⭕ రసూల్‌పల్లిలో సింగరేణి ఉద్యోగులతో కలిసి ఘనంగా క్రిస్మస్ వేడుకలు

జైపూర్, ఆర్.కె న్యూస్: క్రైస్తవ మతానికి యేసుక్రీస్తే కేంద్ర బిందువని, ఆయనను దేవుని కుమారుడిగా, మానవ రూపంలో అవతరించిన దైవంగా భక్తులు విశ్వసిస్తారని తెలంగాణ రాష్ట్ర కనీస వేతనాల సలహా మండలి అధ్యక్షుడు, ఐఎన్టీయూసీ కేంద్ర ప్రధాన కార్యదర్శి బి. జనక ప్రసాద్ పేర్కొన్నారు. మంగళవారం క్రిస్మస్ పండుగను పురస్కరించుకుని రసూల్‌పల్లిలోని తన నివాసంలో సింగరేణి క్రైస్తవ ఉద్యోగులతో కలిసి ఆయన వేడుకలను ఘనంగా నిర్వహించారు. ఈ సందర్భంగా జనక ప్రసాద్ మాట్లాడుతూ.. ప్రేమ, క్షమ, త్యాగం, సేవ, సమానత్వం వంటి గొప్ప విలువల కలయికే క్రీస్తు బోధనల సారమని కొనియాడారు. క్రీస్తు జననం, ఆయన సాగించిన జీవన యానం, సిలువ మరణం, పునరుత్థానం వంటి ఘట్టాలు క్రైస్తవ విశ్వాసానికి మూలాధారాలని వివరించారు. ఈ దివ్య బోధనలు ప్రపంచ గమనాన్ని ప్రభావితం చేసి, మానవాళికి శాంతి మార్గాన్ని చూపాయని ఆయన అన్నారు. సింగరేణి సంస్థలో పనిచేస్తున్న క్రైస్తవ ఉద్యోగుల హక్కులు, వారి సంక్షేమం, ఆత్మగౌరవాన్ని కాపాడటంలో ఐఎన్టీయూసీ ఎల్లప్పుడూ ముందుంటుందని జనక ప్రసాద్ భరోసా ఇచ్చారు. కార్మికుల సమస్యల పరిష్కారానికి సంఘం నిరంతరం అండగా నిలుస్తుందని స్పష్టం చేశారు. అనంతరం ఆయన ఉద్యోగులతో కలిసి క్రిస్మస్ కేకును కట్ చేసి, పండుగ శుభాకాంక్షలు తెలియజేశారు. ఈ వేడుకల్లో ఐఎన్టీయూసీ కేంద్ర సీనియర్ ఉపాధ్యక్షుడు జెట్టి శంకర్ రావు, ప్రముఖ నాయకులు శంకర్ రావు, భీమ్ రావు, గరిగె స్వామి, కలవేణి శ్యామ్, తిరుపతిరాజు, పి. మల్లా రెడ్డి, జీవన్ జోయల్, కరుకూరి మనోజ్, సంతోష్ కుమార్, మహేష్ తదితరులు పాల్గొన్నారు.