KYATHAM RAJESH

• ప్రగతి స్టేడియంలో పనులను పరిశీలించిన శ్రీరాంపూర్ జీఎం మునిగంటి శ్రీనివాస్

నస్పూర్, ఆర్.కె న్యూస్: శ్రీరాంపూర్ కాలనీలోని ప్రగతి స్టేడియంలో ఈ నెల 26న నిర్వహించనున్న 77వ గణతంత్ర దినోత్సవ వేడుకల ఏర్పాట్లను ఏరియా జనరల్ మేనేజర్ మునిగంటి శ్రీనివాస్ మంగళవారం క్షేత్రస్థాయిలో పరిశీలించారు. ఉత్సవాలకు సంబంధించిన ముందస్తు పనులన్నీ వీలైనంత త్వరగా పూర్తి చేయాలని అధికారులను ఆదేశించారు. వేడుకల నిర్వహణలో ఎలాంటి లోటుపాట్లు లేకుండా ఆయా విభాగాల అధిపతులు తగిన చర్యలు తీసుకోవాలని సూచించారు. ఈ సందర్భంగా ఆయన మాట్లాడుతూ, గణతంత్ర దినోత్సవాల్లో పాల్గొనే వారందరికీ అవసరమైన మౌలిక సదుపాయాలు కల్పించాలని అధికారులకు దిశానిర్దేశం చేశారు. వేడుకల్లో భాగంగా వివిధ గనుల్లో ఎంపిక చేసిన ఉత్తమ ఉద్యోగులకు సన్మానం, మార్చ్ ఫాస్ట్, సాంస్కృతిక కార్యక్రమాలు ఘనంగా నిర్వహిస్తామని తెలిపారు. ఈ వేడుకల్లో శ్రీరాంపూర్ ఏరియా ఉద్యోగులు, వారి కుటుంబ సభ్యులు, కాలనీవాసులు పెద్ద ఎత్తున పాల్గొని విజయవంతం చేయాలని కోరారు. ఈ కార్యక్రమంలో ఎస్వోటు జీఎం ఎన్. సత్యనారాయణ, డీజీఎంలు ఆనంద్ కుమార్, రవీందర్, ఏబీ హరి నారాయణ, క్వాలిటీ మేనేజర్ కె. వెంకటేశ్వర రెడ్డి, డీవైపీఎం ఎం. రాజేష్, సెక్యూరిటీ ఆఫీసర్ జక్కా రెడ్డి పాల్గొన్నారు.

​

జన్నారం డివిజన్‌లోని 40 బీట్లలో సన్నాహాలు.. వాలంటీర్ల భాగస్వామ్యం

​జన్నారం, ఆర్.కె న్యూస్: కవ్వాల్ టైగర్ రిజర్వ్ పరిధిలోని జన్నారం అటవీ డివిజన్‌లో ఈ నెల 20 నుండి 25 వరకు ఆరు రోజుల పాటు అఖిల భారత పులుల గణన నిర్వహించనున్నారు. ఇంధన్‌పల్లి, జన్నారం, తాళ్ళపేట అటవీ రేంజ్ పరిధిలోని 40 బీట్లలో ఈ కార్యక్రమం కొనసాగుతుంది. అటవీ రేంజ్ అధికారులు, సెక్షన్ అధికారులు, బీట్ అధికారులు, యానిమల్ టైగర్ ట్రాకర్ల ఆధ్వర్యంలో జంతువుల ఉనికిని రికార్డు చేయనున్నారు. పులులతో పాటు ఇతర మాంసాహార, శాకాహార జంతువులు, పక్షులు, వృక్ష సంపద వివరాలను ఈ గణనలో నమోదు చేస్తారు. శాకాహార జంతువులైన జింకలు, దుప్పుల లెక్కింపు కోసం మూడు రోజుల పాటు రెండు కిలోమీటర్ల సరళ రేఖీయ మార్గంలో (ట్రాన్సెక్ట్ లైన్) ఆరు సార్లు నడుస్తూ సమాచారాన్ని సేకరిస్తారు. మాంసాహార జంతువుల ఉనికిని గుర్తించేందుకు ప్రతి బీటులో 15 కిలోమీటర్ల మేర నడుస్తూ పాదముద్రలు, విసర్జితాల ఆధారంగా సంఖ్యను నిర్ధారిస్తారు. రాబందులు, వివిధ పక్షి జాతులపై కూడా ప్రత్యేక దృష్టి సారించనున్నారు. జంతువులతో పాటు అడవిలోని చెట్లు, పొదలు, గుల్మాలు, గడ్డి జాతుల విస్తరణను అధికారులు రికార్డు చేయనున్నారు. ఈ ప్రతిష్టాత్మక కార్యక్రమంలో హైదరాబాద్‌తో పాటు వివిధ ప్రాంతాల నుంచి వచ్చే వన్యప్రాణి ప్రేమికులు, పర్యావరణ వేత్తలు స్వచ్ఛందంగా పాల్గొంటున్నారు. వాలంటీర్ల సమన్వయంతో క్షేత్రస్థాయిలో పారదర్శకంగా గణన పూర్తి చేసేందుకు అటవీ శాఖ ఏర్పాట్లు సిద్ధం చేసింది.

