9 January 2026

యువతకు ఐటీ నైపుణ్యాలు మెండుగా ఉండాలి: ఆర్డీవో జి. శ్రీనివాస్ రావు

మంచిర్యాల, ఆర్.కె న్యూస్: స్థానిక యువతకు అధునాతన సాంకేతిక పరిజ్ఞానాన్ని చేరువ చేస్తూ మంచిర్యాల జిల్లా కేంద్రంలోని చున్నంబట్టి వాడలో నూతనంగా నెలకొల్పిన ‘నెక్స్ ఐరా’ ఐటీ కంపెనీ శుక్రవారం ఘనంగా ప్రారంభమైంది. మంచిర్యాల ఆర్డీవో జి. శ్రీనివాస్ రావు, రాష్ట్ర పర్యావరణ వాల్టా చట్టం సభ్యులు, రాష్ట్రపతి అవార్డు గ్రహీత గుండేటి యోగేశ్వర్, ఐజా ఇంజనీరింగ్ కళాశాల ప్రిన్సిపల్ ఎం. తిరుపతిరెడ్డి, టీఎన్జీవోస్ అధ్యక్షులు గడియారం శ్రీహరిలతో కలిసి ఈ కంపెనీని ప్రారంభించారు. జిల్లా కేంద్రంలో ఇలాంటి ఐటీ సంస్థ ఏర్పాటు కావడం యువత ఉపాధి అవకాశాలకు, నైపుణ్యాల అభివృద్ధికి ఒక మంచి పరిణామమని వారు అభిప్రాయపడ్డారు.

ఈ సందర్భంగా ఆర్డీవో శ్రీనివాస్ రావు మాట్లాడుతూ.. మంచిర్యాల వంటి ప్రాంతంలో ఐటీ కంపెనీ సేవలు ప్రారంభించడం అభినందనీయమన్నారు. సమకాలీన యువత సాఫ్ట్‌వేర్ నైపుణ్యాలతో పాటు ఆర్టిఫిషియల్ ఇంటెలిజెన్స్ పై పట్టు సాధించాల్సిన అవసరం ఉందని పేర్కొన్నారు. ఈ సంస్థను స్థాపించిన మేనేజింగ్ డైరెక్టర్లు ఎం. శరత్ చంద్ర, సిహెచ్. రఘువరన్ లను ఆయన ప్రత్యేకంగా అభినందించారు.

ప్రముఖ సైకాలజిస్ట్, మోటివేషనల్ స్పీకర్ గుండేటి యోగేశ్వర్ మాట్లాడుతూ.. జీవితంలో ఎదగడానికి ఆత్మవిశ్వాసంతో పాటు సాంకేతిక పరిజ్ఞానం తోడవ్వాలని సూచించారు. ఏఐ టెక్నాలజీని యువత సానుకూల మార్గంలో ఉపయోగించుకోవాలని, ‘నెక్స్ ఐరా’ యువతకు దిక్సూచిగా నిలవాలని ఆకాంక్షించారు. తన విద్యార్థి శరత్ చంద్ర స్వయంగా ఒక సాఫ్ట్‌వేర్ సంస్థను స్థాపించడం గర్వకారణమని ఐజా కళాశాల ప్రిన్సిపల్ తిరుపతిరెడ్డి సంతోషం వ్యక్తం చేశారు.

కంపెనీ లక్ష్యాలను మేనేజింగ్ డైరెక్టర్ శరత్ చంద్ర వివరిస్తూ.. మంచిర్యాల జిల్లాతో పాటు చుట్టుపక్కల ప్రాంతాల విద్యార్థులకు, నిరుద్యోగ యువతకు ఐటీ శిక్షణ, సేవలను అందించడమే తమ ప్రధాన ఉద్దేశమని తెలిపారు. ఈ కార్యక్రమంలో ప్రభుత్వ మెడికల్ కాలేజీ ప్రోఫెసర్ డా. రాజేష్, సి.వి. రామన్ కాలేజీ ప్రిన్సిపల్ నరసయ్య, ఎల్ఐసీ అధికారులు ఎం. రాందాస్, రాజేశం, సంస్థ ప్రతినిధులు సదన్, పూర్ణిమ, మనీషా, గాయత్రి తదితరులు పాల్గొన్నారు.

ఏడో ఏడాది విజయవంతంగా చీరల పంపిణీ
ప్రజా సేవకే మా ప్రాధాన్యత: కొక్కిరాల సురేఖ

నస్పూర్, ఆర్.కె న్యూస్: మంచిర్యాల నియోజకవర్గ ఆడబిడ్డలకు సంక్రాంతి పండుగ వేళ గొప్ప కానుక అందింది. కొక్కిరాల రఘుపతి రావు చారిటబుల్ ట్రస్ట్ ద్వారా శాసనసభ్యులు కొక్కిరాల ప్రేమ్ సాగర్ రావు ఆధ్వర్యంలో శుక్రవారం శ్రీరాంపూర్ కాలనీ ప్రగతి స్టేడియంలో చీరల పంపిణీ కార్యక్రమం వైభవంగా జరిగింది. మంచిర్యాల కార్పొరేషన్ పరిధిలోని శ్రీరాంపూర్ కాలనీ ప్రగతి స్టేడియం, కొత్త నాగార్జున కాలనీ ప్రాణహిత స్టేడియంలో స్థానిక మహిళలకు ఎమ్మెల్యే సతీమణి, జిల్లా మాజీ డీసీసీ అధ్యక్షురాలు కొక్కిరాల సురేఖ ఈ చీరలను అందజేశారు.

