KYATHAM RAJESH

–  తక్షణమే గుర్తింపు సంఘం ఎన్నికలు నిర్వహించాలి
–  ఏఐటీయూసీ రాష్ట్ర అధ్యక్షులు వాసిరెడ్డి సీతారామయ్య
సింగరేణిలో మితిమీరిన రాజకీయ జోక్యంతో సంస్థ మనుగడకు ముప్పు పొంచి ఉందని ఏఐటీయుసీ రాష్ట్ర అధ్యక్షులు వాసిరెడ్డి సీతారామయ్య అన్నారు. ఆదివారం నస్పూర్ ప్రెస్ క్లబ్ లో విలేకరుల సమావేశంలో ఏఐటీయూసీ రాష్ట్ర అధ్యక్షులు మాట్లాడుతూ, సింగరేణి గుర్తింపు సంఘం ఎన్నికల ఫలితాల ప్రభావం రాబోయే అసెంబ్లీ ఎన్నికలపై పడుతుందని రాష్ట్ర ప్రభుత్వం ఎన్నికల నిర్వహణకు సుముఖంగా లేదని, రాష్ట్ర ప్రభుత్వ సూచనల మేరకు గుర్తింపు సంఘం ఎన్నికల నిర్వహణను అడ్డుకునేందుకు యాజమాన్యం ప్రయత్నాలు చేస్తోందని తెలిపారు. గుర్తింపు సంఘం కాలపరిమితి ముగిసి 4 యేండ్లు అయ్యాయని, కార్మికులు ఆకాంక్ష మేరకు గుర్తింపు సంఘం ఎన్నికలు తక్షణమే నిర్వహించాలన్నారు. సింగరేణిలో కార్మిక సంఘాలను నిర్వీర్యం చేయడానికి యాజమాన్యం ప్రయత్నాలు చేస్తోందని తెలిపారు. సంస్థలో కార్మికులకు ఇచ్చే జనరల్ మజ్దూర్ పదోన్నతులకు ముఖ్యమంత్రికి సంబంధం ఏంటని ప్రశ్నించారు. గతంలో ముఖ్యమంత్రి కార్మికులకు ఇచ్చిన హామీలు 6 కొత్త భూగర్భ గనులు, సొంతింటి పథకం, పేర్ల మార్పు, డిపెండెట్ల వయసు పెంపు, సింగరేణి ఆసుపత్రులను ఆధునీకరించడం లాంటి వాటిపై టీబీజీకేఎస్ మాట్లాడడం లేదన్నారు. యాజమాన్యం కోడ్ ఆఫ్ డిసిప్లిన్ రద్దు చేసి, స్టాట్యుటరీ కమిటీల్లో అన్ని కార్మిక సంఘాలకు సమాన ప్రాతినిథ్యం కల్పిస్తే ఎన్నికలు పెట్టమని అడగమన్నారు. గత నెల 30న ఓటర్ లీస్ట్ ఇవ్వాలనే ఆదేశాలను యాజమాన్యం పట్టించుకోకపోవడం పై కోర్టుకు పోతామని తెలిపారు. కార్మికుల వద్ద ఎన్నికలు నిర్వహించాలంటూ పలికే కొన్ని కార్మిక సంఘాలు ఆర్ఎల్సి ముందు జరిగే సమావేశంలో ఎందుకు పాల్గొనడంలేదో కార్మికులు గమనిస్తున్నారని తెలిపారు. ఈ కార్యక్రమంలో ఏఐటీయూసీ డిప్యూటీ జనరల్ సెక్రటరీలు ముస్కె సమ్మయ్య, కె. వీరభద్రయ్య, తౌటం  మల్లేష్, రాంచందర్, లచ్చన్న, లక్ష్మణ్, మురళీ చౌదరి, నవీన్ రెడ్డి, అప్రోజ్ ఖాన్, మహేష్ తదితరులు పాల్గొన్నారు.

