30 April 2026

• శ్రీరాంపూర్ జీఎం మునిగంటి శ్రీనివాస్
• పదవ తరగతిలో 100 శాతం ఉత్తీర్ణతతో విద్యార్థుల ఘనత

నస్పూర్, ఆర్.కెన్యూస్: సింగరేణి వ్యాప్తంగా ఉన్న పాఠశాలల్లో శ్రీరాంపూర్ సింగరేణి హైస్కూల్ విద్యార్థులు నూటికి నూరు శాతం ఉత్తీర్ణత సాధించడంతో పాటు అత్యుత్తమ మార్కులు సాధించడం గర్వకారణమని శ్రీరాంపూర్ ఏరియా జీఎం మునిగంటి శ్రీనివాస్ ప్రశంసించారు. బుధవారం విడుదలైన తెలంగాణ పదవ తరగతి వార్షిక ఫలితాలలో ఈ పాఠశాల విద్యార్థులు అద్భుత ప్రతిభ కనబరిచారు. గత విద్యాసంవత్సరంలో 98 శాతం ఉత్తీర్ణత నమోదు కాగా ఈ ఏడాది 100 శాతం ఫలితాలతో సింగరేణి ఏరియాలోనే అగ్రగామిగా నిలిచింది. సింగరేణి కాంట్రాక్ట్ ఉద్యోగి కుమార్తె బి. శ్రీనిధి 559 మార్కులతో స్కూల్ టాపర్‌గా నిలవడమే కాకుండా మండల స్థాయిలో మూడవ స్థానం కైవసం చేసుకుంది. మొత్తం 12 మంది విద్యార్థులు 500కు పైగా మార్కులు సాధించి పాఠశాల కీర్తిని చాటారు. టాపర్‌గా నిలిచిన శ్రీనిధితో పాటు 549 మార్కులు సాధించిన మహిదర్, 526 మార్కులు పొందిన నూరాన్‌లను జీఎం ప్రత్యేకంగా అభినందించారు. విద్యార్థుల శ్రమ, ఉపాధ్యాయుల కృషితోనే ఈ విజయం సాధ్యమైందని ఆయన పేర్కొన్నారు. అత్యుత్తమ ఫలితాలు సాధించడంలో కీలక పాత్ర పోషించిన కరస్పాండెంట్ ఎం. రాజేష్, హెడ్ మాస్టర్ బి. శ్రీనివాస్, ఉపాధ్యాయ బృందాన్ని జీఎం అభినందించారు. కార్పొరేట్ జీఎం (ఎడ్యుకేషన్) వెంకటాచారి సైతం విద్యార్థులకు, ఉపాధ్యాయులకు శుభాకాంక్షలు తెలియజేసినట్లు హెడ్ మాస్టర్ వెల్లడించారు. ఈ కార్యక్రమంలో శ్రీరాంపూర్ ఎస్ఓటు జీఎం ఎన్. సత్యనారాయణ, డీజీఎం రాజన్న, పాఠశాల సిబ్బంది, విద్యార్థులు పాల్గొన్నారు.

• ఆర్.కె-7 గ్రూప్ ఏజెంట్ రాజేందర్
• ఆర్.కె న్యూటెక్ గనిలో జూనియర్ మైనింగ్ అధికారి కరుణాకర్ రాజు పదవీ విరమణ

