31 January 2026

• సీట్ల కేటాయింపుపై బాల్క సుమన్ హామీ

రామకృష్ణపూర్, ఆర్.కె న్యూస్: స్థానిక పురపాలక ఎన్నికల వేళ రాజకీయ సమీకరణాలు వేగంగా మారిపోయాయి. కాంగ్రెస్‌తో ఉన్న పొత్తును తెంచుకున్న సిపిఐ నేతలు శనివారం బిఆర్ఎస్‌తో చేతులు కలిపారు. పొత్తులో భాగంగా సిపిఐకి కేటాయించాల్సిన వార్డులను ఇవ్వకపోగా, స్థానికంగా పార్టీకి ఉనికి లేదని కాంగ్రెస్ నాయకులు అవమానకరంగా మాట్లాడటంతో ఈ నిర్ణయం తీసుకున్నట్లు సిపిఐ నాయకులు వెల్లడించారు. కాంగ్రెస్‌తో కలిసి సాగడం సాధ్యం కాదని భావించిన సిపిఐ నాయకత్వం, బిఆర్ఎస్‌తో కలిసి ఎన్నికల బరిలో దిగాలని నిశ్చయించుకున్నట్లు వాసిరెడ్డి సీతారామయ్య తెలిపారు. ఈ సందర్భంగా చెన్నూర్ మాజీ శాసనసభ్యుడు, బిఆర్ఎస్‌ జిల్లా అధ్యక్షులు బాల్క సుమన్ మాట్లాడుతూ సిపిఐకి తగిన గౌరవం కల్పిస్తామని, సముచితంగా సీట్లు కేటాయిస్తామని స్పష్టం చేశారు. బిఆర్ఎస్-సిపిఐ కూటమి ప్రజా సమస్యల అజెండాతో ఎన్నికలకు వెళ్తుందని, ప్రజల ఆదరణతో విజయం సాధిస్తామని ధీమా వ్యక్తం చేశారు. ఈ సమావేశంలో కలవేన శంకర్, లక్ష్మణ్, మిట్టపల్లి శీను, అక్బర్ అలీ సహా రెండు పార్టీల ముఖ్య కార్యకర్తలు పాల్గొన్నారు.

• పార్టీ కండువా కప్పి ఆహ్వానించిన మాజీ డీసీసీ అధ్యక్షురాలు కొక్కిరాల సురేఖ

మంచిర్యాల, ఆర్.కె న్యూస్: నియోజకవర్గంలో జరుగుతున్న అభివృద్ధి పనులకు ఆకర్షితులై ఇతర పార్టీల నాయకులు కాంగ్రెస్‌ వైపు చూస్తున్నారని మాజీ డీసీసీ అధ్యక్షురాలు కొక్కిరాల సురేఖ పేర్కొన్నారు. శనివారం మంచిర్యాల మున్సిపల్ కార్పొరేషన్ పరిధిలోని 54వ డివిజన్ (గాంధీ నగర్) కు చెందిన బీఆర్ఎస్ సీనియర్ నాయకులు పార్టీలో చేరారు. ఎమ్మెల్యే కొక్కిరాల ప్రేమ్ సాగర్ రావు నియోజకవర్గంలో చేపడుతున్న అభివృద్ధి కార్యక్రమాలకు మద్దతుగా ఈ నిర్ణయం తీసుకున్నట్లు వారు ప్రకటించారు. మాజీ మున్సిపల్ వైస్ చైర్మన్ సల్ల మహేష్ ఆధ్వర్యంలో జరిగిన ఈ కార్యక్రమంలో నాయకులకు పార్టీ కండువా కప్పి సాదరంగా ఆహ్వానం పలికారు. ప్రజా సంక్షేమమే ధ్యేయంగా ప్రభుత్వం పనిచేస్తోందని కొక్కిరాల సురేఖ తెలిపారు. ప్రేమ్ సాగర్ రావు నాయకత్వంలో నియోజకవర్గం అన్ని రంగాల్లో పురోగతి సాధిస్తోందని వివరించారు. ప్రభుత్వ పథకాలు ప్రజలకు చేరవేయడంలో తామంతా భాగస్వాములమవుతామని వారు ఈ సందర్భంగా స్పష్టం చేశారు. స్థానిక సమస్యల పరిష్కారంలో కాంగ్రెస్ పార్టీ చూపుతున్న చొరవ తమను ఎంతగానో ప్రభావితం చేసిందని వెల్లడించారు.

చెన్నూరు, ఆర్.కె న్యూస్: మంచిర్యాల జిల్లా చెన్నూరు మున్సిపాల్టీలో నామినేషన్ల ఘట్టం ముగిసింది. చివిరోజు అన్ని పార్టీల నాయకులు తమ అభ్యర్థుల చేత నేమినేశండ్లను దాఖలు చేయించారు. ముఖ్యంగా కాంగ్రెస్, బీఅర్ఎస్, బీజేపీ పార్టీలకు సంబంధించిన అభ్యర్థులు పెద్దమొత్తంలో నామినేషన్లు దాఖలు చేశారు. ఈ పార్టీల్లోని రెబల్ అభ్యర్థులు కూడా నామినేషన్ దాఖలు చేసినట్లు గుసగుసలు వినిపిస్తున్నాయి.  చెన్నూరు మున్సిపాల్టీలో 18 వార్డులు ఉండగా ఆల్ ఇండియా ఫార్వర్డ్ బ్లాక్ పార్టీకి సంబందించిన అభ్యర్థులు అన్ని వార్డుల్లో పోటీ చేసినట్లు సమాచారం. చెన్నూరు మున్సిపాల్టీ పీఠం ఎవరు కైవసం చేసుకుంటారో చూడాల్సి ఉంది.