• జన్నారం ఎస్సై గొల్లపల్లి అనూష, భారత నాస్తిక సమాజం రాష్ట్ర అధ్యక్షుడు ఉప్పులేటి నరేష్ పిలుపు

జన్నారం, ఆర్.కె న్యూస్: శాస్త్ర విజ్ఞానం ఎంతో అభివృద్ధి చెందిన ప్రస్తుత సైన్స్ యుగంలో ఇంకా మూఢనమ్మకాలను నమ్మడం దురదృష్టకరమని జన్నారం ఎస్సై గొల్లపల్లి అనూష, భారత నాస్తిక సమాజం రాష్ట్ర అధ్యక్షుడు ఉప్పులేటి నరేష్ అన్నారు. సోమవారం జన్నారం మండలంలోని ధర్మారం గ్రామంలో పోలీస్ శాఖ ఆధ్వర్యంలో ‘మూఢనమ్మకాలపై అవగాహన సదస్సు’ నిర్వహించారు. పోలీస్ కళాబృందం, భారత నాస్తిక సమాజం సంయుక్తంగా చేపట్టిన ఈ కార్యక్రమంలో ప్రజలకు చేతబడి, బాణామతి వంటి అంశాలపై ఉన్న అపోహలను తొలగించారు.

ఈ సందర్భంగా ఎస్సై అనూష మాట్లాడుతూ.. పిల్లలను ఉన్నత చదువులు చదివించి ప్రయోజకులను చేయాలని, మంత్రాలు, తాయెత్తుల పేరుతో కాలం వృథా చేయవద్దని కోరారు. కొంతమంది దొంగ స్వాములు, భూతవైద్యులు అమాయక ప్రజల బలహీనతలను ఆసరాగా చేసుకుని చేతబడి, బాణామతి నెపంతో డబ్బులు వసూలు చేస్తూ మోసగిస్తున్నారని హెచ్చరించారు. ఇలాంటి మోసగాళ్ల పట్ల ప్రజలు అప్రమత్తంగా ఉండాలని సూచించారు.

భారత నాస్తిక సమాజం రాష్ట్ర అధ్యక్షుడు ఉప్పులేటి నరేష్ ఈ సందర్భంగా పలు ఇంద్రజాల ప్రదర్శనలు నిర్వహించి ప్రజలను ఆశ్చర్యపరిచారు. నోట్లో మంటలు లేపడం, పచ్చి వేపాకులపై నీళ్లు చల్లగానే మంటలు రావడం, ఇనుప చువ్వను నాలుకకు గుచ్చుకోవడం, ఇసుకలో నుండి నాణేలు తీయడం వంటి విన్యాసాల వెనుక ఉన్న అసలు రహస్యాలను ఆయన శాస్త్రీయంగా వివరించారు. ఇవన్నీ కేవలం చేతివాటం, రసాయనాల వాడకం వల్ల జరిగే ప్రక్రియలే తప్ప, ఇందులో ఎలాంటి మంత్రశక్తి లేదని నిరూపించారు.

ఈ కార్యక్రమంలో గ్రామానికి చెందిన సర్పంచ్, ఉపసర్పంచ్, ఏఎస్ఐ, పోలీస్ కళాబృందం సభ్యులు, గ్రామ ప్రజలు పెద్ద సంఖ్యలో పాల్గొన్నారు. పోలీస్ కళాబృందం వారు తమ పాటలు, ఆటలతో మూఢనమ్మకాల వల్ల కలిగే నష్టాలపై ప్రజల్లో చైతన్యం నింపారు.

