13 February 2026

మంచిర్యాల 34వ వార్డులో అగ్గు సాగర్ ఘన విజయం

మంచిర్యాల, ఆర్.కె న్యూస్: ప్రజలు నాపై ఉంచిన నమ్మకాన్ని నిలబెట్టుకుంటూ వార్డు అభివృద్ధికి నిరంతరం శ్రమిస్తానని జనసేన అభ్యర్థి అగ్గు సాగర్ పేర్కొన్నారు. తెలంగాణ మున్సిపల్ ఎన్నికల్లో జనసేన పార్టీ తన ఖాతా తెరిచింది. మంచిర్యాల మున్సిపల్ కార్పొరేషన్ 34వ వార్డు నుంచి పోటీ చేసిన అగ్గు సాగర్ 31 ఓట్ల మెజార్టీతో విజయం సాధించారు. రాష్ట్రవ్యాప్తంగా కాంగ్రెస్ అభ్యర్థులు జయభేరీ మోగిస్తున్న తరుణంలో ఈ గెలుపు రాజకీయ వర్గాల్లో చర్చనీయాంశమైంది. మున్సిపల్ కార్పొరేషన్ 34వ వార్డులో కాంగ్రెస్, బీజేపీ, బీఆర్ఎస్ అభ్యర్థులను కాదని ఓటర్లు జనసేనకు పట్టం కట్టారు. హోరాహోరీ సాగిన ఎన్నికల పోరులో అగ్గు సాగర్ విజేతగా నిలవడం సంచలనంగా మారింది. ఓటర్ల మద్దతుతోనే ఈ ఫలితం సాధ్యమైందని పార్టీ వర్గాలు తెలిపాయి. ఈ విజయం మంచిర్యాల జిల్లాలో జనసేన శ్రేణుల్లో నూతన ఉత్సాహాన్ని నింపింది. వార్డు సమస్యల పరిష్కారమే లక్ష్యంగా ముందుకు సాగుతానని అగ్గు సాగర్ వెల్లడించారు.

• తెలంగాణ రాష్ట్ర పర్యావరణ రక్షణ వాల్టా అథారిటీ సభ్యుడు, సైకాలజిస్ట్ గుండేటి యోగేశ్వర్
• గుడిపేట కేంద్రీయ విద్యాలయంలో ‘హరిత పాఠశాల – వ్యక్తిత్వ వికాసం’పై అవగాహన సదస్సు

మంచిర్యాల, ఆర్.కె న్యూస్: పాఠశాలలను పర్యావరణ కేంద్రాలుగా తీర్చిదిద్దినప్పుడే ప్రశాంత వాతావరణం ఏర్పడి విద్యార్థులు చదువుపై ఏకాగ్రత వహిస్తారుని తెలంగాణ రాష్ట్ర పర్యావరణ రక్షణ వాల్టా అథారిటీ సభ్యుడు, సైకాలజిస్ట్ గుండేటి యోగేశ్వర్ పేర్కొన్నారు. మంచిర్యాల జిల్లా గుడిపేటలోని పీఎం శ్రీ కేంద్రీయ విద్యాలయంలో శుక్రవారం ‘హరిత పాఠశాల – విద్యార్థుల బాధ్యత – వ్యక్తిత్వ వికాసం’ అనే అంశంపై అవగాహన సదస్సు నిర్వహించారు. కార్యక్రమానికి గుండేటి యోగేశ్వర్ ముఖ్య అతిథిగా హాజరయ్యారు. ప్రకృతి రక్షణపై ప్రతి ఒక్కరూ బాధ్యత పెంచుకోవాలని పిలుపునిచ్చారు.

పర్యావరణ రక్షణతోనే మానవ మనుగడ సాధ్యమని యోగేశ్వర్ స్పష్టం చేశారు. పాఠశాలల్లో విద్యార్థులు, ఉపాధ్యాయులు తీసుకోవాల్సిన జాగ్రత్తలను పవర్ పాయింట్ ప్రజెంటేషన్ ద్వారా వివరించారు. పర్యావరణ క్లబ్బుల నిర్వహణ, విద్యార్థుల భాగస్వామ్యంపై ప్రాక్టికల్ పద్ధతుల్లో అవగాహన కల్పించారు. విద్యార్థులను వివిధ బృందాలుగా విభజించి శిక్షణ ఇచ్చారు. అనంతరం పాఠశాల ఆవరణలో మొక్కలు నాటారు. ప్రకృతిని కాపాడతామని విద్యార్థులతో ప్రతిజ్ఞ చేయించారు.

