KYATHAM RAJESH

• టీడబ్ల్యూజెఎఫ్ ఆధ్వర్యంలో వినతి పత్రం అందజేత

నస్పూర్, ఆర్.కె న్యూస్: దీర్ఘకాలికంగా అపరిష్కృతంగా ఉన్న జర్నలిస్టుల సమస్యలు వెంటనే  పరిష్కరించాలని కోరుతూ తెలంగాణ వర్కింగ్ జర్నలిస్ట్ ఫెడరేషన్ మంచిర్యాల జిల్లా కమిటీ ఆధ్వర్యంలో మంగళవారం జిల్లా కలెక్టర్ కార్యాలయ అడ్మినిస్ట్రేటివ్ అధికారి పిన్న రాజేశ్వర్ కు వినతి పత్రం అందజేశారు. ఈ సందర్భంగా టీడబ్ల్యూజెఎఫ్ మంచిర్యాల జిల్లా అధ్యక్ష కార్యదర్శులు తోట్ల మల్లేష్ యాదవ్, చింతకింది మధుసూదన్ లు మాట్లాడుతూ, జర్నలిస్టులు ప్రభుత్వానికి ప్రజలకు మధ్య వారధిగా ఉంటూ ప్రజా సమస్యలను ప్రభుత్వానికి తెలియజేయడంతో పాటు ప్రభుత్వ సంక్షేమ పథకాలు ప్రజలకు అందడంలో  కీలక పాత్ర పోషిస్తున్నారని, రాష్ట్రంలో ప్రభుత్వాలు మారినా  జర్నలిస్టులకు ఇళ్ల స్థలాల పంపిణీ చేయడం లేదని, జర్నలిస్టులు చాలి చాలని జీతాలతో కాలం వెళ్ళదిస్తున్నారని పేర్కొన్నారు. రాష్ట్ర ప్రభుత్వం స్పందించి తక్షణమే అర్హులైన జర్నలిస్టులకు ఇండ్ల స్థలాలు మంజూరు డిమాండ్ చేశారు. అక్రిడిటేషన్ కార్డుల కాలపరిమితిని స్టిక్కర్లతో పునరుద్ధరించకుండా కొత్త కార్డులు మంజూరు చేయాలని, ప్రైవేటు పాఠశాలల్లో చదువుతున్న జర్నలిస్టుల పిల్లలకు ఉచిత విద్యను అందజేయాలని, కరోనా సమయంలో నిలిపివేసిన జర్నలిస్ట్ రైల్వే పాసులను వెంటనే పునరుద్ధరించాలని అన్నారు. జర్నలిస్టుల సమస్యల పరిష్కారం కొరకు త్వరలో తెలంగాణ వర్కింగ్ జర్నలిస్ట్ ఫెడరేషన్ ఆధ్వర్యంలో ఉద్యమ కార్యాచరణ ప్రకటిస్తామని అన్నారు. ఈ కార్యక్రమంలో తెలంగాణ వర్కింగ్ జర్నలిస్ట్స్ ఫెడరేషన్ జిల్లా కోశాధికారి క్యాతం రాజేష్, ఉపాధ్యక్షులు గొర్రె లక్ష్మణ్, అరికెళ్ల జీవన్ బాబు, నాయకులు అహ్మద్, జర్నలిస్టులు పాల్గొన్నారు.

•  సిపిఐ జాతీయ కార్యవర్గ సభ్యులు చాడ వెంకటరెడ్డి
•  ఆగస్టు 22, 23వ తేదీల్లో సిపిఐ రాష్ట్ర మహాసభలు