• భక్తులకు ఇబ్బందులు కలగకుండా చర్యలు
• జనరల్ మేనేజర్ మునిగంటి శ్రీనివాస్

నస్పూర్, ఆర్.కె న్యూస్: స్థానిక ముక్కిడి పోచమ్మ ఆలయ ఆవరణలో సింగరేణి యాజమాన్యం నిర్వహిస్తున్న సమ్మక్క–సారలమ్మ జాతర ఏర్పాట్లను ఏరియా జనరల్ మేనేజర్ మునిగంటి శ్రీనివాస్ సోమవారం క్షేత్రస్థాయిలో పరిశీలించారు. వేలాదిగా తరలివచ్చే భక్తులకు ఎటువంటి అసౌకర్యం కలగకుండా అన్ని మౌలిక సదుపాయాలు కల్పించాలని అధికారులను ఆదేశించారు. తాగునీటి సరఫరా, నిరంతర విద్యుత్ ఉండేలా చూడాలని స్పష్టం చేశారు. పారిశుధ్య నిర్వహణ కోసం ప్రత్యేక బృందాలను ఏర్పాటు చేసి, ఆలయ పరిసరాలను నిరంతరం శుభ్రంగా ఉంచాలని సూచించారు. భక్తుల సౌకర్యార్థం తాత్కాలిక మరుగుదొడ్లు, నీటి ట్యాంకర్లు అందుబాటులో ఉంచాలని పేర్కొన్నారు. అత్యవసర వైద్యం కోసం ప్రథమ చికిత్స కేంద్రాలు, అంబులెన్స్ సదుపాయం సిద్ధం చేయాలని అధికారులకు తెలిపారు. భద్రత పరంగా పోలీసు శాఖతో సమన్వయం చేసుకుంటూ ట్రాఫిక్ నియంత్రణకు చర్యలు తీసుకోవాలని దిశానిర్దేశం చేశారు. సింగరేణి కార్మికులు, స్థానిక ప్రజల సహకారంతో జాతరను ప్రశాంతంగా నిర్వహించేందుకు అన్ని విభాగాలు సమిష్టిగా పనిచేయాలని పిలుపునిచ్చారు. ఈ కార్యక్రమంలో ఎస్వోటు జీఎం ఎన్. సత్యనారాయణ, డీజీఎంలు రవీందర్, ఎం. రాజేష్, సెక్యూరిటీ అధికారి జక్కా రెడ్డి, సీనియర్ పీవో ఎస్. సురేందర్ తదితర అధికారులు పాల్గొన్నారు.

రుద్ర హోమం, అన్నప్రసాద వితరణ

నస్పూర్, ఆర్.కె న్యూస్: మంచిర్యాల మున్సిపల్ కార్పొరేషన్ పరిధిలోని నస్పూర్ శ్రీ లక్ష్మి గణపతి శివ మార్కండేయ దుర్గ మాత దేవాలయంలో ఈ నెల 21న మార్కండేయ జయంతి వేడుకలు నిర్వహించనున్నారు. మాఘ శుద్ధ తదియ బుధవారం పురస్కరించుకుని ఉదయం ఆలయ ప్రాంగణంలో జెండా ఆవిష్కరణ, ప్రత్యేక రుద్ర హోమం చేపట్టనున్నట్లు ఆలయ కమిటీ, పద్మశాలి సంఘం ప్రతినిధులు తెలిపారు. మార్కండేయ జయంతిని పురస్కరించుకుని నిర్వహించే ఈ ఆధ్యాత్మిక కార్యక్రమాల్లో పద్మశాలి కులబాంధవులు, భక్తులు పెద్ద సంఖ్యలో పాల్గొని విజయవంతం చేయాలని కోరారు. హోమ పూజల అనంతరం భక్తులకు అన్నప్రసాద వితరణ ఉంటుందని పేర్కొన్నారు. ఉత్సవాలకు సంబంధించి ఆలయ అర్చకులు, కమిటీ సభ్యులు ఏర్పాట్లు పూర్తి చేశారు.