–   శ్రీరాంపూర్‌ ఎస్వోటు జీఎం కె. రఘు కుమార్
–  భారీ వర్షాలతో బొగ్గు ఉత్పత్తికి విఘాతం
ఆర్.కె న్యూస్, నస్పూర్‌‌: 2023-24 ఆర్ధిక సంవత్సరానికి నిర్దేశించిన బొగ్గు ఉత్పత్తి లక్ష్యాన్ని సాధిస్తామని శ్రీరాంపూర్‌ ఎస్వోటు జీఎం కె. రఘు కుమార్ ఆశాభావం వ్యక్తం చేశారు. శనివారం విలేకరుల సమావేశంలో శ్రీరాంపూర్‌ ఎస్వోటు జీఎం మాట్లాడుతూ, గత నెలలో కురిసిన భారీ వర్షాలకు శ్రీరాంపూర్ ఏరియాలో బొగ్గు ఉత్పత్తికి విఘాతం కలిగిందని తెలిపారు. రాబోయే 6 నెలలు బొగ్గు ఉత్పత్తికి కీలకమని అన్నారు. సెప్టెంబర్ నెలలో శ్రీరాంపూర్ ఏరియాలోని  గనులు ఉత్పత్తి 89 శాతం ఉత్పత్తి సాధించినట్లు తెలిపారు. ఆర్కే5 గని 105 శాతం, ఆర్కే6 గని 115 శాతం, ఆర్కే7 గని 102 శాతం, ఆర్కే న్యూటెక్ గని 106 శాతం, ఎస్సార్పీ 1 గని 74 శాతం, ఎస్సార్పీ3 గని 92 శాతం, ఐకె1ఎ గని 79 శాతంతో భూగర్భ గనులు 96 శాతం సాధించాయని, ఎస్సార్పీ ఓసిపి 70 శాతం, ఐకె  ఓసిపి 125 శాతంతో శ్రీరాంపూర్ ఏరియా 89 శాతం ఉత్పత్తి సాధించినట్లు తెలిపారు. ఉద్యోగులు రక్షణతో కూడిన ఉత్పత్తికి ప్రాధాన్యత ఇవ్వాలన్నారు. గత నెలలో ఆర్కే 8, నస్పూర్ డిస్పెన్సరీలో 3 లక్షల విలువ గల కొత్త ఈసీజీ యంత్రాలు అందుబాటులోకి తెచ్చామని, పర్యావరణ పరిరక్షణలో భాగంగా 500 మట్టి వినాయక ప్రతిమలను పంపిణీ చేశామని, గైర్హాజరు కార్మికుల కుటుంబాలకు కౌన్సిలింగ్ నిర్వహించమని తెలిపారు. గత నెలలో 41 మంది ఉద్యోగుల వారసులకు కారుణ్య నియామక పత్రాలు పంపిణీ చేశామన్నారు. ఈ కార్యక్రమంలో డిజీఎంలు అరవింద్ రావు, చిరంజీవులు, ఏరియా ఇంజనీర్ చంద్రశేఖర్ రెడ్డి,  సీనియర్ పిఓ కాంత రావు తదితరులు పాల్గొన్నారు.

ఆర్.కె న్యూస్, నస్పూర్: సింగరేణి సంస్థలో సుదీర్ఘ కాలం పని చేసి పదవి విరమణ పొందిన ఉద్యోగుల సేవలు వెలకట్టలేనివని ఆర్కే-న్యూటెక్ గని ఎస్.ఓ.ఎం ఇ.స్వామిరాజు అన్నారు. శనివారం శ్రీరాంపూర్ ఏరియాలోని ఆర్కే-న్యూటెక్ గని ఆవరణలో నిర్వహించిన కార్యక్రమంలో పదవీ విరమణ పొందిన ఉద్యోగులను గని ఎస్.ఓ.ఎం ఇ.స్వామిరాజు శాలువలు, పూలమాలతో ఘనంగా సన్మానించి, సన్మాన పత్రాలను అందజేశారు. ఈ సందర్బంగా ఆర్కే-న్యూటెక్ గని ఎస్.ఓ.ఎం మాట్లాడుతూ సింగరేణి ప్రగతిలో ఉద్యోగుల సేవలు మరువలేనివని అన్నారు. పదవీ విరమణ తర్వాత ఉద్యోగులు తదుపరి జీవితాన్ని కుటుంబ సభ్యులతో సుఖసంతోషాలతో గడపాలని ఆకాంక్షించారు. ఈ కార్యక్రమంలో సంక్షేమాధికారి పాల్ సృజన్, ఇన్ఛార్జి రక్షణాధికారి శంకర్, పిట్ ఇంజినీర్ రాజగోపాలచారి, ఇంజినీర్ కృష్ణ, సర్వే అధికారి పిచ్చేశ్వర్ రావు, అండర్ మేనేజర్లు పరమేష్, చంద్రమౌళి, తెబొగకాసం, ఏఐటీయూసీ పిట్ కార్యదర్శులు ఎం.జంపయ్య, ఎ.లక్ష్మణ్, బీఎంఎస్ ప్రతినిధి వినయ్ కుమార్, ఇతర నాయకులు తదితరులు పాల్గొన్నారు.

