7 May 2026

రాష్ట్ర కార్మిక, ఉపాధి శిక్షణ, కర్మాగార, గనులు భూగర్భ శాఖ మంత్రి గడ్డం వివేకానంద

మంచిర్యాల, ఆర్.కె న్యూస్: రైతు సంక్షేమంలో భాగంగా ప్రభుత్వం కొనుగోలు కేంద్రాలు ఏర్పాటు చేసి రైతుల వద్ద నుండి ధాన్యం కొనుగోలు చేస్తుందని, ఈ క్రమంలో చివరి గింజ వరకు కొనుగోలు చేసేందుకు చర్యలు తీసుకుంటామని రాష్ట్ర కార్మిక, ఉపాధి శిక్షణ, కర్మాగార, గనులు భూగర్భ శాఖ మంత్రి గడ్డం వివేకానంద అన్నారు. గురువారం జిల్లాలోని చెన్నూర్ మండల కేంద్రంలో గల శాసనసభ్యుల క్యాంపు కార్యాలయంలో ఏర్పాటు చేసిన సమావేశానికి జిల్లా కలెక్టర్ కుమార్ దీపక్, మండల తహసిల్దార్ మల్లికార్జున్, మున్సిపల్ కమిషనర్ మురళీకృష్ణ, మున్సిపల్ చైర్ పర్సన్ పెద్దింటి పద్మ, వైస్ చైర్ పర్సన్ వినయ్ కుమార్ లతో కలిసి హాజరయ్యారు. ఈ సందర్భంగా రాష్ట్ర మంత్రి మాట్లాడుతూ రైతుల వద్ద నుండి చివరి గింజ వరకు కొనుగోలు చేసే విధంగా కార్యాచరణ రూపొందించడం జరిగిందని తెలిపారు. ధాన్యం కొనుగోలు, రవాణా అంశాలలో వేసవి ఉష్ణోగ్రతతో పాటు ఇతర రాష్ట్రాలలో కొనసాగుతున్న ఎన్నికల సందర్భంగా హమాలీల కొరత ఏర్పడిందని తెలిపారు. ఈ పరిస్థితులలో సైతం జిల్లాలో రోజుకు 150 లారీల ధాన్యం తరలించడం జరుగుతుందని తెలిపారు. అకాల వర్షాల కారణంగా దెబ్బతిన్న ధాన్యం త్వరగా ఆరబెట్టి రైస్ మిల్లులకు తరలించే విధంగా అధికారులు చర్యలు తీసుకోవాలని తెలిపారు. జిల్లా కలెక్టర్ ఆలోచన మేరకు జిల్లాలో గోదాములను అద్దెకు తీసుకుని కొనుగోలు చేసిన ధాన్యం తడవకుండా నిల్వ చేసే విధంగా చర్యలు తీసుకుంటామని తెలిపారు. రాష్ట్రంలోని రైతుల సంక్షేమం కోసం ప్రభుత్వం అన్ని విధాల కృషి చేస్తుందని, రైతు భరోసా, రైతు బీమా, రైతు రుణమాఫీల ద్వారా అనేక చర్యలు చేపడుతుందని తెలిపారు. వరి ధాన్యం కొనుగోలు చేసి మద్దతు ధర చెల్లించడం జరుగుతుందని, సన్న రకం వడ్లకు మద్దతు ధరతో పాటు క్వింటాలుకు 500 రూపాయల బోనస్ అందించడం జరుగుతుందని తెలిపారు.. ఈ క్రమంలో ఇతర రాష్ట్రాల నుండి ధాన్యం రాకుండా చర్యలు తీసుకోవడం జరుగుతుందని తెలిపారు.

జిల్లా కలెక్టర్ మాట్లాడుతూ రైతులకు ఎలాంటి నష్టం కలగకుండా నిబంధనల ప్రకారం నాణ్యమైన ధాన్యాన్ని కొనుగోలు చేసి రైతుల ఖాతాలలో సంబంధిత నగదును జమ చేసే విధంగా ప్రభుత్వ ఆదేశాల ప్రకారం చర్యలు తీసుకోవడం జరుగుతుందని తెలిపారు. వేసవి దృష్ట్యా ఉదయం, సాయంత్రం వేళలలో ధాన్యం కొనుగోలు, రవాణా ప్రక్రియ కొనసాగించడం జరుగుతుందని, హమాలీల కొరత లేకుండా చర్యలు తీసుకుంటున్నామని తెలిపారు. జిల్లాలో 1 లక్ష 83 వేల మెట్రిక్ టన్నుల ధాన్యం కొనుగోలు అంచనా చేయడం జరిగిందని, ఈ మేరకు చర్యలు తీసుకుంటున్నామని తెలిపారు. అకాల వర్షాల కారణంగా ధాన్యం దెబ్బతినకుండా గోదాములలో నిల్వ చేసేందుకు చర్యలు తీసుకుంటున్నామని తెలిపారు.