ఈ సందర్భంగా కొక్కిరాల సురేఖ మాట్లాడుతూ.. 2018 సంవత్సరంలో ప్రారంభించిన ఈ చీరల పంపిణీ కార్యక్రమం ఈ ఏడాదితో విజయవంతంగా ఏడవ వసంతానికి చేరుకుందని తెలిపారు. గత బతుకమ్మ పండుగ సమయంలోనే ఈ చీరలను అందించాలని భావించినప్పటికీ, ఎమ్మెల్యే ప్రేమ్ సాగర్ రావు అనారోగ్యానికి గురికావడంతో అది సాధ్యపడలేదని వివరించారు. ప్రస్తుతం ఆయన ఆరోగ్యం కుదుటపడటంతో, సంక్రాంతి పండుగ పురస్కరించుకుని తన అక్కచెల్లెళ్లకు ఈ కానుకలు అందజేయాలని ఆయన కోరినట్లు వెల్లడించారు. తాము అధికారంలో లేనప్పుడు కూడా ట్రస్ట్ ద్వారా అనేక సేవా కార్యక్రమాలు చేపట్టామని ఆమె గుర్తుచేశారు.

నియోజకవర్గ అభివృద్ధికి ప్రేమ్ సాగర్ రావు కట్టుబడి ఉన్నారని, ముఖ్యంగా విద్య, వైద్యం, వ్యవసాయ రంగాలకు అత్యధిక ప్రాధాన్యత ఇస్తున్నారని సురేఖ పేర్కొన్నారు. ఇందులో భాగంగా మంచిర్యాల పట్టణంలో 320 కోట్ల రూపాయల వ్యయంతో 600 పడకల అత్యాధునిక ఆసుపత్రి నిర్మాణానికి శ్రీకారం చుట్టినట్లు వెల్లడించారు. అలాగే లక్షెట్టిపేటలో కార్పొరేట్ పాఠశాలలకు దీటుగా ప్రభుత్వ పాఠశాల భవనాన్ని నిర్మించామని తెలిపారు. పుట్టిన గడ్డ రుణం తీర్చుకోవాలనే తపనతోనే ప్రేమ్ సాగర్ రావు రాజకీయాల్లోకి వచ్చారని, ప్రజల సేవలో ఎప్పుడూ ముందుంటారని స్పష్టం చేశారు. ఆడబిడ్డలందరూ సంక్రాంతి వేడుకలను సంతోషంగా జరుపుకోవాలని కోరుతూ అందరికీ పండుగ శుభాకాంక్షలు తెలియజేశారు.

ఈ కార్యక్రమంలో కార్పొరేషన్ కాంగ్రెస్ పార్టీ నాయకులు, మహిళా ప్రతినిధులు, యువజన కాంగ్రెస్ నాయకులు, కార్యకర్తలు, స్థానిక మహిళలు పెద్ద ఎత్తున పాల్గొన్నారు.

రైతు దంపతులకు ఘన సన్మానం; సంస్కృతిని చాటిన విద్యార్థులు

మంచిర్యాల, ఆర్.కె న్యూస్: జిల్లా కేంద్రంలోని శ్రీ చైతన్య టెక్నో స్కూల్ బ్రాంచ్ 1 ఆవరణలో శుక్రవారం సంక్రాంతి పండుగను పురస్కరించుకుని ముందస్తు సంబరాలు వైభవంగా జరిగాయి. గ్రామీణ సంస్కృతి, సంప్రదాయాలను ప్రతిబింబించేలా నిర్వహించిన ఈ కార్యక్రమానికి ఏజీఎం అరవింద రెడ్డి ముఖ్య అతిథిగా విచ్చేశారు. విద్యార్థులకు మన పండుగల విశిష్టతను, రైతు ప్రాముఖ్యతను తెలియజేయాలనే ఉద్దేశంతో ఈ వేడుకలను ఏర్పాటు చేశారు.

పండుగ వేడుకల్లో భాగంగా సమాజానికి వెన్నెముకైన రైతును గౌరవించుకోవడం విశేషం. కార్యక్రమంలో ఒక రైతు దంపతులను ముఖ్య అతిథి చేతుల మీదుగా ఘనంగా సన్మానించారు. ఈ సందర్భంగా ఏజీఎం అరవింద రెడ్డి మాట్లాడుతూ.. సంక్రాంతి పండుగ మన సంస్కృతిలో అంతర్భాగమని, పంట చేతికొచ్చే వేళ రైతు జరుపుకునే గొప్ప పండుగ అని కొనియాడారు. చిన్నారులు సంప్రదాయ దుస్తుల్లో వేడుకలకు హాజరై పండుగ వాతావరణాన్ని తీసుకువచ్చారని ప్రశంసించారు. విద్యార్థుల కోలాహలంతో పాఠశాల ప్రాంగణమంతా పండుగ శోభను సంతరించుకుంది.

ఈ కార్యక్రమంలో పాఠశాల ప్రిన్సిపల్ సంజీవ్ కుమార్, హైస్కూల్ కోఆర్డినేటర్ నాగరాజు, ప్రైమరీ కో-ఆర్డినేటర్లు జయశ్రీ, రోజా, ప్రైమరీ ప్రిన్సిపల్ స్రవంతి, ఉపాధ్యాయ బృందం, సిబ్బంది పాల్గొన్నారు.