నస్పూర్, ఆర్.కె న్యూస్: సింగరేణి సంస్థ అభివృద్ధిలోనూ, ఉత్పత్తి లక్ష్యాల సాధనలోనూ ఉద్యోగుల సేవలు మరువలేనివని ఆర్.కె-7 గ్రూప్ ఏజెంట్ కె. రాజేందర్ పేర్కొన్నారు. శ్రీరాంపూర్ ఏరియాలోని ఆర్.కె న్యూటెక్ గనిలో జూనియర్ మైనింగ్ అధికారిగా సుదీర్ఘకాలం విధులు నిర్వహించి పదవీ విరమణ పొందిన కరుణాకర్ రాజును గురువారం ఘనంగా సన్మానించారు. ఈ సందర్భంగా ఏర్పాటు చేసిన వీడ్కోలు సమావేశంలో ఎస్టీపీపీ డీజీఎం ఈ. స్వామి రాజు, గని మేనేజర్ కె. శ్రీనివాసుతో కలిసి రాజేందర్ ఆయనను శాలువాతో సత్కరించారు. సుదీర్ఘ సర్వీసు కాలంలో కరుణాకర్ రాజు కంపెనీకి అందించిన సేవలను అధికారులు ఈ సందర్భంగా కొనియాడారు. విధి నిర్వహణలో ఆయన చూపిన నిబద్ధత అందరికీ ఆదర్శనీయమని ప్రశంసించారు. పదవీ విరమణ తర్వాత ఆయన శేష జీవితం ఆయురారోగ్యాలతో సుఖసంతోషంగా గడవాలని ఆకాంక్షించారు. ఈ కార్యక్రమంలో సేఫ్టీ అధికారి కొట్టే రమేష్, సీనియర్ సంక్షేమ అధికారి పాల్ సృజన్, పిట్ కార్యదర్శి ఆకుల లక్ష్మణ్, ఇంజనీర్ కృష్ణ, టీబీజీకేఎస్ ప్రధాన కార్యదర్శి సురేందర్ రెడ్డి, ఐఎన్‌టీయూసీ కేంద్ర నాయకుడు గరిగె స్వామి, గని అధికారులు, కార్మిక సంఘాల నాయకులు తదితరులు పాల్గొన్నారు.

32 మందిలో 25 మందికి 500 పైగా మార్కులు.. 100 శాతం ఉత్తీర్ణత

మంచిర్యాల, ఆర్.కె న్యూస్: బుధవారం వెలువడిన తెలంగాణ పదో తరగతి ఫలితాల్లో మంచిర్యాల నారాయణ హైస్కూల్ విద్యార్థులు అద్భుత ప్రతిభ కనబరిచారు. పాఠశాలకు చెందిన విద్యార్థులందరూ ఉత్తీర్ణత సాధించి వంద శాతం ఫలితాలు నమోదు చేశారు. మొత్తం 32 మంది విద్యార్థులు పరీక్షలు రాయగా 25 మంది 500 కంటే ఎక్కువ మార్కులు సాధించి జిల్లా, రాష్ట్ర స్థాయి ర్యాంకులను కైవసం చేసుకున్నారు. విద్యార్థుల ప్రతిభతో పాఠశాల స్థాయిని మరోసారి చాటినట్లు నిర్వాహకులు తెలిపారు. విద్యార్థుల ఘన విజయంపై పాఠశాల డీజీఎం వెంకటరమణ రెడ్డి, ఏజీఎం చైతన్య రావు, ప్రిన్సిపాల్ స్రవంతి స్పందించారు. విద్యార్థుల పట్టుదల, క్రమశిక్షణతో పాటు ఉపాధ్యాయుల నిరంతర బోధన వల్లే ఈ అద్భుత ఫలితాలు సాధ్యమయ్యాయని పేర్కొన్నారు. ఉన్నత లక్ష్యాలను నిర్దేశించుకుని చదివిన విద్యార్థులకు, వెన్నంటి ప్రోత్సహించిన తల్లిదండ్రులకు అభినందనలు తెలియజేశారు. డీన్ వెంకటస్వామి, ఏజీఎం అనాలసిస్ రాజేందర్, ఏఓ కిషన్ ఈ విజయం పట్ల హర్షం వ్యక్తం చేశారు. పదో తరగతిలో ఉత్తమ ఫలితాలు సాధించిన విద్యార్థులకు పాఠశాల యాజమాన్యం, ఉపాధ్యాయ బృందం ప్రత్యేక అభినందనలు తెలిపింది. విద్యార్థులు భవిష్యత్తులో మరిన్ని ఉన్నత శిఖరాలను అధిరోహించాలని ఆకాంక్షించారు. ఫలితాలు వెలువడిన అనంతరం పాఠశాల ఆవరణలో టపాసులు కాల్చి విద్యార్థులు, ఉపాధ్యాయులు పెద్ద ఎత్తున సంబరాలు జరుపుకున్నారు.