20 January 2026

• హక్కుల సాధనకు కృషి చేస్తామని యాదగిరి సత్తయ్య వెల్లడి

నస్పూర్, ఆర్.కె న్యూస్: శ్రీరాంపూర్ ప్రగతి స్టేడియంలో మంగళవారం ఏరియా ఉపాధ్యక్షుడు నాతాడి శ్రీధర్ రెడ్డి అధ్యక్షతన జరిగిన కార్యక్రమంలో వివిధ యూనియన్ల నుంచి పలువురు సెక్యూరిటీ విభాగం ఉద్యోగులు బిఎంఎస్‌లో చేరారు. సింగరేణి కోల్ మైన్స్ కార్మిక సంఘ్-బిఎంఎస్ అధ్యక్షుడు యాదగిరి సత్తయ్య ముఖ్య అతిథిగా హాజరై కార్మికులకు కండువాలు కప్పి ఆహ్వానించారు. సింగరేణి సంస్థ ఆస్తులను కంటికి రెప్పలా కాపాడుతున్న సెక్యూరిటీ ఉద్యోగులు సైనికులతో సమానమని ఆయన కొనియాడారు. సుదీర్ఘ కాలంగా పెండింగ్‌లో ఉన్న సెక్యూరిటీ విభాగం డెసిగ్నేషన్ మార్పు కోసం తమ సంఘం గట్టిగా కృషి చేస్తుందని హామీ ఇచ్చారు. కార్మికులకు ఆర్థిక ప్రయోజనం చేకూర్చేలా కొత్త క్యాడర్ స్కీమ్ ఏర్పాటు చేయాలని డిమాండ్ చేశారు. అర్హులైన ఉద్యోగులకు సీనియర్ సెక్యూరిటీ ఆఫీసర్లుగా పదోన్నతులు కల్పించే అంశాన్ని యాజమాన్యం దృష్టికి తీసుకెళ్తామన్నారు. సింగరేణి విస్తరణకు ఆరు జిల్లాల్లో అపారమైన బొగ్గు నిల్వలు ఉన్నాయని, నూతన గనుల అన్వేషణ ద్వారానే సంస్థ పురోగతి సాధ్యమని పేర్కొన్నారు. సింగరేణిని నిర్వీర్యం చేసే కుట్రలను కార్మికులు సమైక్యంగా తిప్పికొట్టాలని పిలుపునిచ్చారు. కార్మిక సంక్షేమం, సామాజిక భద్రత కోసం బిఎంఎస్ నిరంతరం పోరాడుతుందని స్పష్టం చేశారు. ఈ కార్యక్రమంలో ఏరియా కార్యదర్శి రాగం రాజేందర్, పిట్ కార్యదర్శి కొమ్మ బాపు, జాయింట్ సెక్రెటరీలు బోయిన మల్లేష్, కట్టుకూరి సతీష్, రాజారాం కిరణ్, ఆర్గనైజింగ్ సెక్రటరీ జల్ల తిరుపతి, బుర్ర అరుణ్ కుమార్ గౌడ్ తదితరులు పాల్గొన్నారు.

ఉద్యోగుల సమస్యలను ముఖ్యమంత్రి దృష్టికి తీసుకెళ్తామని హామీ

మంచిర్యాల, ఆర్.కె న్యూస్: టీఎన్జీవో జిల్లా శాఖ ఆధ్వర్యంలో రూపొందించిన నూతన డైరీ, క్యాలెండర్‌ను రాష్ట్ర గనులు, కార్మిక శాఖ మంత్రి గడ్డం వివేక్ వెంకటస్వామి మంగళవారం ఆవిష్కరించారు. మంచిర్యాలలోని తన నివాసంలో జిల్లా అధ్యక్షుడు గడియారం శ్రీహరి నేతృత్వంలో జరిగిన ఈ కార్యక్రమంలో మంత్రి పాల్గొని ప్రతులను విడుదల చేశారు. ఈ సందర్భంగా ఉద్యోగులు ఎదుర్కొంటున్న పలు దీర్ఘకాలిక సమస్యలపై సంఘం ప్రతినిధులు మంత్రితో చర్చించారు.

