలకు 42 శాతం రిజర్వేషన్లు కల్పిస్తామని కామారెడ్డి డిక్లరేషన్‌లో హామీ ఇచ్చిన కాంగ్రెస్ ప్రభుత్వం, ఇప్పుడు కోర్టుల సాకుతో బీసీలను మోసం చేస్తోందని విమర్శించారు. గ్రామ పంచాయతీ ఎన్నికల్లో రిజర్వేషన్లను 17 శాతానికి తగ్గించి బీసీలకు రాజకీయంగా తీవ్ర అన్యాయం చేశారని ఆగ్రహం వ్యక్తం చేశారు. ముఖ్యమంత్రి రేవంత్ రెడ్డి తక్షణమే అఖిలపక్ష బృందాన్ని ప్రధాన మంత్రి వద్దకు తీసుకెళ్లి, బీసీ రిజర్వేషన్లను రాజ్యాంగంలోని 9వ షెడ్యూల్‌లో చేర్చేలా ఒత్తిడి తీసుకురావాలని డిమాండ్ చేశారు. బీసీల ఓట్లతో గద్దెనెక్కిన విషయాన్ని ప్రభుత్వం మరువకూడదని, రిజర్వేషన్ల అమలుపై స్పష్టత ఇచ్చిన తర్వాతే ఎన్నికలకు వెళ్లాలని ఆయన హెచ్చరించారు. ఈ కార్యక్రమంలో పలువురు బీసీ సంఘాల నాయకులు పాల్గొని సంఘీభావం తెలిపారు.

జీఎం (పర్సనల్) కిరణ్ కుమార్
శ్రీరాంపూర్ ఏరియా పర్సనల్ అధికారులతో వీడియో కాన్ఫరెన్స్ ద్వారా సమీక్ష

నస్పూర్, ఆర్.కె న్యూస్: సింగరేణి ఉద్యోగుల సంక్షేమానికి అధికారులు అత్యంత ప్రాధాన్యతనివ్వాలని, పెండింగ్‌లో ఉన్న సమస్యలను త్వరితగతిన పరిష్కరించాలని సంస్థ జనరల్ మేనేజర్ (పర్సనల్, వెల్ఫేర్ అండ్ సీఎస్ఆర్) జీవీ కిరణ్ కుమార్ అధికారులను ఆదేశించారు. సోమవారం కొత్తగూడెంలోని ప్రధాన కార్యాలయం నుండి వీడియో కాన్ఫరెన్స్ ద్వారా శ్రీరాంపూర్ ఏరియా పర్సనల్ విభాగం అధికారులతో ఆయన సమీక్షా సమావేశం నిర్వహించారు. ఈ సందర్భంగా శ్రీరాంపూర్ ఏరియాలో కారుణ్య నియామకాలు, పదవీ విరమణ పొందిన ఉద్యోగుల గ్రాట్యుటీ చెల్లింపులు తదితర అంశాలపై ఆయన సుదీర్ఘంగా చర్చించారు. ఈ సమీక్షా సమావేశంలో జీఎం కిరణ్ కుమార్ మాట్లాడుతూ.. శ్రీరాంపూర్ ఏరియాలో కారుణ్య నియామకాలకు సంబంధించి పెండింగ్‌లో ఉన్న దరఖాస్తులను త్వరగా పరిశీలించి అర్హులకు న్యాయం చేయాలని సూచించారు. అలాగే, సాధారణ పదవీ విరమణ పొందిన వారితో పాటు, మెడికల్ ఇన్వాలిడేషన్ అయిన ఉద్యోగుల గ్రాట్యుటీ కేసులను ఎటువంటి జాప్యం లేకుండా పరిష్కరించాలన్నారు. అసిస్టెంట్ లేబర్ కమిషనర్ కార్యాలయం వద్ద పెండింగ్‌లో ఉన్న కేసులను కొలిక్కి తీసుకురావడానికి సరైన విధివిధానాలను రూపొందించుకొని ముందుకు వెళ్లాలని అధికారులకు దిశానిర్దేశం చేశారు. పర్సనల్ విభాగానికి సంబంధించిన ప్రతి పనిని గడువులోగా పూర్తి చేయాలని, ఉద్యోగుల సంక్షేమమే లక్ష్యంగా ప్రతి అధికారి బాధ్యతగా పనిచేయాలని అన్నారు. ఈ కార్యక్రమంలో డీజీఎం (పర్సనల్) ఎస్. అనిల్ కుమార్, డీవై పీఎం ఎం. రాజేష్, సీనియర్ పీవో ఎస్. సురేందర్, ప్రశాంత్, గనుల సంక్షేమ అధికారులు తదితరులు పాల్గొన్నారు.

