• 4వ డివిజన్ కార్పొరేటర్ గుమ్మడి శ్రీనివాస్
• ఆర్.కె-6 అంగన్‌వాడీ కేంద్రంలో రాష్ట్రీయ పోషణ్ మాసం

నస్పూర్, ఆర్.కె న్యూస్: గర్భిణులు, బాలింతలు, చిన్నారులు సమతుల్య పోషకాహారం తీసుకోవడం ద్వారానే సంపూర్ణ ఆరోగ్యాన్ని సాధించవచ్చని మంచిర్యాల మున్సిపల్ కార్పొరేషన్ 4వ డివిజన్ కార్పొరేటర్ గుమ్మడి శ్రీనివాస్ పేర్కొన్నారు. సెప్టెంబర్ 9 నుంచి అక్టోబర్ 8 వరకు అంగన్‌వాడీ కేంద్రాల్లో నిర్వహిస్తున్న రాష్ట్రీయ మిషన్ శక్తి – పోషణ్ మాసం కార్యక్రమంలో భాగంగా బుధవారం ఆర్కే-6 అంగన్‌వాడీ కేంద్రం-2లో ప్రత్యేక అవగాహన సదస్సు నిర్వహించారు. ఈ సందర్భంగా కార్పొరేటర్ గుమ్మడి శ్రీనివాస్ మాట్లాడుతూ.. మహిళలు, గర్భిణులు, బాలింతలు వ్యక్తిగత పరిశుభ్రతతో పాటు ప్రభుత్వం అందించే పౌష్టికాహారాన్ని క్రమం తప్పకుండా తీసుకోవాలని సూచించారు. అనంతరం అంగన్‌వాడీ కేంద్రంలో 3 నుంచి 6 సంవత్సరాల లోపు చిన్నారులకు సామూహిక అక్షరాభ్యాసం చేయించారు. పిల్లల తొలి అభ్యసనానికి, మానసిక వికాసానికి అంగన్‌వాడీ కేంద్రాలే పునాది అని, తల్లిదండ్రులు తమ పిల్లలను తప్పకుండా అంగన్‌వాడీ కేంద్రాలకు పంపించాలని పిలుపునిచ్చారు. ఈ కార్యక్రమంలో నస్పూర్ ఐసీడీఎస్ సూపర్‌వైజర్ రమాదేవి, 4వ వార్డు అధికారి మోటం నాగార్జున, మహిళా సాధికారత ప్రతినిధి విజయ, ఆర్థిక విద్యా నిపుణులు అప్పిక, లిప్స్, అంగన్‌వాడీ టీచర్లు సుమలత, శశికళ, కవిత, ఆయాలు, స్థానిక మహిళలు పాల్గొన్నారు.