ఉద్యోగులకు రావాల్సిన పెండింగ్ డీఏలు, పీఆర్సీ బకాయిలను తక్షణమే విడుదల చేయాలని గడియారం శ్రీహరి కోరారు. మంచిర్యాల మున్సిపాలిటీని కార్పొరేషన్‌గా అప్‌గ్రేడ్ చేసిన నేపథ్యంలో, ఇక్కడి ఉద్యోగులకు 17 శాతం హెచ్‌ఆర్‌ఏ వర్తింపజేయాలని విజ్ఞప్తి చేశారు. దీనిపై స్పందించిన మంత్రి వివేక్ వెంకటస్వామి మాట్లాడుతూ.. ఉద్యోగుల సమస్యలను రాష్ట్ర ముఖ్యమంత్రి ఎనుముల రేవంత్ రెడ్డి దృష్టికి తీసుకెళ్లి పరిష్కారానికి కృషి చేస్తానని హామీ ఇచ్చారు. టీఎన్జీవో రూపొందించిన డైరీలోని అంశాలు ఉద్యోగుల విధి నిర్వహణలో ఎంతో ఉపయోగకరంగా ఉంటాయని ప్రశంసించారు.

ఈ కార్యక్రమంలో టీఎన్జీవో జిల్లా కార్యదర్శి భూముల రామ్మోహన్, కేంద్ర సంఘం కార్యదర్శి పొన్న మల్లయ్య, అసోసియేట్ అధ్యక్షుడు శ్రీపతి బాపురావు, కోశాధికారి సతీష్ కుమార్, ఉపాధ్యక్షులు శ్రీనివాస్, రాంకుమార్, తిరుపతి, అంజయ్య, కేజియా రాణి, పద్మలత, నరేందర్, శ్రీధర్ రాజు, సంయుక్త కార్యదర్శులు సునీత, ప్రభు, సురేందర్, రోశయ్య పాల్గొన్నారు. వీరితో పాటు ఆర్గనైజింగ్ సెక్రటరీ శ్రావణ్, పబ్లిసిటీ సెక్రటరీ యూసుఫ్, మంచిర్యాల యూనిట్ అధ్యక్షుడు నాగుల గోపాల్, కార్యదర్శి అజయ్, ప్రశాంత్, వివిధ యూనిట్ల అధ్యక్షులు గొల్ల శ్రీనివాస్, వెంకటేష్, సుమన్, అభిషేక్, పద్మనాభం, జిల్లా కార్యవర్గ సభ్యులు పద్మజ, రాజేందర్, కుమార్, మోసిన్, ప్రణవనందు, సరిత తదితరులు హాజరయ్యారు.

• ప్రగతి స్టేడియంలో పనులను పరిశీలించిన శ్రీరాంపూర్ జీఎం మునిగంటి శ్రీనివాస్

నస్పూర్, ఆర్.కె న్యూస్: శ్రీరాంపూర్ కాలనీలోని ప్రగతి స్టేడియంలో ఈ నెల 26న నిర్వహించనున్న 77వ గణతంత్ర దినోత్సవ వేడుకల ఏర్పాట్లను ఏరియా జనరల్ మేనేజర్ మునిగంటి శ్రీనివాస్ మంగళవారం క్షేత్రస్థాయిలో పరిశీలించారు. ఉత్సవాలకు సంబంధించిన ముందస్తు పనులన్నీ వీలైనంత త్వరగా పూర్తి చేయాలని అధికారులను ఆదేశించారు. వేడుకల నిర్వహణలో ఎలాంటి లోటుపాట్లు లేకుండా ఆయా విభాగాల అధిపతులు తగిన చర్యలు తీసుకోవాలని సూచించారు. ఈ సందర్భంగా ఆయన మాట్లాడుతూ, గణతంత్ర దినోత్సవాల్లో పాల్గొనే వారందరికీ అవసరమైన మౌలిక సదుపాయాలు కల్పించాలని అధికారులకు దిశానిర్దేశం చేశారు. వేడుకల్లో భాగంగా వివిధ గనుల్లో ఎంపిక చేసిన ఉత్తమ ఉద్యోగులకు సన్మానం, మార్చ్ ఫాస్ట్, సాంస్కృతిక కార్యక్రమాలు ఘనంగా నిర్వహిస్తామని తెలిపారు. ఈ వేడుకల్లో శ్రీరాంపూర్ ఏరియా ఉద్యోగులు, వారి కుటుంబ సభ్యులు, కాలనీవాసులు పెద్ద ఎత్తున పాల్గొని విజయవంతం చేయాలని కోరారు. ఈ కార్యక్రమంలో ఎస్వోటు జీఎం ఎన్. సత్యనారాయణ, డీజీఎంలు ఆనంద్ కుమార్, రవీందర్, ఏబీ హరి నారాయణ, క్వాలిటీ మేనేజర్ కె. వెంకటేశ్వర రెడ్డి, డీవైపీఎం ఎం. రాజేష్, సెక్యూరిటీ ఆఫీసర్ జక్కా రెడ్డి పాల్గొన్నారు.