18 September 2026

శాంతిభద్రతల పరిరక్షణకే మొదటి ప్రాధాన్యత: నూతన ఎస్సై

నస్పూర్,ఆర్.కె న్యూస్: సీసీసీ నస్పూర్ సబ్ ఇన్‌స్పెక్టర్‌గా 2014 బ్యాచ్‌కు చెందిన ఎండీ తహిసీనుద్దీన్ శుక్రవారం బాధ్యతలు స్వీకరించారు. రామగుండం కమిషనరేట్ ఐటీ కోర్ విభాగం నుంచి బదిలీపై ఆయన ఇక్కడికి వచ్చారు. కాగా, ఇప్పటివరకు ఇక్కడ ఎస్సైగా విధులు నిర్వర్తించిన మేకల ప్రశాంత్ తాళ్లగురిజాలకు బదిలీ అయ్యారు. బాధ్యతల స్వీకరణ అనంతరం నూతన ఎస్సై తహిసీనుద్దీన్ మాట్లాడుతూ.. ఠాణా పరిధిలో శాంతిభద్రతల పరిరక్షణకు, ప్రజల భద్రతకు అత్యధిక ప్రాధాన్యత ఇస్తానని స్పష్టం చేశారు. అసాంఘిక కార్యకలాపాలకు పాల్పడేవారిపై, శాంతికి భంగం కలిగించేవారిపై చట్టపరంగా కఠిన చర్యలు ఉంటాయని హెచ్చరించారు. బాధితులు నిర్భయంగా పోలీస్ స్టేషన్‌ను ఆశ్రయించి సమస్యలు చెప్పుకోవచ్చని, ఫిర్యాదులపై తక్షణమే స్పందించి న్యాయం చేస్తామని భరోసా ఇచ్చారు. ప్రస్తుతం కొనసాగుతున్న వినాయక నవరాత్రి ఉత్సవాలను నిబంధనలకు లోబడి, డీజేలు లేకుండా శాంతియుత వాతావరణంలో జరుపుకోవాలని మండళ్ల నిర్వాహకులకు సూచించారు. రోడ్డు ప్రమాదాల నివారణకు వాహనదారులు విధిగా హెల్మెట్, సీటుబెల్ట్ ధరిస్తూ ట్రాఫిక్ నిబంధనలను పాటించాలని కోరారు. నూతనంగా బాధ్యతలు స్వీకరించిన ఎస్సై తహిసీనుద్దీన్‌కు పోలీస్ స్టేషన్ సిబ్బంది శుభాకాంక్షలు తెలిపారు. శాంతిభద్రతల పర్యవేక్షణలో సిబ్బంది సమష్టిగా పనిచేసి ఠాణాకు మంచి గుర్తింపు తీసుకురావాలని ఈ సందర్భంగా ఆయన సూచించారు.

తెలంగాణ మున్నూరు కాపు సంఘం (పటేల్స్) రాష్ట్ర అధ్యక్షుడు కొండ దేవయ్య

నస్పూర్‌లో సంఘం వెబ్‌సైట్ ఆవిష్కరణ

నస్పూర్, ఆర్.కె న్యూస్: తెలంగాణ మున్నూరు కాపు (పటేల్స్) కులస్తులంతా విధిగా సంఘం సభ్యత్వాన్ని స్వీకరించి, జనాభా ప్రాతిపదికన హక్కులు సాధించుకుంటూ రాజ్యాధికారం దిశగా ముందుకు సాగాలని తెలంగాణ మున్నూరు కాపు సంఘం (పటేల్స్) రాష్ట్ర అధ్యక్షుడు కొండ దేవయ్య పిలుపునిచ్చారు. నస్పూర్ ప్రెస్ క్లబ్‌లో శుక్రవారం ఏర్పాటు చేసిన విలేకరుల సమావేశంలో ఆయన మాట్లాడారు. అనంతరం సంఘం అధికారిక వెబ్‌సైట్‌ను ఆవిష్కరించారు. ఈ సందర్భంగా కొండ దేవయ్య మాట్లాడుతూ… ఒకే కులం – ఒకే సంఘం నినాదంతో మున్నూరు కాపులంతా ఐక్యంగా ఉండాలని కోరారు. రాష్ట్రంలో తమ కుల జనాభాను వాస్తవ సంఖ్య కంటే తక్కువగా చూపించడం వల్ల రాజకీయంగా, ఉద్యోగ, ఉపాధి అవకాశాల్లో తీవ్ర అన్యాయం జరిగిందని ఆవేదన వ్యక్తం చేశారు. పేర్ల చివర రావు అని ఉన్న మున్నూరు కాపులను ఇతర కులాల్లో కలపడం వల్లే ఈ పరిస్థితి తలెత్తిందన్నారు. ప్రత్యేక రాష్ట్రంలో న్యాయం జరుగుతుందని ఆశిస్తే, గత ప్రభుత్వంతో పాటు ప్రస్తుత ప్రభుత్వం కూడా నిర్లక్ష్య వైఖరినే అవలంబిస్తోందని విమర్శించారు. ప్రపంచంలో ఎక్కడ ఉన్నవారైనా సంఘం వెబ్‌సైట్ ద్వారా సభ్యత్వం నమోదు చేసుకోవాలని, అందరూ చొరవ చూపకపోతే జనాభా లెక్కల్లో మొదటి స్థానం నుంచి ఐదో స్థానానికి పడిపోయే ప్రమాదం ఉందని హెచ్చరించారు. అలాగే ప్రభుత్వం ప్రకటించిన మున్నూరు కాపు కార్పొరేషన్‌కు తక్షణమే రూ. 1,000 కోట్ల నిధులు కేటాయించాలని డిమాండ్ చేశారు. ఈ సమావేశంలో మున్నూరు కాపు సంఘం రాష్ట్ర వర్కింగ్ ప్రెసిడెంట్ బోరిగాం రాజారాం, నాయకులు పానుగంటి శ్రీనివాస్, నాయకులు శ్రీపతి శ్రీనివాస్, శ్రీపతి సురేష్ కుమార్, నరెడ్ల శ్రీనివాస్, కాశ రాజు, ఆకుల మహేందర్, రవికుమార్ తదితరులు పాల్గొన్నారు.