• శ్రీరాంపూర్ ఏరియా అధికారులతో జీఎం మునిగంటి శ్రీనివాస్ సమీక్ష
• గ్రేడ్ తగ్గితే సంస్థకు భారీ నష్టం వాటిల్లే ప్రమాదం

నస్పూర్, ఆర్.కె న్యూస్: సింగరేణి సంస్థ అభివృద్ధిలో బొగ్గు నాణ్యత కీలక పాత్ర పోషిస్తుందని, వినియోగదారులకు అత్యున్నత ప్రమాణాలతో కూడిన బొగ్గును సరఫరా చేయాల్సిన బాధ్యత ప్రతి అధికారిపై ఉందని శ్రీరాంపూర్ ఏరియా జనరల్ మేనేజర్ మునిగంటి శ్రీనివాస్ స్పష్టం చేశారు. సోమవారం శ్రీరాంపూర్ ఏరియా జనరల్ మేనేజర్ కార్యాలయంలోని సమావేశ మందిరంలో ఏరియా ఉన్నతాధికారులతో బొగ్గు ఉత్పత్తి, ఉత్పాదకత, బొగ్గు నాణ్యత అంశాలపై ఆయన విస్తృత స్థాయి సమీక్షా సమావేశాన్ని నిర్వహించారు. ఈ సందర్భంగా జనరల్ మేనేజర్ మాట్లాడుతూ, మార్కెట్‌లో నాణ్యమైన బొగ్గుకు విపరీతమైన డిమాండ్ ఉన్నందున, బొగ్గు ఉత్పత్తి నాణ్యతా ప్రమాణాలు పాటించాలని ఆదేశించారు. గనుల నుండి వెలికితీసే బొగ్గు గ్రేడ్ తగ్గకుండా కట్టుదిట్టమైన చర్యలు తీసుకోవాలని సూచించారు. ఒకవేళ బొగ్గు గ్రేడ్ తగ్గినట్లయితే సంస్థకు లక్షలాది రూపాయల ఆదాయ గండి పడుతుందని, ఇది సంస్థ ఆర్థిక స్థితిగతులపై ప్రభావం చూపుతుందని హెచ్చరించారు. రవాణా చేసే బొగ్గులో తుంటలు, షేల్, ఐరన్ వంటి ఇతర అనవసర పదార్థాలు కలవకుండా క్షేత్రస్థాయిలో నిరంతరం పర్యవేక్షించాలని అధికారులను కోరారు. గనుల విభాగంలోని వివిధ శాఖల అధికారులు ఒకరికొకరు సమన్వయంతో పని చేస్తూ నాణ్యత నియంత్రణకు ప్రాధాన్యత ఇవ్వాలన్నారు. ఏరియాకు నిర్దేశించిన బొగ్గు ఉత్పత్తి లక్ష్యాలను నిర్ణీత సమయంలోగా చేరుకోవడానికి ప్రతి ఉద్యోగి మరియు అధికారి అంకితభావంతో కృషి చేయాలని పిలుపునిచ్చారు. ఈ సమావేశంలో బెల్లంపల్లి రీజియన్ క్వాలిటీ జనరల్ మేనేజర్ వీరభద్ర రావు, ఎస్వోటు జీఎం ఎన్. సత్యనారాయణ, ఏరియా ఇంజనీర్ టి. రమణ, ఏజెంట్లు కుర్మ రాజేందర్, ఎన్. శ్రీధర్, జి. రవికుమార్, ప్రాజెక్ట్ ఆఫీసర్లు ఏ. వెంకటేశ్వర రెడ్డి, చిప్ప వెంకటేశ్వర్లు, క్వాలిటీ మేనేజర్ కె. వెంకటేశ్వర్ రెడ్డి, ఏరియా రక్షణాధికారి విజయకుమార్, డీజీఎంలు ఆనంద్ కుమార్, రవీందర్, మల్లయ్య, అన్ని గనుల మేనేజర్లు, గ్రూప్ ఇంజనీర్లు ఇతర అధికారులు తదితరులు పాల్గొన్నారు.

• అన్ని ఏరియాల జీఎం లకు డైరెక్టర్ సూచన

నస్పూర్, ఆర్.కె న్యూస్: సింగరేణి వ్యాప్తంగా అన్ని ఏరియాల్లో బొగ్గు నాణ్యతా ప్రమాణాలకు అత్యధిక ప్రాధాన్యతనివ్వాలని, తగిన గ్రేడ్ బొగ్గు సరఫరాకు అన్ని రకాల చర్యలు తీసుకోవాలని సంస్థ డైరెక్టర్ (ప్రాజెక్ట్స్ అండ్ ప్లానింగ్) కె. వెంకటేశ్వర్లు అన్ని ఏరియాల జనరల్ మేనేజర్లను ఆదేశించారు. కొత్తగూడెం కార్పోరేట్ కార్యాలయం నుండి ఆయన ఏరియాల జనరల్ మేనేజర్లు మరియు క్వాలిటీ విభాగం అధికారులతో సోమవారం ప్రత్యేక సమీక్షను నిర్వహించారు. ఈ సందర్భంగా ఆయన మాట్లాడుతూ నేడు బొగ్గు మార్కెట్ లో నాణ్యతకు అధిక ప్రాధాన్యత ఉందని, నాణ్యతా ప్రమాణాలు లేని బొగ్గును వినియోగదారులు స్వీకరించడం లేదని, కనుక బొగ్గు ఉత్పత్తి ప్రదేశం నుంచి మొదలుకొని వినియోగదారులకు పంపించే లోడింగ్ ప్రాంతం వరకు విధులు నిర్వహిస్తున్న అధికారులు, ఉద్యోగులు ప్రతి ఒక్కరూ నాణ్యతపై ప్రత్యేక దృష్టి సారించాలని ఆయన ఆదేశించారు. నాణ్యత ప్రమాణాల పాటింపుకు వివిధ ఏరియాల్లో తీసుకుంటున్న చర్యలపై సమీక్షించారు. ఇంకా తీసుకోవాల్సిన జాగ్రత్తలను వివరించారు. ఈ సమావేశంలో ఎగ్జిక్యూటివ్ డైరెక్టర్ (కోల్ మూమెంట్) బి. వెంకన్న, జనరల్ మేనేజర్ (సీపీపీ) ఎ. మనోహర్, జనరల్ మేనేజర్ (కోఆర్డినేషన్, మార్కెటింగ్) టి. శ్రీనివాస్, అన్ని ఏరియాల జనరల్ మేనేజర్లు పాల్గొన్నారు.