అంతకుముందు రాష్ట్ర మంత్రి, జిల్లా కలెక్టర్ తో కలిసి చెన్నూర్ మున్సిపల్ కౌన్సిలర్లతో పట్టణ అభివృద్ధి పై సమీక్ష నిర్వహించారు. ఈ సందర్భంగా రాష్ట్ర మంత్రి మాట్లాడుతూ చెన్నూర్ నియోజకవర్గ అభివృద్ధిలో భాగంగా అంతర్గత రహదారులు, మురుగు కాలువల వ్యవస్థ ఏర్పాటు పనులను వేగవంతం చేసి పారిశుద్ధ్య నిర్వహణపై ప్రత్యేక చర్యలు తీసుకోవడం జరుగుతుందని తెలిపారు. ఈ క్రమంలో చెన్నూర్ మున్సిపల్ పరిధిలో చేపట్టిన రహదారి విస్తరణ, మురుగు కాలువల వ్యవస్థ నిర్మాణంలో భాగంగా నిర్వహిస్తున్న అభివృద్ధి పనుల కారణంగా ఎవరికి ఎలాంటి నష్టం కలుగకుండా చర్యలు తీసుకోవడం జరుగుతుందని తెలిపారు. రహదారి విస్తరణలో దుకాణాలు కోల్పోయిన వారికి మున్సిపల్ షాపింగ్ కాంప్లెక్స్ లో దుకాణాలు కేటాయించేందుకు ప్రాధాన్యత ఇవ్వడం జరుగుతుందని, స్థలం కోల్పోయిన వారికి టి డి ఆర్ లో వెసులుబాటు కల్పించడం జరుగుతుందని తెలిపారు. ఈ విషయంలో అనవసర పుకార్లను నమ్మవద్దని, ప్రజా సంక్షేమం, అభివృద్ధి దిశగా ప్రభుత్వం చర్యలు తీసుకుంటుందని తెలిపారు. ఈ కార్యక్రమంలో సంబంధిత అధికారులు తదితరులు పాల్గొన్నారు.

• బీజేపీ కిసాన్ మోర్చా రాష్ట్ర అధ్యక్షులు బస్వ లక్ష్మి నారాయణ
• నస్పూర్ లో జాతీయ రహదారి పై బీజేపీ భారీ ధర్నా
• అకాల వర్షం వల్ల నష్టపోయిన రైతులకు పరిహారం చెల్లించాలని డిమాండ్