నస్పూర్, ఆర్.కె న్యూస్: తెలంగాణ రాష్ట్రంలో సంక్షేమ పథకాలు అమలు చేయడం కాంగ్రెస్ ప్రభుత్వం విఫలం అయ్యిందని సిపిఐ జాతీయ కార్యవర్గ సభ్యులు చాడ వెంకటరెడ్డి అన్నారు. ఆదివారం స్థానిక నర్సయ్య భవన్ లో కామ్రేడ్ ఉమా, కామ్రేడ్ చిలుక రామచందర్, కామ్రేడ్ మర్రి సందీప్, కామ్రేడ్ ఎండి అఫ్రోజ్ ఖాన్ అధ్యక్షతన నిర్వహించిన భారత కమ్యూనిస్టు పార్టీ నస్పూర్ మండల మూడో మహాసభకు సిపిఐ రాష్ట్ర కార్యదర్శి వర్గ సభ్యులు కలవేన శంకర్ తో కలిసి హాజరయ్యారు. షిర్కే సెంటర్ నుండి నర్సయ్య భవన్ వరకు సిపిఐ శ్రేణులు భారీ ప్రదర్శన నిర్వహించారు. సిపిఐ సీనియర్ నాయకుడు అల్లా లచ్చి రెడ్డి పార్టీ పతాక ఆవిష్కరణ చేశారు. పార్టీ సీనియర్ నాయకులు డికొండ మల్లన్న అమరవీరుల స్థూపానికి పూలమాలవేసి నివాళులర్పించారు. ఈ సందర్భంగా సిపిఐ జాతీయ కార్యవర్గ సభ్యులు చాడ వెంకటరెడ్డి మాట్లాడుతూ, ప్రస్తుతం కేంద్ర, రాష్ట్ర ప్రభుత్వాలు క్లిష్ట పరిస్థితుల్లో పాలన కొనసాగిస్తున్నాయని, కాంగ్రెస్ ప్రభుత్వం సంక్షేమ పథకాల విఫలం అయ్యిందని, ఆరు గ్యారెంటీల్లో మూడు గ్యారంటీలు మాత్రమే అమలు చేసిందని, ఇప్పటికైనా మిగతా మూడు సంక్షేమ పథకాలు అమలు చేయాలని పేర్కొన్నారు. కేంద్ర ప్రభుత్వం ఆపరేషన్ కగార్ తక్షణమే నిలిపివేసి, చర్చలు జరపాలని అన్నారు. రాబోయే స్థానిక సంస్థల ఎన్నికల్లో అన్ని స్థానాల్లో కమ్యూనిస్టు పార్టీ పోటీ చేస్తుందని, నూతనంగా ఏర్పడిన మంచిర్యాల కార్పొరేషన్ అన్ని స్థానాల్లో అభ్యర్థులను ఆదరించాలని ప్రజలను కోరారు. ఆగస్టు 22, 23వ తేదీల్లో మేడ్చల్ లో రాష్ట్ర మహాసభలు, సెప్టెంబర్ నెలలో  పంజాబ్ రాష్ట్రంలోని చండీగఢ్ లో  జాతీయ మహాసభలు జరుగనున్నట్లు తెలిపారు. సిపిఐ శ్రేణులు, ప్రజలు పెద్ద సంఖ్యలో పాల్గొని  పాల్గొని రాష్ట్ర, జాతీయ సభలను విజయవంతం చేయాలని కోరారు. ఈ కార్యక్రమంలో సిపిఐ జిల్లా కార్యదర్శి రామడుగు లక్ష్మణ్, కార్యవర్గ సభ్యులు ఆహ్వాన సంఘం అధ్యక్షులు మేకల దాస్, కార్యదర్శి జోగుల మల్లయ్య, జిల్లా కార్యవర్గ సభ్యులు రేగుంట చంద్రశేఖర్, కే వీరభద్రయ్య, లింగం రవి, ముస్కె సమ్మయ్య, ఎస్కే బాజీ సైదా, రేగుంట చంద్రకళ, మోత్కూరు కొమురయ్య, ఎండి అఫ్రోజ్ ఖాన్,  దొడ్డిపట్ల రవీందర్, మొగిలి లక్ష్మణ్ తదితరులు పాల్గొన్నారు.

• గ్లోబల్ మున్నూరు కాపు మహాసభ గోడ ప్రతుల ఆవిష్కరణ
• తెలంగాణ మున్నూరు కాపు సంఘం రాష్ట్ర అధ్యక్షుడు కొండ దేవయ్య