ఆర్.కె న్యూస్, నస్పూర్: విజ్ఞానం కోసం విద్యార్థులు సైన్స్ పై అవగాహన పెంచుకోవాల్సిన అవసరం ఉందని జిల్లా స్థాయి జిజ్ఞాస సంచార ప్రయోగశాల నిర్వహకులు సాయి కుమార్, సంపత్ లు తెలిపారు. శుక్రవారం నస్పూర్ మండలంలోని సింగపూర్ మండల పరిషత్ ప్రాథమికోన్నత పాఠశాలలో జిల్లా సైన్స్ ఆఫీసర్ మధుబాబు పర్యవేక్షణలో విద్యార్థులకు సైన్స్ పై అవగాహన కల్పించారు. మానవ శరీరం, అంతర్గత అవయవాల పనితీరు, ప్రయోగ పరికరాల పని విధానం గురించి వివరించారు. ఈ కార్యక్రమంలో హెడ్ మాస్టర్ మహేశ్వర్, టీచర్స్ తదితరులు పాల్గొన్నారు.

– రాష్ట్ర అటవీ శాఖ మంత్రి అల్లోల ఇంద్రకరణ్ రెడ్డి
కొమురం భీమ్ ఆసిఫాబాద్ జిల్లాలోని సిర్పూర్ నియోజకవర్గ అభివృద్ధికి అధిక ప్రాధాన్యతనివ్వడం జరుగుతుందని రాష్ట్ర అటవీ, పర్యావరణ, న్యాయ, శాస్త్ర సాంకేతిక, దేవాదాయ శాఖ మంత్రి అల్లోల ఇంద్రకరణ్ రెడ్డి అన్నారు. శుక్రవారం సిర్పూర్ నియోజకవర్గ పరిధిలో తలపెట్టిన పలు అభివృద్ధి కార్యక్రమాలను జిల్లా కలెక్టర్ బొర్కడే హేమంత్ సహదేవరావు, శాసనమండలి సభ్యులు దండే విఠల్, సిర్పూర్ నియోజకవర్గ శాసనసభ్యులు కోనేరు కోనప్పతో కలిసి ప్రారంభించారు. ఈ సందర్భంగా రాష్ట్ర మంత్రి మాట్లాడుతూ కొమురం భీమ్ ఆసిఫాబాద్ జిల్లాలోని సిర్పూర్ నియోజకవర్గాన్ని అన్ని రంగాల్లో అభివృద్ధి చేసే విధంగా ప్రభుత్వం రాధిక ప్రాధాన్యతనిస్తూ అభివృద్ధి పనులు చేపట్టడం జరిగిందని తెలిపారు. సిర్పూర్ నియోజకవర్గంలోని అచ్చెల్లి – చింతకుంట వంతెన, శివపూర్ – హీరపూర్ వంతెన ప్రారంభించడం జరిగిందని, శివపూర్ – హీరాపూర్ రోడ్డుకు భూమి పూజ, పాతట్లగూడ వంతెన ప్రారంభించడం జరిగిందని, ప్రజల రాకపోకలకు ఎలాంటి ఇబ్బందులు తలెత్తకుండా సౌకర్యాలు ఏర్పాటు చేయడం జరిగిందని తెలిపారు. మన్నేవార్ సంఘం భవనానికి భూమి పూజ చేయడం జరిగిందని తెలిపారు. కౌటాల మండలంలో మొఘడ్ దగడ్ – వైగాం రోడ్డుకు భూమి పూజ, వార్థా నదిపై 75 కోట్ల రూపాయలతో నిర్మిస్తున్న గుండాయిపేట్ –  నందివర్థా (మహారాష్ట్ర) మధ్య హైలెవల్ అంతర్రాష్ట్ర వంతెన నిర్మాణానికి భూమి పూజ, చింతల మానేపల్లి మండల కేంద్రంలో 133 కె . వి. సబ్ స్టేషన్ కు భూమి పూజ, చింతల్ పాటి – గురుడుపేట్ రోడ్డుకు, చింతలమానేపల్లి – గంగపూర్ రోడ్డుకు, కర్జెళ్లి – బారేగూడ రోడ్డుకు భూమి పూజ, దిందాలో లో-లెవల్ వంతెన నిర్మాణానికి భూమి పూజ చేయడం జరిగిందని తెలిపారు. ప్రజల సంక్షేమం, ఆరోగ్యం, అభివృద్ధి కోసం ప్రభుత్వం అహర్నిశలు కృషి చేస్తుందని తెలిపారు. దివ్యాంగుల సంక్షేమం పై ప్రత్యేక దృష్టి సారించి ప్రతి నెల 4 వేల 16 రూపాయల పెన్షన్ అందించడం జరుగుతుందని, మహిళా సంక్షేమం కోసం ఆరోగ్య మహిళా కేంద్రాలు ఏర్పాటు చేయడంతో పాటు గర్భిణులకు సకాలంలో సరైన పోషకాహారం అందించేందుకు న్యూట్రిషన్ కిట్, ప్రసవం తర్వాత బాలింతలకు కె సి ఆర్ హిట్ అందించడం జరుగుతుందని తెలిపారు. వెనుకబడిన తరగతులు, మైనారిటీల కొరకు 1 లక్ష రూపాయల ఆర్థిక సహాయం పథకాన్ని అందించడం జరుగుతుందని, గృహలక్ష్మి పథకం ద్వారా సొంత ఇంటి స్థలం ఉండి ఇల్లు నిర్మించుకునే ఆర్థిక స్తోమత లేని వారికి 3 లక్షల రూపాయల ఆర్థిక సహాయం అందించేందుకు చర్యలు తీసుకోవడం జరుగుతుందని తెలిపారు. ఇలా అన్ని వర్గాల ప్రజల సంక్షేమం, అభ్యున్నతికి ప్రభుత్వం అహర్నిశలు కృషి చేస్తుందని తెలిపారు. ఈ కార్యక్రమంలో సంబంధిత శాఖల అధికారులు, ప్రజా ప్రతినిధులు తదితరులు పాల్గొన్నారు.

ఆర్.కె న్యూస్, నస్పూర్: తెలంగాణవాది, స్వాతంత్య్ర పోరాట యోధుడు ఆచార్య కొండా లక్ష్మణ్ బాపూజీ 108 జయంతి వేడుకలు నస్పూర్ పద్మశాలి సంక్షేమ సంఘం ఘనంగా నిర్వహించారు.  కొండా లక్ష్మణ్ బాపూజీ చిత్రపటానికి పూలమాలలు వేసి నివాళులర్పించారు. ఈ సందర్భంగా పద్మశాలి సంఘం సభ్యులు మాట్లాడుతూ ప్రత్యేక రాష్ట్ర సాధనకై అంకితభావం, నిజాయితీగా కృషి చేసిన మహనీయుడు కొండా లక్ష్మణ్ బాపూజీ అని ప్రశంసించారు. కేవలం తెలంగాణ ఉద్యమంలోనే కాకుండా భారత స్వాతంత్య్ర పోరాటంలోనూ పాల్గొన్నారని, చట్టసభల్లో గళమెత్తి తన పదవులు తృణప్రాయంగా వదులుకున్న త్యాగశీలి అని అన్నారు. ఈ కార్యక్రమంలో నస్పూర్ పద్మశాలి సంక్షేమ సంఘం అధ్యక్షులు చిలకాని బొడ్డయ్య, ప్రధాన కార్యదర్శి వేముల సురేష్, శ్రీలక్ష్మీ గణపతి శివ మార్కండేయ దుర్గామాత దేవాలయ కమిటీ అధ్యక్షులు  సిరిపురం రామన్న, ప్రధాన కార్యదర్శి కొండ శ్రీనివాస్, కోశాధికారి కుసుమ శంకర్, నల్ల సంపత్,   కమిటీ సభ్యులు తదితరులు పాల్గొన్నారు.

