3 February 2026

🔴 మహా ప్రస్థానం కమిటీ సభ్యుడి నివాసానికి వెళ్లి పరామర్శించిన కొక్కిరాల ప్రేమ్ సాగర్ రావు

మంచిర్యాల, ఆర్.కె న్యూస్: మంచిర్యాల మహా ప్రస్థానం కమిటీ సభ్యుడు అప్పాల శ్రీధర్ (రాము) అకాల మరణం బాధాకరమని, వారి కుటుంబ సభ్యులు ధైర్యంగా ఉండాలని మంచిర్యాల ఎమ్మెల్యే కొక్కిరాల ప్రేమ్ సాగర్ రావు అన్నారు. ఇటీవల అనారోగ్యంతో మరణించిన శ్రీధర్ నివాసానికి మంగళవారం ఆయన వెళ్లారు. అక్కడ మృతుని చిత్రపటానికి పూలమాల వేసి నివాళులర్పించారు. కుటుంబ సభ్యులతో మాట్లాడి వారి యోగక్షేమాలను అడిగి తెలుసుకున్నారు. శోకతప్త హృదయంతో ఉన్న వారికి మనోధైర్యాన్ని కల్పించారు. మహా ప్రస్థానం కమిటీలో సభ్యునిగా శ్రీధర్ అందించిన సేవలు మరువలేనివని ఈ సందర్భంగా కొనియాడారు. సామాజిక కార్యక్రమాల్లో చురుగ్గా పాల్గొనే వ్యక్తిని కోల్పోవడం మంచిర్యాల ప్రాంతానికి తీరని లోటు అని ఆవేదన వ్యక్తం చేశారు. శ్రీధర్ ఆత్మకు శాంతి చేకూరాలని ఆ భగవంతుడిని ప్రార్థించారు. ఈ పరామర్శ కార్యక్రమంలో కాంగ్రెస్ నాయకులు, కార్యకర్తలు తదితరులు పాల్గొన్నారు.

🛑 శ్రీరాంపూర్ జీఎం మునిగంటి శ్రీనివాస్

నస్పూర్, ఆర్.కె న్యూస్: ఆర్.కె 7, ఆర్.కె న్యూ టెక్, ఎస్ఆర్పీ 1 గనుల ఉద్యోగులను స్ఫూర్తిగా తీసుకుని మిగతా గనుల ఉద్యోగులు రాబోయే కాలంలో నిర్దేశించిన ఉత్పత్తి లక్ష్యాలను చేరుకోవాలని శ్రీరాంపూర్ జనరల్ మేనేజర్ మునిగంటి శ్రీనివాస్ పిలుపునిచ్చారు. మంగళవారం ఏరియా ప్రగతిపై ఆయన ప్రకటన విడుదల చేస్తూ జనవరిలో 5,73,700 టన్నుల లక్ష్యానికి గాను 2,32,279 టన్నుల బొగ్గు వెలికితీసి 40 శాతం ఉత్పత్తి సాధించినట్లు తెలిపారు. ఏరియాలోని ఆర్.కె 7, ఆర్.కె న్యూ టెక్, ఎస్ఆర్పీ 1 గనులు వంద శాతానికి పైగా బొగ్గును వెలికితీశాయని పేర్కొన్నారు. ఈ ఆర్థిక సంవత్సరంలో ఇప్పటి వరకు ఆర్.కె న్యూ టెక్ గని 113 శాతం ప్రగతిని నమోదు చేసిందని తెలిపారు. ఆర్.కె 5, ఆర్.కె 7, ఎస్సార్పీ 1 గనులు కూడా పూర్తి స్థాయి లక్ష్యాన్ని సాధించే దిశగా ఉన్నాయని వెల్లడించారు. ఉపరితల గనులలో మట్టి వెలికితీత కాంట్రాక్టర్ల ఒప్పంద సమస్యల వల్ల ఉత్పత్తిలో కొన్ని ఇబ్బందులు ఎదురైనట్లు చెప్పారు. శ్రీరాంపూర్ ఉపరితల గనిలో హెచ్సీపీఎల్ కొత్త కాంట్రాక్టు సంస్థ పనులు చేపట్టి ప్రతిరోజూ సగటున 37 వేల క్యూబిక్ మీటర్ల మట్టిని తొలగిస్తోందని వివరించారు. రెండో కాంట్రాక్టుకు సంబంధించి సాంకేతిక బిడ్ ప్రక్రియ పూర్తయిందని, ధరల బిడ్ తెరిచి త్వరగా పనులు మొదలుపెడతామని తెలిపారు. ఇందారం ఉపరితల గనిలో పాత కాంట్రాక్టర్ యంత్రాలు ఏర్పాటు చేయడంలో వైఫల్యమవడంతో నూతన కాంట్రాక్టు కోసం ప్రతిపాదనలు పంపినట్లు వెల్లడించారు. ఉద్యోగుల సంక్షేమంలో భాగంగా మెడికల్ ఇన్ వాలిడేషన్ పొందిన 3,882 మంది వారసులకు కారుణ్య నియామకాల ద్వారా ఉద్యోగ అవకాశాలు కల్పించినట్లు వివరించారు. మరో 275 మందికి ఎల్ఎస్పీ, 13 మందికి ఎంఎంసీ నిధులు పంపిణీ చేసినట్లు పేర్కొన్నారు. పదవీ విరమణ పొందిన 9,729 మంది మాజీ ఉద్యోగులకు సీపీఆర్ఎంఎస్ కింద వైద్య కార్డులు అందజేశామని చెప్పారు. ప్రగతి స్టేడియంలో 77వ గణతంత్ర వేడుకలను ఘనంగా నిర్వహించామని తెలిపారు. ముక్కిడి పోచమ్మ ఆలయం వద్ద యాజమాన్యం ఆధ్వర్యంలో సమ్మక్క సారలమ్మ జాతర జరిగిందని మునిగంటి శ్రీనివాస్ వివరించారు.