నస్పూర్, ఆర్.కె న్యూస్: తెలంగాణలో అత్యధిక సంఖ్యలో ఉన్న మున్నూరు కాపులు ఒకే కులం ఒకే సంఘంగా బలోపేతం అవుదామని తెలంగాణ మున్నూరు కాపు సంఘం రాష్ట్ర అధ్యక్షుడు కొండ దేవయ్య, వర్కింగ్ ప్రెసిడెంట్ బోరిగం రాజారాంలు అన్నారు. గురువారం నస్పూర్ ప్రెస్ క్లబ్ లో  ఏర్పాటు చేసిన విలేకర్ల సమావేశంలో వారు మాట్లాడుతూ,  తెలంగాణ వ్యాప్తంగా గ్రామ, మున్సిపాలిటీ, కార్పొరేషన్, జిల్లా స్థాయిలో 12 వేల కమిటీలు ఏర్పాటు చేయనున్నట్లు తెలిపారు. సంఘంలో సభ్యులుగా ఉన్న వారు ప్రజాస్వామ్య పద్ధతిలో ఓటింగ్ ప్రక్రియ ద్వారా కమిటీలను ఎన్నుకోవడం జరుగుతుందన్నారు. బీసీల్లో అత్యధిక సంఖ్యలో ఉన్న మున్నూరు కాపులను ప్రభుత్వం తక్కువగా చూపించిందని, బీసీల్లో 18 శాతంగా మొదటి స్థానంలో ఉన్న తమను 5వ స్థానంలో చూపారని ఆరోపించారు. తెలంగాణలో 40 లక్షల మంది మున్నూరు కాపులు ఉన్నారని చెప్పారు. కేంద్ర ప్రభుత్వం కుల గణన నిర్ణయం తీసుకోవడం హర్షనీయమన్నారు. మున్నూరు కాపు కార్పొరేషన్ ఏర్పాటు చేసి 500 కోట్లు కేటాయించాలని, ప్రోత్సాహక రుణాలు ఇవ్వాలని, మున్నూరు కాపు ఆత్మగౌరవ భవనం నిర్మాణానికి 10 కోట్లు కేటాయించాలని, తెలంగాణ రాష్ట్ర మంత్రివర్గంలో మున్నూరు కాపులకు చోటు కల్పించాలని పేర్కొన్నారు. జనాభా ప్రాతిపదికన తమకు వాటా అన్ని రంగాల్లో కల్పించాలని డిమాండ్ చేశారు. తెలంగాణ మున్నూరు కాపులకు పటేల్ గా గెజిట్ విడుదల చేయాలన్నారు. అనంతరం అమెరికాలో ఆగస్టు 30, 31 తేదీల్లో జరగనున్న గ్లోబల్ మున్నూరు కాపు సభ గోడ ప్రతులను ఆవిష్కరించారు. ప్రపంచవ్యాప్తంగా ఉన్న మున్నూరు కాపులు ఈ మహా సభలో కలుసుకోనున్నారని, ప్రతి ఒక్కరు కుల సంఘంలో భాగస్వాములు కావాలని కోరారు. ఈ సమావేశంలో మున్నూరు కాపు సంఘం మంచిర్యాల నియోజకవర్గం అధ్యక్షుడు పల్లె భూమేష్, జిల్లా గౌరవ అధ్యక్షుడు గొంగల్ల శంకర్, కన్వీనర్ ఆకుల సత్తన్న, జిల్లా అధికార ప్రతినిధి భాస్కర్ల రాజేశం, నస్పూర్ మండల సమన్వయ కమిటీ సభ్యులు మైదం రామకృష్ణ, గుడాల మల్లేష్, రాళ్ళబండి రాజన్న, పూదరి కుమార్, చెన్నూర్ నియోజకవర్గం ఇంచార్జి బోరిగం వెంకటేశం, నాయకులు బొడ్డు చిన్నయ్య, సమ్మయ్య, విశాల్, కర్నె శ్రీనివాస్ తదితరులు పాల్గొన్నారు.

నస్పూర్,  ఆర్.కె న్యూస్: నస్పూర్ మండలంలోని కస్తూర్బా బాలికల పాఠశాలలో నిర్వహిస్తున్న సమ్మర్ క్యాంప్ లోని విద్యార్థులకు బుధవారం షీ టీం, భరోసా పై షీ టీం సభ్యులు విద్యార్థులకు అవగాహన సదస్సు నిర్వహించారు. ఈ సందర్భంగా షీ టీం ఎస్ఐ ఉషారాణి మాట్లాడుతూ, ఆకతాయిల ఆట కట్టించి మహిళలకు రక్షణ కల్పించడం షి టీం కర్తవ్యమని, మహిళలు ఏదైనా సమస్య వస్తే వెంటనే పోలీసులకు ఫిర్యాదు చేయాలని, ఫిర్యాదు పై తక్షణమే షీ టీం పోలీసులు స్పందించి సంబంధిత విభాగాలకు సమాచారం అందజేయడం ద్వారా ఫిర్యాదు చేసిన మహిళకు సహాయం అందుతుందని తెలిపారు. వేధింపులకు గురవుతున్న మహిళలు 6303923700 నెంబర్ లో సంప్రదించాలని, అత్యవసర సమయంలో డయల్ 100 లో సంప్రదించాలని, ఫిర్యాదు చేసిన వారి వివరాలు గోప్యంగా ఉంచబడతాయని పేర్కొన్నారు. భరోసా సెంటర్ లీగల్ అడ్వైజర్ మాట్లాడుతూ, విద్యార్థులు చట్టాలపై అవగాహన కలిగి ఉండాలని, సోషల్ మీడియాకు దూరంగా ఉండాలని అన్నారు. సబ్ ఆర్డినేటర్ మాట్లాడుతూ, భరోసా సెంటర్ పని తీరును వివరించారు. ఈ కార్యక్రమంలో షీ టీం సభ్యులు శ్రవణ్, జ్యోతి, భరోసా సెంటర్ సభ్యులు, పాఠశాల సోషల్ ఆఫీసర్ మౌనిక, విద్యార్థులు తదితరులు పాల్గొన్నారు.