శ్రీ శ్రీ శ్రీ లక్ష్మీ గణేష్ మండలి ఆధ్వర్యంలో భక్తిశ్రద్ధలతో వినాయక నవరాత్రి ఉత్సవాలు
భక్తులకు అన్నదాన వితరణ, తీర్థప్రసాదాల పంపిణీ

నస్పూర్, ఆర్.కె న్యూస్: నస్పూర్ సింగరేణి రిటైర్డ్ కాలనీలోని శ్రీ శ్రీ శ్రీ లక్ష్మీ గణేష్ మండలి ఆధ్వర్యంలో వినాయక చవితి నవరాత్రి ఉత్సవాలు వైభవంగా సాగుతున్నాయి. ఉత్సవాల్లో భాగంగా గణనాథుని మండప ప్రాంగణంలో మహిళలు పెద్ద సంఖ్యలో పాల్గొని భక్తిశ్రద్ధలతో సామూహిక కుంకుమార్చన పూజలు నిర్వహించారు. కాలనీ ప్రజలందరూ ఆయురారోగ్యాలు, సకల శుభాలతో వర్ధిల్లాలని కోరుతూ పూజా కార్యక్రమాల్లో పాల్గొన్నారు. అర్చకుల వేదమంత్రోచ్ఛారణల నడుమ వినాయకుడికి విశేష పూజలు చేసిన మహిళలు, కుంకుమార్చన గావించి స్వామివారికి నైవేద్యాలు సమర్పించి మహాహారతి ఇచ్చారు. అనంతరం నాంపల్లి తిరుపతి, గాండ్ల సుధీర్ భక్తులకు అన్నదాన కార్యక్రమం నిర్వహించగా, మండలి ప్రతినిధులు తీర్థప్రసాదాలు పంపిణీ చేశారు. ఈ కార్యక్రమంలో మండలి నిర్వాహకులు మేడం తిరుపతి, ఎంబండి సమ్మయ్య, గడ్డం చంద్రయ్య, బెడద మహేందర్, కనవేని ఓదెలు, లశెట్టి గంగాధర్, రామంచ సంపత్, ఆంజనేయ ప్రసాద్, ముష్కే రవి, కాలనీ పెద్దలు, భక్తులు పాల్గొన్నారు.

• నస్పూర్ మండల కేంద్రంలో తెలంగాణ రాజ్యాధికార పార్టీ బైక్ ర్యాలీ

• తీన్మార్ మల్లన్న నాయకత్వంలోనే బీసీల రాజ్యం సాధ్యం

నస్పూర్, ఆర్.కె న్యూస్: బహుజనుల రాజ్యాధికారమే లక్ష్యంగా పార్టీ వ్యవస్థాపక అధ్యక్షుడు తీన్మార్ మల్లన్న రాజ్యాధికార పాదయాత్రను ప్రారంభించారని తెలంగాణ రాజ్యాధికార పార్టీ మంచిర్యాల జిల్లా అధ్యక్షుడు మహేష్ వర్మ తెలిపారు. నస్పూర్ మండల కేంద్రంలో బూర రవీందర్ అధ్యక్షతన నిర్వహించిన బైక్ ర్యాలీకి ఆయన నాయకత్వం వహించారు. ఈ సందర్భంగా మహేష్ వర్మ మాట్లాడుతూ, పార్టీ ఆవిర్భవించిన ఏడాది కాలంలో అనేక ప్రజా కార్యక్రమాలను విజయవంతంగా నిర్వహించి ప్రజల్లో చైతన్యం తెచ్చామని పేర్కొన్నారు. ఎవరెంతో వారికంత వాటా అందించేందుకే ఈ యాత్రను జిల్లావ్యాప్తంగా కొనసాగిస్తున్నట్లు ఆయన వివరించారు. రానున్న రోజుల్లో ప్రజా సమస్యలపై పోరాటాలు ఉధృతం చేస్తూ, ప్రభుత్వ వైఫల్యాలను ఎండగడతామని చెప్పారు. వచ్చేది బీసీల రాజ్యమేనని, తీన్మార్ మల్లన్న నాయకత్వంలోనే రాజ్యాధికార సాధన సాధ్యమవుతుందని ధీమా వ్యక్తం చేశారు. ఉద్యమాన్ని నీరుగార్చే ప్రయత్నం చేసేవారిని ఉపేక్షించబోమని హెచ్చరించారు. అగ్రవర్ణాల రాజకీయ ఆధిపత్యాన్ని అంతం చేసేందుకు బహుజన వర్గాలు ఏకమై మద్దతు తెలపాలని పిలుపునిచ్చారు. ఈ కార్యక్రమంలో జిల్లా నాయకులు పాకాల దినకర్, పడాల శివతేజ, దాస్యపు దీపక్, మహమ్మద్ లతీఫ్, సీపతి సాయి కుమార్, మండల నాయకులు బొంగోని విద్యాసాగర్, గణవేణి నగేష్, మంతెన సాయిరామ్, తాళ్లపెల్లి రమేష్, షేక్ అక్తర్, జెలంపెల్లి రవి, తాళ్లపెల్లి సంపత్, జెలంపేల్లి తిరుమలేష్ పాల్గొన్నారు.