శ్రీరాంపూర్ ఏరియాలో సేఫ్టీ మేనేజ్‌మెంట్ శిక్షణ శిబిరం ప్రారంభం
పది బ్యాచ్‌ల్లో 500 మంది కార్మికులకు శిక్షణ
ఏరియా జనరల్ మేనేజర్ మునిగంటి శ్రీనివాస్

నస్పూర్, ఆర్.కె న్యూస్: సింగరేణి సంస్థలో రక్షణతో కూడిన ఉత్పాదకత సాధించడమే ప్రధాన లక్ష్యమని, ప్రతి ఉద్యోగి రక్షణ సూత్రాలపై పూర్తి అవగాహన కలిగి ఉండాలని శ్రీరాంపూర్ ఏరియా జనరల్ మేనేజర్ మునిగంటి శ్రీనివాస్ పిలుపునిచ్చారు. శ్రీరాంపూర్ ఏరియాలోని వివిధ గనుల్లో ఐదు సంవత్సరాల లోపు సర్వీసు కలిగిన జనరల్ అసిస్టెంట్లు, బదిలీ వర్కర్లకు ఇంప్లిమెంటేషన్ ఆఫ్ సేఫ్టీ మేనేజ్మెంట్ ప్లాన్ అంశంపై సోమవారం రెండు రోజుల శిక్షణ శిబిరాన్ని వృత్తి శిక్షణ కేంద్రంలో శ్రీరాంపూర్ జీఎం ముఖ్య అతిథిగా హాజరై ప్రారంభించారు. ఈ సందర్భంగా జనరల్ మేనేజర్ మాట్లాడుతూ.. సంస్థలో కొత్తగా చేరిన ఉద్యోగులు క్షేత్రస్థాయిలో పని చేసేటప్పుడు ప్రతి దశలోనూ అత్యంత జాగ్రత్తగా వ్యవహరించాలని సూచించారు. “రక్షణే ప్రథమం – రక్షణ ఎల్లప్పుడూ” అనే నినాదాన్ని ప్రతి ఒక్కరూ స్ఫూర్తిగా తీసుకోవాలని కోరారు. రక్షణ చర్యలను నిరంతరం పాటించడం ద్వారా గనుల్లో ప్రమాదాలను పూర్తిగా నివారించవచ్చని, ఇందుకు ఇటువంటి శిక్షణ తరగతులు ఎంతగానో దోహదపడతాయని పేర్కొన్నారు. శిక్షణలో నేర్చుకున్న అంశాలను పని ప్రదేశాల్లో సమర్థవంతంగా అమలు చేసి, తమ నైపుణ్యాన్ని పెంపొందించుకోవాలని కార్మికులకు దిశానిర్దేశం చేశారు. శ్రీరాంపూర్ ఏరియాలో ఈ శిక్షణ కార్యక్రమాలు జనవరి 05 నుండి ఫిబ్రవరి 05 వరకు నెల రోజుల పాటు కొనసాగుతాయని జనరల్ మేనేజర్ వెల్లడించారు. మొత్తం పది బ్యాచ్‌లుగా ఈ శిక్షణను విభజించామని, ప్రతి బ్యాచ్‌లో సుమారు 50 మంది ఉద్యోగులకు శిక్షణ ఇస్తామని వివరించారు. ఈ శిక్షణా తరగతుల ద్వారా యువ కార్మికులకు గనుల రక్షణపై లోతైన అవగాహన కలుగుతుందని ఆయన ఆశాభావం వ్యక్తం చేశారు. ఈ కార్యక్రమంలో బెల్లంపల్లి రీజియన్ సేఫ్టీ జీఎం రఘుకుమార్, ఎస్వోటు ఎన్. సత్యనారాయణ, గుర్తింపు సంఘం అసిస్టెంట్ బ్రాంచ్ సెక్రటరీ మోత్కూరి కొమరయ్య, ఏరియా రక్షణాధికారి విజయ్ కుమార్, వృత్తి శిక్షణ కేంద్రం మేనేజర్ కమ్రుద్దీన్, సీమ్ టార్ డీజీఎం విజయ కుమార్ తదితరులు పాల్గొన్నారు.