నస్పూర్, ఆర్.కె న్యూస్: రాష్ట్ర ప్రభుత్వం తరుగు పేరుతో రైతులు పండించిన ధాన్యాన్ని బస్తాకు నాలుగు కిలోల చొప్పున దోచుకుంటోందని బీజేపీ కిసాన్ మోర్చా రాష్ట్ర అధ్యక్షులు బస్వ లక్ష్మి నారాయణ ఆరోపించారు. మంచిర్యాల జిల్లాలో ఎలాంటి తరుగు లేకుండా ధాన్యం కొనుగోలు చేయాలని, అకాల వర్షం వల్ల నష్టపోయిన రైతులకు ఎకరాకు 50 వేల రూపాయల నష్టపరిహారం చెల్లించాలని డిమాండ్ చేస్తూ గురువారం బీజేపీ ఆధ్వర్యంలో నస్పూర్ లోని జిల్లా కలెక్టరేట్ సమీపంలో జాతీయ రహదారిపై ధర్నా నిర్వహించారు. ఈ నిరసనలో బీజేపీ రాష్ట్ర ఉపాధ్యక్షులు రఘునాథ్ వెరబెల్లి, జిల్లా అధ్యక్షులు నగునూరి వెంకటేశ్వర్ గౌడ్ పాల్గొన్నారు. కాంటా వేసిన ధాన్యాన్ని లారీల కొరత కారణంగా మిల్లులకు తరలించడంలో ప్రభుత్వం పూర్తిగా విఫలమైందని లక్ష్మి నారాయణ విమర్శించారు. స్థానిక ఎమ్మెల్యేలు రైస్ మిల్లర్లతో కుమ్మక్కై కమీషన్ల కోసం రైతులను తీవ్ర ఇబ్బందులకు గురి చేస్తున్నారని ధ్వజమెత్తారు. లక్షెట్టిపేట మండలంలో ఇటీవల మరణించిన నలుగురు రైతుల కుటుంబాలకు ఒక్కొక్కరికి 50 లక్షల రూపాయల చొప్పున పరిహారం చెల్లించాలని డిమాండ్ చేశారు. ఎలాంటి షరతులు విధించకుండా తక్షణమే ధాన్యం కొనుగోలు చేసి రైతులకు న్యాయం చేయాలని స్పష్టం చేశారు. ధాన్యం కొనుగోలు చేసిన వెంటనే రైతులకు రశీదులు అందజేయాలని నాయకులు పేర్కొన్నారు. రైతాంగ సమస్యల పరిష్కారం కోసం బీజేపీ నిరంతరం పోరాడుతుందని వెల్లడించారు. ఈ కార్యక్రమంలో పార్టీ నాయకులు దుర్గం అశోక్, కొయ్యల ఎమాజీ, కోడి రమేష్, గోపతి రాజన్న, అమిరిశెట్టి రాజ్ కుమార్, కుర్రె చక్రి, సత్రం రమేష్, రంగ శ్రీశైలం, వీరమల్ల హరి గోపాల్ సహా పలువురు కార్యకర్తలు, రైతులు పాల్గొన్నారు.

• మంచిర్యాల మున్సిపల్ కార్పొరేషన్ మేయర్ ధర్ని మధుకర్
• రాజీవ్ నగర్ పట్టణ ప్రాథమిక ఆరోగ్య కేంద్రంలో ఆకస్మిక తనిఖీ

మంచిర్యాల, ఆర్.కె న్యూస్: వైద్యులు సకాలంలో అందుబాటులో ఉండి ప్రజలకు అన్ని రకాల వైద్య పరీక్షలు, చికిత్సలు అందించాలని మంచిర్యాల మున్సిపల్ కార్పొరేషన్ మేయర్ ధర్ని మధుకర్ స్పష్టం చేశారు. గురువారం మున్సిపల్ కార్పొరేషన్ పరిధిలోని 22వ డివిజన్ రాజీవ్ నగర్ పట్టణ ప్రాథమిక ఆరోగ్య కేంద్రాన్ని ఆయన ఆకస్మికంగా తనిఖీ చేశారు. ఈ సందర్భంగా వైద్యుల హాజరు పట్టికను, ఆసుపత్రిలో అందుబాటులో ఉన్న వైద్య పరికరాలు, మందుల నిల్వలను మేయర్ స్వయంగా పరిశీలించారు. సామాన్యులకు వైద్యం అందుబాటులో ఉండాలనే ఉద్దేశంతో ప్రభుత్వం ఈ కేంద్రాలను నిర్వహిస్తోందని, ఇక్కడ నాణ్యమైన సేవలు అందించాలని సిబ్బందిని ఆదేశించారు. అత్యవసర పరిస్థితుల్లో మాత్రమే రోగులను పెద్ద ఆసుపత్రులకు రెఫరల్ చేయాలని సూచించారు. అనంతరం మేయర్ జిల్లా వైద్యాధికారితో ఫోన్‌లో మాట్లాడి, ఆరోగ్య కేంద్రంలో నెలకొన్న సమస్యలను వివరించారు. రోగులకు ఇబ్బందులు కలగకుండా మౌలిక సదుపాయాలు మెరుగుపరచాలని తగిన సూచనలు చేశారు. ఈ కార్యక్రమంలో స్థానిక కాంగ్రెస్ నాయకులు కంకణాల శ్యాంసుందర్, ఆసుపత్రి వైద్యులు, సిబ్బంది, స్థానికులు పాల్గొన్నారు.

