24 March 2026

కలెక్టర్ కుమార్ దీపక్ కు విగ్రహ సాధన కమిటీ వినతి

నస్పూర్, ఆర్.కె న్యూస్: మంచిర్యాల జిల్లా కేంద్రంలో మాజీ ఉప ప్రధాని డాక్టర్ బాబు జగ్జీవన్ రామ్ విగ్రహ ఏర్పాటుకు స్థలం కేటాయించాలని కోరుతూ విగ్రహ సాధన కమిటీ సభ్యులు మంగళవారం జిల్లా కలెక్టర్ కుమార్ దీపక్ కు వినతి పత్రం అందజేశారు. స్వాతంత్ర సమరయోధుడు, సంఘసంస్కర్తగా భారతదేశానికి జగజ్జీవన్ రామ్ అందించిన విశేష సేవలను ఈ సందర్భంగా కమిటీ సభ్యులు గుర్తు చేశారు. దేశాభివృద్ధిలో కీలక పాత్ర పోషించిన ఆయన స్మారకార్థం జిల్లా కేంద్రంలో విగ్రహాన్ని ప్రతిష్టించాల్సిన అవసరం ఉందని అన్నారు. జగజ్జీవన్ రామ్ ఆశయాలను భావితరాలకు అందించడానికి విగ్రహ ఏర్పాటు దోహదపడుతుందని సభ్యులు పేర్కొన్నారు. జిల్లా యంత్రాంగం సానుకూలంగా స్పందించి తగిన స్థలాన్ని కేటాయించాలని కోరారు. ఈ కార్యక్రమంలో బాబు జగ్జీవన్ రామ్ విగ్రహ సాధన కమిటీ సభ్యులు చంద్రగిరి నరేష్, దాసరి విజయ్ సాగర్, తోటపల్లి మహేందర్, లింగంపెల్లి నరేష్, నునవత్ భీమ్యా నాయక్, కోండ్ర ఉదయ్ కిరణ్, గుంపుల స్వామి తదితరులు  పాల్గొన్నారు.

శ్రీరాంపూర్ జీఎంకు వినతిపత్రం అందజేత

నస్పూర్, ఆర్.కె న్యూస్: ట్రేడ్స్‌మెన్స్ ఎదుర్కొంటున్న దీర్ఘకాలిక సమస్యలను యాజమాన్యం తక్షణమే పరిష్కరించాలని ఐఎన్ టీయూసీ నాయకులు డిమాండ్ చేశారు. శ్రీరాంపూర్ ఏరియాలోని ట్రేడ్స్‌మెన్స్ పడుతున్న ఇబ్బందులను వివరిస్తూ మంగళవారం ఏరియా జనరల్ మేనేజర్ మునిగంటి శ్రీనివాస్‌కు యూనియన్ ప్రతినిధులు మెమోరాండం అందజేశారు. రక్షణ పరికరాల కొరత, పని భారం, వేతన వివక్ష వంటి అంశాలపై వారు నిరసన వ్యక్తం చేశారు. కార్మికుల భద్రతను విస్మరిస్తూ నిబంధనలు ఉల్లంఘిస్తే తీవ్ర పరిణామాలు ఉంటాయని ఈ సందర్భంగా హెచ్చరించారు. గనిలో పనిచేసే ట్రేడ్స్‌మెన్స్‌కు టూల్స్, టూల్ బ్యాగ్స్, సేఫ్టీ గ్లోవ్స్ వంటి ప్రాథమిక సదుపాయాలు కల్పించడం లేదని నాయకులు ఆరోపించారు. ఉద్యోగులే సొంతంగా పనిముట్లు కొనుక్కోవాల్సి రావడం దురదృష్టకరమని పేర్కొన్నారు. టెక్నీషియన్ల కొరత ఉన్నప్పటికీ ఉన్న సిబ్బందిపైనే అధిక పని భారం మోపుతున్నారని విమర్శించారు. అత్యవసర పనుల కోసం పిలిపించినప్పటికీ ఈ అండ్ ఎం సిబ్బందికి అదనపు మస్టర్లు లేదా ఓవర్ టైం ఇవ్వడం లేదని ఆవేదన వ్యక్తం చేశారు. మైనింగ్ సిబ్బందికి మాత్రమే ప్రాధాన్యత ఇస్తూ సాంకేతిక సిబ్బంది పట్ల స్పష్టమైన వివక్ష చూపుతున్నారని మండిపడ్డారు. గనుల్లో హెల్పర్లు లేకపోవడం, సరైన పర్యవేక్షణ లోపించడం వల్ల పని ప్రదేశాల్లో ఇబ్బందులు ఎదురవుతున్నాయని యూనియన్ నాయకులు ఆందోళన వ్యక్తం చేశారు. పాత విద్యుత్ వ్యవస్థ, కాలం చెల్లిన కేబుల్స్, సబ్‌స్టేషన్లు, బలహీనమైన కమ్యూనికేషన్ వ్యవస్థతో కార్మికుల ప్రాణాలకు ముప్పు పొంచి ఉందని వివరించారు. కోల్ మైన్స్ రెగ్యులేషన్స్ 2017, డీజీఎంఎస్ నిబంధనలను యాజమాన్యం తుంగలో తొక్కుతోందని ధ్వజమెత్తారు. కార్మికులకు కనీస విశ్రాంతి గదులు, పిట్ హెడ్ బాత్ సౌకర్యాలు కూడా లేవని గుర్తు చేశారు. సీనియారిటీ ప్రకారం పదోన్నతులు కల్పించాలని, డీజీఎంఎస్ నిబంధనల మేరకు రక్షణ శిక్షణ ఇవ్వాలని ఐఎన్ టీయూసీ కోరింది. ఎలక్ట్రీషియన్లకు తక్షణమే నాణ్యమైన పీపీఈ కిట్లు అందించాలని డిమాండ్ చేసింది. ఈ సమస్యలపై యాజమాన్యం సానుకూలంగా స్పందించి తక్షణ చర్యలు తీసుకోవాలని కోరారు. లేనిపక్షంలో యూనియన్ ఆధ్వర్యంలో పెద్ద ఎత్తున ఆందోళన కార్యక్రమాలు చేపడతామని హెచ్చరించారు. ఈ కార్యక్రమంలో జెట్టి శంకర్ రావు, పేరం రమేష్, గరిగె స్వామి, రవీందర్ రెడ్డి, గుర్రపు సతీష్, మరేపల్లి బాపు, మారుతి, గోపాల్ రెడ్డి, రమేష్, నంబయ్య తదితరులు పాల్గొన్నారు.