అధికారులతో సమీక్ష నిర్వహించిన జనరల్ మేనేజర్ మునిగంటి శ్రీనివాస్

నస్పూర్, ఆర్. కె న్యూస్: శ్రీరాంపూర్ కాలనీలోని ప్రగతి స్టేడియంలో 77వ గణతంత్ర దినోత్సవ వేడుకలను అత్యంత వైభవంగా నిర్వహించాలని జనరల్ మేనేజర్ మునిగంటి శ్రీనివాస్ అధికారులను ఆదేశించారు. శనివారం జనరల్ మేనేజర్ కార్యాలయంలోని సమావేశ మందిరంలో ఏరియా అధికారులతో వేడుకల ఏర్పాట్లపై సమీక్ష సమావేశం నిర్వహించారు. ఈ సందర్భంగా ఆయన మాట్లాడుతూ వేడుకలకు సంబంధించిన అన్ని ఏర్పాట్లను ఆయా విభాగాలు సమన్వయంతో పూర్తి చేయాలని సూచించారు. ముఖ్యంగా విద్యార్థులు ప్రదర్శించే సాంస్కృతిక కార్యక్రమాలు దేశభక్తిని పెంపొందించే విధంగా ఉండాలని మునిగంటి శ్రీనివాస్ పేర్కొన్నారు. కార్యక్రమానికి హాజరయ్యే వారికి ఎలాంటి ఇబ్బందులు కలగకుండా తగిన చర్యలు తీసుకోవాలని ఆదేశించారు. ఈ సమావేశంలో క్వాలిటీ విభాగం బెల్లంపల్లి రీజియన్ అధికారి వీరభద్ర రావు, ప్రాజెక్టు అధికారులు ఏ. వెంకటేశ్వర రెడ్డి, చిప్ప వెంకటేశ్వర్లు, ఏజెంట్లు ఎన్. శ్రీధర్, రవికుమార్, డీజీఎంలు ఎస్. అనిల్ కుమార్, ఆనంద్ కుమార్, రవీందర్, మల్లయ్య, సర్వే అధికారి నర్సింగరావు, లా అధికారి మల్లేష్, పర్చేజ్ అధికారి చంద్రశేఖర్, సీహెచ్‌పీ ఎస్ఈ చంద్రలింగం, ఎస్టేట్స్ అధికారి వరలక్ష్మి, ఎన్విరాన్మెంటల్ అధికారి హనుమాన్ గౌడ్, వివిధ గనుల మేనేజర్లు, అధికారులు హాజరయ్యారు.

రహదారి భద్రతపై అవగాహన సదస్సులో ఇన్స్‌పెక్టర్ శ్రీలత పిలుపు

నస్పూర్, ఆర్.కె న్యూస్: వాహనదారులు ట్రాఫిక్ నిబంధనలను తూచా తప్పకుండా పాటిస్తూ క్షేమంగా గమ్యస్థానాలకు చేరుకోవడమే లక్ష్యంగా పెట్టుకోవాలని శ్రీరాంపూర్ ఇన్స్‌పెక్టర్ శ్రీలత పిలుపునిచ్చారు. శ్రీరాంపూర్ ఏరియాలోని ఎస్సార్పీ 3 వీటీసీ శిక్షణ కేంద్రంలో శనివారం రహదారి భద్రతపై అవగాహన సదస్సు నిర్వహించారు. ఈ సందర్భంగా ఆమె మాట్లాడుతూ ప్రమాదాల నివారణకు ప్రజల సహకారం ఎంతో అవసరమని పేర్కొన్నారు. ప్రస్తుతం దేశవ్యాప్తంగా జరుగుతున్న రహదారి ప్రమాదాలు పెద్ద సమస్యగా మారాయని శ్రీలత ఆందోళన వ్యక్తం చేశారు. వాహనదారులు ట్రాఫిక్ నిబంధనలు పాటించకపోవడం వల్లే అత్యధిక ప్రమాదాలు చోటుచేసుకుంటున్నాయని వివరించారు. హత్యల ద్వారా జరుగుతున్న మరణాల కంటే రహదారి ప్రమాదాల వల్ల ప్రాణాలు కోల్పోతున్న వారి సంఖ్య అధికంగా ఉండటం గమనార్హమని తెలిపారు. ప్రభుత్వాలు, పోలీసులు ఎన్ని చర్యలు చేపట్టినా, వాహనదారులు తమ వ్యక్తిగత బాధ్యతగా నిబంధనలు పాటించినప్పుడే మెరుగైన ఫలితాలు ఉంటాయని స్పష్టం చేశారు. మద్యం సేవించి వాహనం నడపడం వల్ల తమతో పాటు ఇతరుల ప్రాణాలను కూడా ప్రమాదంలోకి నెడుతున్నారని వాహనదారులను హెచ్చరించారు. ప్రతి వాహనదారుడు తప్పనిసరిగా హెల్మెట్ ధరించాలని, కారు నడిపే సమయంలో సీట్ బెల్ట్ ధరించడం మర్చిపోవద్దని సూచించారు. మైనర్లకు వాహనాలు ఇవ్వడం చట్టరీత్యా నేరమని, తల్లిదండ్రులు ఈ విషయంలో జాగ్రత్తగా ఉండాలని కోరారు. ఈ కార్యక్రమంలో ఎస్సై మేకల సంతోష్ కుమార్, పోలీసు సిబ్బంది, సింగరేణి అధికారులు, కార్మికులు తదితరులు పాల్గొన్నారు.