ప్రకృతి మిత్ర కార్యాలయంలో తెలంగాణ సైకాలజిస్ట్స్ అసోసియేషన్ దశాబ్ది ఉత్సవాలు

నస్పూర్, ఆర్.కె న్యూస్: సుప్రీంకోర్టు మార్గదర్శకాల ప్రకారం విద్యార్థుల మానసిక ఒత్తిడిని తగ్గించడంలో సైకాలజిస్టుల పాత్ర అత్యంత కీలకం, ప్రతి సైకాలజిస్ట్ ఈ సామాజిక బాధ్యతను గుర్తించి పనిచేయాలి” అని టీపీఏ జిల్లా అధ్యక్షులు, అడ్వొకేట్, కౌన్సిలింగ్ సైకాలజిస్టు రంగు వేణు కుమార్ పేర్కొన్నారు. తెలంగాణ సైకాలజిస్ట్స్ అసోసియేషన్ (టీపీఏ) పదవ ఆవిర్భావ దినోత్సవాన్ని పురస్కరించుకొని గురువారం మంచిర్యాల జిల్లా నస్పూర్ కలెక్టరేట్ రోడ్డులోని ప్రకృతి మిత్ర కార్యాలయంలో దశాబ్ది ఉత్సవాలను ఘనంగా నిర్వహించారు. రాష్ట్ర అధ్యక్షులు డాక్టర్ మోత్కూరి రాంచందర్ సూచనల మేరకు జరిగిన ఈ వేడుకల్లో వేణు కుమార్ కేక్ కట్ చేసి సభ్యులకు శుభాకాంక్షలు తెలిపారు. అనంతరం జరిగిన సమావేశంలో ఈ ఏడాది టీపీఏ ఈవెంట్ క్యాలెండర్‌లోని కార్యక్రమాల అమలుపై చర్చించారు. మంచిర్యాల జిల్లా ఆధ్వర్యంలో రాష్ట్ర స్థాయి సైకాలజీ కన్వెన్షన్ నిర్వహించాలని తీర్మానించారు. మే 9, 10 తేదీలలో హైదరాబాద్‌లో జరగనున్న రాష్ట్ర కన్వెన్షన్ మరియు అవార్డుల ప్రధానోత్సవంలో జిల్లా నుంచి పలువురు సైకాలజిస్టులు పాల్గొంటారని వెల్లడించారు. ప్రపంచ మానసిక ఆరోగ్య దినోత్సవం సందర్భంగా జిల్లా నుంచి రాష్ట్రవ్యాప్త కార్యక్రమ నిర్వహణకు అవకాశం ఇవ్వాలని రాష్ట్ర కమిటీని కోరారు. ముఖ్యంగా విద్యార్థుల ఆత్మహత్యల నివారణకు సుప్రీంకోర్టు జారీ చేసిన 15 కీలక మార్గదర్శకాలను ప్రభుత్వం అమలు చేయాలని వేణు కుమార్ డిమాండ్ చేశారు. రాబోయే విద్యా సంవత్సరం నుంచి విద్యాసంస్థల్లో సైకాలజిస్టులు, కౌన్సిలర్ల నియామక ప్రక్రియలో టీపీఏ తరఫున పూర్తి సహకారం అందిస్తామని స్పష్టం చేశారు. ఈ కార్యక్రమంలో జిల్లా జనరల్ సెక్రటరీ సుమన చైతన్య, అడ్వైజర్ గుండేటి యోగేశ్వర్, జిల్లా కమిటీ సభ్యులు నాగరాజు, తాళ్లపల్లి కవిత తదితరులు పాల్గొన్నారు.

