14 April 2026

శ్రీరాంపూర్ బిఎంఎస్ కార్యాలయంలో ఘనంగా జయంతి వేడుకలు

నస్పూర్, ఆర్.కె న్యూస్: భారతరత్న, రాజ్యాంగ నిర్మాత డాక్టర్ బి.ఆర్. అంబేద్కర్ 135వ జయంతి వేడుకలను శ్రీరాంపూర్ ఏరియాలోని సింగరేణి కోల్ మైన్స్ కార్మిక సంఘ్ (బిఎంఎస్) కార్యాలయం వద్ద మంగళవారం ఘనంగా నిర్వహించారు. ఏరియా వైస్ ప్రెసిడెంట్ నాతాడి శ్రీధర్ రెడ్డి అధ్యక్షతన జరిగిన ఈ కార్యక్రమంలో నాయకులు బాబాసాహేబ్ చిత్రపటానికి పూలమాలలు వేసి ఘన నివాళులర్పించారు. ఈ సందర్భంగా శ్రీధర్ రెడ్డి మాట్లాడుతూ అంబేద్కర్ గారు కేవలం ఒక వర్గానికే పరిమితం కాదని, న్యాయవాదిగా, ఆర్థికవేత్తగా, సామాజిక సంస్కర్తగా ఆయన భారతీయులందరి గుండెల్లో ఎప్పటికీ నిలిచిపోయే మహనీయుడని కొనియాడారు. అంటరానితనాన్ని వ్యతిరేకిస్తూ దళితులు, మహిళలు, కార్మికుల హక్కుల కోసం ఆయన అలుపెరగని పోరాటం చేశారని గుర్తు చేశారు. దేశంలోని అన్ని మతాలు, కులాలు, వెనుకబడిన వర్గాలకు సమన్యాయం జరిగేలా అంబేద్కర్ అత్యున్నతమైన రాజ్యాంగాన్ని రూపొందించారని, తద్వారా భారతదేశ ఖ్యాతిని ప్రపంచ దేశాలకు చాటిచెప్పారని ఆయన పేర్కొన్నారు. దేశవ్యాప్తంగా అన్ని వర్గాల ప్రజలు ఆయన ఆశయాలను స్ఫూర్తిగా తీసుకుని ముందుకు సాగాలని పిలుపునిచ్చారు. ఈ వేడుకల్లో పబ్బతినేని కమలాకర్ రావు ప్రత్యేక అతిథిగా హాజరయ్యారు. ఈ కార్యక్రమంలో బిఎంఎస్ జాయింట్ సెక్రటరీలు భూంపల్లి రమేష్, బోయిన మల్లయ్య, దుంపల శ్రీధర్, ఆర్గనైజింగ్ సెక్రటరీ జెల్ల తిరుపతి, డివిజన్ నాయకులు చల్లా ప్రశాంత్, బొమ్మకంటి కిషన్, పిట్ సెక్రటరీలు కొమ్మ బాపు, కాంపల్లి తిరుపతి, అసిస్టెంట్ పిట్ సెక్రటరీలు కుమ్మరి చంద్రశేఖర్, కుంట రాజు, చల్లా శ్రీనివాస్, ప్రైవేట్ సెక్టార్ ప్రతినిధులు నీరటి సురేష్ కుమార్, కానవేన స్వామి, మిట్టపల్లి మొగిలి తదితరులు పాల్గొన్నారు.

• శ్రీరాంపూర్ సీఐ అశోక్
• అంబేద్కర్ గ్రౌండ్‌లో రోడ్డు భద్రతపై అవగాహన కార్యక్రమం

నస్పూర్, ఆర్.కె న్యూస్: ప్రతి వాహనదారుడు ట్రాఫిక్ నిబంధనలను పాటిస్తూ క్షేమంగా గమ్యస్థానాలకు చేరుకోవడమే లక్ష్యంగా పెట్టుకోవాలని శ్రీరాంపూర్ సీఐ అశోక్ పిలుపునిచ్చారు. మంగళవారం నస్పూర్ మండలం శ్రీరాంపూర్ అంబేద్కర్ గ్రౌండ్‌లో స్థానిక అంబేద్కర్ సంఘం ఆధ్వర్యంలో నిర్వహించిన డాక్టర్ బి.ఆర్. అంబేద్కర్ జయంతి వేడుకల్లో ఆయన పాల్గొన్నారు. ఈ సందర్భంగా ఏర్పాటు చేసిన రోడ్డు భద్రత అవగాహన కార్యక్రమంలో ప్రజలకు ట్రాఫిక్ నిబంధనలు, హెల్మెట్ ప్రాధాన్యతపై అవగాహన కల్పించారు. అనంతరం సింగరేణి కార్మికులను ఉద్దేశించి మాట్లాడుతూ, ప్రస్తుతం దేశవ్యాప్తంగా జరుగుతున్న రోడ్డు ప్రమాదాలు ఒక పెను సమస్యగా మారాయని ఆందోళన వ్యక్తం చేశారు. ప్రధానంగా వాహనదారులు ట్రాఫిక్ నియమాలను పాటించకపోవడం వల్లే ఈ ప్రమాదాలు జరుగుతున్నాయని, హత్యల ద్వారా సంభవించే మరణాల కంటే రోడ్డు ప్రమాదాల వల్ల ప్రాణాలు కోల్పోతున్న వారి సంఖ్యే అధికంగా ఉందని సీఐ వివరించారు. పోలీసులు, ప్రభుత్వాలు ఎన్ని చర్యలు తీసుకున్నా, వాహనదారులు తమ వ్యక్తిగత బాధ్యతగా భావించి నిబంధనలు పాటించినప్పుడే ఈ ప్రమాదాలకు చెక్ పెట్టగలమని స్పష్టం చేశారు. ప్రతి వాహనదారుడు ఖచ్చితంగా హెల్మెట్ ధరించాలని, మద్యం మత్తులో వాహనం నడపడం వల్ల తమకే కాకుండా ఇతరుల ప్రాణాలకు కూడా ముప్పు వాటిల్లుతుందని హెచ్చరించారు. అదేవిధంగా కారు నడిపే సమయంలో తప్పనిసరిగా సీట్ బెల్ట్ ధరించాలని మరియు చిన్న పిల్లలకు వాహనాలను ఇవ్వకూడదని ఆయన సూచించారు. ఈ కార్యక్రమంలో శ్రీరాంపూర్ ఎస్సై సంతోష్, కార్పొరేటర్లు వేల్పుల రవీందర్, రాజేశ్వరి, సింగరేణి బీసీ ఉద్యోగుల సంఘం శ్రీరాంపూర్ బ్రాంచ్ సెక్రటరీ బరపటి మారుతి, తోకల సురేష్, అనపర్తి రాజేష్, పోలీస్ సిబ్బంది, అంబేద్కర్ సంఘం సభ్యులు, స్థానిక ప్రజలు పాల్గొన్నారు.