ఆర్.కె న్యూస్, మంచిర్యాల: సిమెంట్ ఇటుకల చాటున గంజాయి తరలిస్తున్న ఇద్దరు వ్యక్తులను అరెస్టు చేసినట్లు రామగుండం కమిషనర్ ఆఫ్ పోలీస్ రెమా రాజేశ్వరి తెలిపారు. బుధవారం మంచిర్యాల జిల్లా శ్రీరాంపూర్ పోలీస్ స్టేషన్ లో ఏర్పాటు చేసిన విలేకరుల సమావేశంలో రామగుండం సీపీ మాట్లాడుతూ, ఒడిశా రాష్ట్రం, మల్కన్ గిరి జిల్లా, చితాపరి గ్రామానికి చెందిన చిత్రసేన్ క్రిసాని, జగబందు క్రిసాని అనే అన్నదమ్ములు ఒడిశా నుంచి మహారాష్ట్రకు గంజాయి తరలించేవారని, ఈ నెల 22న రవాణా చేస్తున్న క్రమంలో రాత్రి శ్రీరాంపూర్ జీఎం కార్యాలయం దగ్గర నేషనల్ హైవే పక్కన టైరు పంక్చర్ కావడంతో ట్రాక్టర్ ను అక్కడే వదిలిపెట్టి వెళ్లారని తెలిపారు. ఈనెల 23న పెట్రోలింగ్ చేస్తున్న శ్రీరాంపూర్ ఎస్ఐ ట్రాక్టర్ వద్ద ఎవరు లేకపోవడంతో సిబ్బందితో పోలీస్ స్టేషన్ కు తరలించారని, ట్రాక్టర్ కోసం ఎవరు రాకపోవడంతో అనుమానంతో 25న తనిఖీ చేయగా సిమెంట్ ఇటుకల కింద టేపు చుట్టి ఉంచిన 93 (465 కిలోలు) గంజాయి ప్యాకెట్లు కనిపించాయని తెలిపారు. అనంతరం గెజిటెడ్ ఆఫీసర్ సమక్షంలో పంచనామా నిర్వహించామన్నారు. గంజాయి విలువ 93 లక్షలు ఉంటుందని తెలిపారు. ఒడిశా నుంచి మహారాష్ట్రకు తెలంగాణ మీదుగా రవాణా చేస్తున్నారని, గంజాయి అక్రమ రవాణాలో కీలక వ్యక్తులు ఈశ్వర్, గురులను త్వరలోనే పట్టుకుంటామన్నారు. నిందితులను పట్టుకోవడంలో చాకచక్యంగా వ్యవహరించిన పోలీస్ అధికారులను సీపీ అభినందించారు. ఈ కార్యక్రమంలో మంచిర్యాల డిసిపి సుధీర్ రాంనాథ్ కేకన్, జైపూర్ ఏసీపీ బి. మోహన్, శ్రీరాంపూర్ సిఐ జి. రమేష్ బాబు, టాస్క్ ఫోర్స్ ఇన్స్ పెక్టర్ సుధాకర్,  ఎస్ఐలు ఎం. ప్రసాద్, కె. రాజేష్, ఉపేందర్, రాజ వర్ధన్, పోలీస్ సిబ్బంది తదితరులు పాల్గొన్నారు.