స్వయం ఉపాధి యూనిట్ల కోసం 153 మంది అభ్యర్థుల హాజరు

మంచిర్యాల, ఆర్.కె న్యూస్: మంచిర్యాల మున్సిపల్ కార్పొరేషన్ పరిధిలోని ఎస్సీ సామాజిక వర్గానికి చెందిన నిరుపేద నిరుద్యోగ యువతకు స్వయం ఉపాధి కల్పించేందుకు అధికారులు గురువారం ఇంటర్వ్యూలు నిర్వహించారు. 2025-26 ఆర్థిక సంవత్సరానికి గాను ఎస్సీ కార్పొరేషన్ రుణాల కోసం ఆన్‌లైన్‌లో దరఖాస్తు చేసుకున్న వారికి మున్సిపల్ కార్యాలయంలో ఈ ఎంపిక ప్రక్రియ జరిగింది. ద్విచక్ర, త్రిచక్ర వాహనాలు, పాడి గేదెల యూనిట్ల మంజూరు కోసం అభ్యర్థుల అర్హతలను అధికారులు పరిశీలించారు. ఈ పథకం కింద వివిధ రకాల వ్యాపారాలు నెలకొల్పుకోవడానికి మొత్తం 309 మంది దరఖాస్తు చేసుకున్నారు. వారిలో 153 మంది అభ్యర్థులు ఇంటర్వ్యూలకు హాజరయ్యారు. జిల్లా ఎస్సీ కార్పొరేషన్ అధికారి వెంకటేశం, మున్సిపల్ కమిషనర్ అన్వేష్ అభ్యర్థుల సామాజిక, ఆర్థిక స్థితిగతులను అడిగి తెలుసుకున్నారు. నిరుద్యోగ యువత సొంతంగా వ్యాపారాలు చేసుకుని ఆర్థికంగా నిలదొక్కుకోవాలనే ఉద్దేశంతో ప్రభుత్వం ఈ రుణాలను మంజూరు చేస్తోందని అధికారులు వివరించారు. బ్యాంకుల నిబంధనల ప్రకారం అర్హత కలిగిన ప్రతి ఒక్కరికీ త్వరితగతిన రుణాలు అందేలా చర్యలు తీసుకుంటామని అధికారులు వెల్లడించారు. ఈ కార్యక్రమంలో మున్సిపల్ అసిస్టెంట్ కమిషనర్ రాజమనోహర్, జిల్లా లీడ్ బ్యాంక్ మేనేజర్ తిరుపతి, వివిధ బ్యాంకుల మేనేజర్లు మస్తాన్ షేక్, రాజేష్, మెప్మా టీఎంసీ చంద్రయ్య, సిఓలు, ఆర్పీలు పాల్గొన్నారు.

• మున్నూరు కాపు సంక్షేమ సంఘం రాష్ట్ర కార్యదర్శి గాదె సత్యం
• బీసీ కులగణన మళ్లీ నిర్వహించాలని డిమాండ్

నస్పూర్, ఆర్.కె న్యూస్: తెలంగాణలో మున్నూరు కాపుల జనాభా 40 లక్షలకు పైగా ఉంటే, కులగణనలో తక్కువగా చూపడం అన్యాయమని తెలంగాణ రాష్ట్ర మున్నూరు కాపు సంక్షేమ సంఘం రాష్ట్ర కార్యదర్శి గాదె సత్యం ఆరోపించారు. గురువారం నస్పూర్ ప్రెస్ క్లబ్‌లో నిర్వహించిన విలేకరుల సమావేశంలో ఆయన మాట్లాడుతూ, రాష్ట్ర జనాభాలో సుమారు 9 శాతంగా ఉండాల్సిన తమ జనాభాను 6 శాతం కన్నా తక్కువగా చూపడాన్ని తీవ్రంగా ఖండించారు. బీసీ కులగణనను నిష్పక్షపాతంగా మళ్లీ నిర్వహించి వాస్తవ లెక్కలను వెల్లడించాలని డిమాండ్ చేశారు. మున్నూరు కాపు కార్పొరేషన్ చైర్మన్‌గా బొమ్మ శ్రీరామ్ చక్రవర్తిని, ప్రభుత్వ సలహాదారుగా వి. హనుమంతరావును నియమించడం పట్ల హర్షం వ్యక్తం చేస్తూనే, కార్పొరేషన్‌కు ఎన్నికల హామీ మేరకు నిధులు కేటాయించాలని కోరారు. రాష్ట్ర క్యాబినెట్‌లో మున్నూరు కాపులకు జనాభా దామాషా ప్రకారం సముచిత స్థానం కల్పించాలని ప్రభుత్వాన్ని కోరారు. రాజకీయాలకు అతీతంగా మున్నూరు కాపులందరూ ఏకమై కుల సంఘం బలోపేతానికి కృషి చేయాలని, అంతర్గత విభేదాలను సరిదిద్దుకుని ముందుకు సాగుతామని వెల్లడించారు. మున్నూరు కాపులలో ఆర్థికంగా వెనుకబడిన వారికి సహాయం అందించడానికి సంఘం కృషి చేస్తుందని తెలిపారు. జిల్లాలో మున్నూరు కాపు సంఘం భవన నిర్మాణానికి ప్రతి ఒక్కరూ ఆర్థికంగా, సామాజికంగా సహకరించాలని పిలుపునిచ్చారు. ఈ కార్యక్రమంలో నాయకులు సల్ల నరేష్, బోయిని హరికృష్ణ, తోట తిరుపతి, బండారి తిరుపతి, పుప్పాల స్వర్ణాకర్, రమేష్, రవీందర్, మల్లేష్, దామోదర్ తదితరులు పాల్గొన్నారు.