Pages: 1 2

యూనియన్ రాష్ట్ర అధ్యక్షులు రియాజ్ అహ్మద్ వెల్లడి
భారీగా చేరికలు: జిల్లా నూతన కమిటీ ఎన్నిక

నస్పూర్, ఆర్.కె న్యూస్: మంచిర్యాల జిల్లాలోని అసంఘటిత రంగ కార్మికుల సమస్యల పరిష్కారానికి హెచ్‌ఎంఎస్ యూనియన్ పెద్ద ఎత్తున ఉద్యమిస్తుందని ఆ సంఘం రాష్ట్ర అధ్యక్షులు రియాజ్ అహ్మద్ ప్రకటించారు. ఆదివారం నస్పూర్‌లోని హెచ్‌ఎంఎస్ కార్యాలయంలో అసంఘటిత కార్మికుల సమావేశం నిర్వహించారు. ఏరియా వైస్ ప్రెసిడెంట్ వంటకాల అనిల్ రెడ్డి అధ్యక్షతన జరిగిన ఈ సభలో ఆటో డ్రైవర్లు, అడ్డ కూలీలు, తాపీ మేస్త్రీలతో పాటు వివిధ రంగాలకు చెందిన కార్మికులు అధిక సంఖ్యలో పాల్గొన్నారు.

ఈ సందర్భంగా హెచ్‌ఎంఎస్ డిప్యూటీ జనరల్ సెక్రటరీ వెల్ది సుదర్శన్ సమక్షంలో, బీసీ సమాజ్ ఉమ్మడి జిల్లా మాజీ అధ్యక్షులు నరెడ్ల శ్రీనివాస్ నాయకత్వంలో 40 మంది ముఖ్య నాయకులు యూనియన్‌లో చేరారు. రియాజ్ అహ్మద్ వారికి కండువాలు కప్పి సంఘంలోకి ఆహ్వానించారు. కేవలం సంఘటిత రంగమే కాకుండా, అసంఘటిత రంగ కార్మికుల హక్కుల కోసం కూడా యూనియన్ నిరంతరం అండగా నిలుస్తుందని ఈ సమావేశంలో తీర్మానించారు.

మంచిర్యాల జిల్లా కమిటీ ఎన్నిక: అనంతరం హెచ్‌ఎంఎస్ మంచిర్యాల జిల్లా నూతన కార్యవర్గాన్ని ఏకగ్రీవంగా ఎన్నుకున్నారు. జిల్లా అధ్యక్షుడిగా నరెడ్ల శ్రీనివాస్, ప్రధాన కార్యదర్శిగా సాయి కృష్ణారెడ్డి, కార్యనిర్వాహక అధ్యక్షుడిగా కోండ్ర శంకర్ నియమితులయ్యారు. త్వరలోనే జిల్లా వ్యాప్తంగా పూర్తిస్థాయి కమిటీలను ఏర్పాటు చేస్తామని రియాజ్ అహ్మద్ వెల్లడించారు. ఈ కార్యక్రమంలో యూనియన్ కేంద్ర ఉపాధ్యక్షులు మీస కొమురయ్య సహా పలువురు నాయకులు పాల్గొన్నారు.

వేమనపల్లి, ఆర్. కె న్యూస్:  తెలంగాణ గ్రామీణ బ్యాంకులు ప్రవేశపెట్టే పథకాలను ఖాతాదారులు సద్వినియోగం చేసుకోవాలని నీల్వాయి తెలంగాణ గ్రామీణ బ్యాంక్ మేనేజర్ శివశంకర్ అన్నారు. బుధవారం చామనపల్లి గ్రామ పంచాయతీ పరిధిలోని బద్దంపల్లిలో బ్యాంక్ ఆధ్వర్యంలో ప్రజలకు అవగాహన సదస్సు నిర్వహించారు. అర్హులైన ఖాతాదారులందరూ ప్రధానమంత్రి జీవనజ్యోతి బీమా యోజన పథకంలో రూ. 436 చెల్లించి రూ.2 లక్షల బీమాను పొందలన్నారు. అటల్ పెన్షన్ యోజన పథకం, ఎస్బిఐ లైఫ్ ఇన్సూరెన్స్ పథకాలు ఉపయోగించుకోవాలని కోరారు.