వార్షిక పరీక్షలు సమీపిస్తున్న తరుణంలో విద్యార్థులకు ఒత్తిడి మేనేజ్మెంట్ పై కీలక సూచనలు చేశారు. సమయ పాలన, ఏకాగ్రత, లక్ష్యసాధన దిశగా అడుగులు వేయాలని సూచించారు. పరీక్షల పట్ల భయాన్ని వీడి ఆత్మవిశ్వాసంతో పరీక్షలు రాయాలని కోరారు. విద్యార్థులు అడిగిన పలు సందేహాలను ఆయన నివృత్తి చేశారు. ఈ కార్యక్రమంలో ఇన్చార్జి ప్రిన్సిపల్ దిలీప్ కుమార్ డాంగే, సమన్వయకర్త ఎస్. భాస్కర్ పాల్గొన్నారు. ఉపాధ్యాయులు చైతన్య, లోకేష్, నాగరాణి, సాయి లీల, ఎం.శరత్ చంద్ర, బి.రాజశేఖర్ సహా విద్యార్థులు పెద్ద సంఖ్యలో హాజరయ్యారు.

44 వార్డుల్లో ఘన విజయం.. విపక్షాలు బహు దూరం

నస్పూర్, ఆర్.కె న్యూస్: మంచిర్యాల మున్సిపల్ కార్పొరేషన్ ఎన్నికల్లో అధికార కాంగ్రెస్ పార్టీ భారీ విజయం సాధించింది. ఎన్నికల నోటిఫికేషన్ విడుదలైనప్పటి నుంచి ధీమా వ్యక్తం చేసిన ప్రేమ్ సాగర్ రావు అంచనాలకు తగ్గట్లుగా ఫలితాలు వెలువడ్డాయి. కార్పొరేషన్‌లో మొత్తం 60 వార్డులకు గాను కాంగ్రెస్ పార్టీ 44 స్థానాలను కైవసం చేసుకుని తన ఆధిపత్యాన్ని చాటుకుంది. ఈ ఎన్నికల్లో విపక్షాలు నామమాత్రపు స్థానాలకే పరిమితమయ్యాయి. బీఆర్ఎస్ 08 వార్డుల్లో, బీజేపీ 05 వార్డుల్లో, ఏఐఎఫ్ బీ 02 వార్డుల్లో, జనసేన ఒక వార్డులో విజయం సాధించాయి. కాంగ్రెస్ ప్రభుత్వం రాష్ట్రంలో అమలు చేస్తున్న సంక్షేమ పథకాలు పార్టీ విజయానికి తోడ్పడ్డాయి. అభివృద్ధి పనులను ప్రజల్లోకి బలంగా తీసుకెళ్లడంలో పార్టీ శ్రేణులు విజయవంతమయ్యాయి. ఎమ్మెల్యే ప్రేమ్ సాగర్ రావుతో పాటు మాజీ డీసీసీ అధ్యక్షురాలు కొక్కిరాల సురేఖ నియోజకవర్గంలో విస్తృతంగా ప్రచారం నిర్వహించారు. మంచిర్యాల కాంగ్రెస్ పార్టీకి కంచుకోట అని ఈ ఫలితాలు నిరూపించాయని నాయకులు పేర్కొంటున్నారు. తొలిసారి జరిగిన కార్పొరేషన్ ఎన్నికల్లో తిరుగులేని విజయం సాధించడంతో కాంగ్రెస్ శ్రేణుల్లో నూతన ఉత్సాహం నెలకొంది. పార్టీ కార్యకర్తలు పట్టణంలో పెద్ద ఎత్తున సంబరాలు జరుపుకున్నారు. భారీ మెజారిటీ సాధించిన నేపథ్యంలో మంచిర్యాల తొలి మేయర్, డిప్యూటీ మేయర్ పీఠాలను అధిష్టించే అదృష్టం ఎవరికి దక్కుతుందో తెలుసుకోవడానికి కాంగ్రెస్ శ్రేణులు ఆసక్తిగా ఎదురుచూస్తున్నాయి. అభ్యర్థుల ఎంపికపై అటు ప్రజలు, ఇటు పార్టీ వర్గాల్లో ఆసక్తికర చర్చ మొదలైంది.