🟢  గురువర్యులు గుండేటి యోగేశ్వర్ ఆధ్వర్యంలో ఘన సన్మానం

మంచిర్యాల, ఆర్.కె న్యూస్: పేద విద్యార్థులు చదువుకునే ప్రభుత్వ పాఠశాలల బలోపేతానికి ప్రతి ఒక్కరూ కృషి చేయాలని మంచిర్యాల జిల్లా పరిషత్ బాలుర ఉన్నత పాఠశాల నూతన గెజిటెడ్ ప్రధానోపాధ్యాయుడు బండి రమేష్ ఆకాంక్షించారు. 1992 బ్యాచ్ పదవ తరగతి పూర్వ విద్యార్థి అయిన రమేష్ పదోన్నతిపై అదే పాఠశాలకు ప్రధానోపాధ్యాయునిగా రావడం విశేషం. ఈ నేపథ్యంలో ఆయనకు విద్యాబుద్ధులు నేర్పిన గురువు, రాష్ట్ర పర్యావరణ చట్టం అథారిటీ సభ్యుడు గుండేటి యోగేశ్వర్ పాఠశాల ఉపాధ్యాయ బృందంతో కలిసి ఘనంగా సన్మానం చేశారు. రాష్ట్రపతి అవార్డు గ్రహీత యోగేశ్వర్ తన శిష్యుడికి పచ్చని మొక్కను అందించి శుభాకాంక్షలు తెలిపారు. ఈ సందర్భంగా బండి రమేష్ తన గురువు ఆశీస్సులు తీసుకున్నారు. ఎంతో చరిత్ర కలిగిన ఈ పాఠశాల విద్యార్థులు ఉన్నత లక్ష్యాలతో అన్ని రంగాల్లో ప్రతిభ చాటాలని రమేష్ పేర్కొన్నారు. ఉత్తమ ఫలితాల సాధనే ధ్యేయంగా విద్యాసంస్థను విజయవంతంగా నిర్వహిస్తానని చెప్పారు. పాఠశాల అభివృద్ధికి తన వంతు సంపూర్ణ సహకారం ఎల్లప్పుడూ ఉంటుందని వెల్లడించారు. చదువుకున్న పాఠశాలకే బాధ్యునిగా రావడం గర్వకారణమని అన్నారు. ఉపాధ్యాయులు, పూర్వ విద్యార్థుల సమన్వయంతో పాఠశాల కీర్తిని మరింత పెంచుతానని వివరించారు. విద్యా వ్యవస్థలో వస్తున్న మార్పులకు అనుగుణంగా విద్యార్థులను తీర్చిదిద్దుతానని తెలిపారు. ఈ కార్యక్రమంలో పాఠశాల ఉపాధ్యాయినీ ఉపాధ్యాయులు పాల్గొన్నారు.