100 శాతం ఉత్పత్తి లక్ష్యం సాధించాలి: శ్రీరాంపూర్ జీఎం మునిగంటి శ్రీనివాస్

నస్పూర్, ఆర్.కె న్యూస్: అధికారులు, కార్మికులు సమన్వయంతో పనిచేసి ఆర్.కె 5 గనికి పూర్వవైభవం తీసుకురావాలని శ్రీరాంపూర్ ఏరియా జనరల్ మేనేజర్ మునిగంటి శ్రీనివాస్ పిలుపునిచ్చారు. మంగళవారం ఆయన ఆర్.కె 5 గనిని సందర్శించి అధికారులతో కలిసి భూగర్భంలోని పని ప్రదేశాలను పరిశీలించారు. 5వ సీమ్ డెవలప్మెంట్ డిస్ట్రిక్ట్‌లో బొగ్గు ఉత్పత్తి తీరుతెన్నులను క్షుణ్ణంగా తనిఖీ చేశారు. రక్షణతో కూడిన నాణ్యమైన బొగ్గు ఉత్పత్తి సాధన కోసం అధికారులకు పలు కీలక సూచనలు చేశారు. అంతకుముందు మేనేజర్ కార్యాలయంలో ఆర్థిక సంవత్సరం ముగింపు నేపథ్యంలో గని నిర్వహణ, రక్షణ, భద్రతా ప్రమాణాలపై సమీక్ష నిర్వహించారు. ప్రస్తుత ఆర్థిక సంవత్సరంలో ఇప్పటికే 95 శాతం ఉత్పత్తి లక్ష్యాన్ని చేరుకోవడం పట్ల ఆయన హర్షం వ్యక్తం చేశారు. మిగిలిన కొద్ది రోజుల్లో నూటికి నూరు శాతం వార్షిక ఉత్పత్తి సాధన దిశగా ప్రతి ఒక్కరూ కృషి చేయాలని ఆదేశించారు. 5వ సీమ్ నార్త్ సైడ్ లో మరింత బొగ్గు వెలికితీసే అవకాశం ఉందని ఈ సందర్భంగా గుర్తించారు. దీనివల్ల గని జీవితకాలం మరో రెండు లేదా మూడేళ్లు పెరిగే వీలుందని పేర్కొన్నారు. ఈ కార్యక్రమంలో గ్రూప్ ఏజెంట్ ఎన్. శ్రీధర్, గ్రూప్ ఇంజనీర్ భట్టాచార్య, గని మేనేజర్ సుధీర్ కుమార్ ఝా, రక్షణ అధికారి శివయ్య, ఇంజనీర్ శ్యామ్ కుమార్, సర్వేయర్ ఏ. సంపత్ హాజరయ్యారు. పలువురు మైనింగ్ సిబ్బంది, సూపర్వైజర్లు పాల్గొన్నారు.

మహిళా హక్కుల పోరాటంలో గుర్తింపు.. బీసీ ఉపకోటాకై ఉద్యమించాలని పిలుపు

మంచిర్యాల, ఆర్.కె న్యూస్: మంచిర్యాల పట్టణంలోని జన్మభూమి నగర్‌లో మంగళవారం హైకోర్టు న్యాయవాది పేరం అలేఖ్యను జాతీయ బీసీ హక్కుల పోరాట సమితి ప్రతినిధులు ఘనంగా సన్మానించారు. ఇటీవల హైదరాబాద్‌లోని సుందరయ్య విజ్ఞాన కేంద్రంలో అంతర్జాతీయ మహిళా దినోత్సవం సందర్భంగా అలేఖ్య ‘మహిళా లెజెండరీ జాతీయ అవార్డు’ అందుకున్నారు. మహిళల హక్కులు, చట్టసభల్లో రిజర్వేషన్ల సాధన కోసం ఆమె చేస్తున్న పోరాటాన్ని గుర్తించి ఈ పురస్కారం ప్రదానం చేశారు. జిల్లాకు చెందిన మహిళకు జాతీయ స్థాయి గుర్తింపు రావడం గర్వకారణమని సమితి నాయకులు ఈ సందర్భంగా కొనియాడారు. అలేఖ్య అనేక సంవత్సరాలుగా మహిళా సమస్యలపై నిరంతరం పోరాడుతున్నారు. చట్టసభల్లో మహిళా రిజర్వేషన్ల అమలు కోసం ఆమె చురుగ్గా పనిచేస్తున్నారు. కేంద్ర ప్రభుత్వం తీసుకువచ్చిన 33 శాతం మహిళా రిజర్వేషన్ బిల్లులో బీసీ మహిళలకు ప్రత్యేకంగా ఉపకోటా కల్పించాలని సమితి నాయకులు డిమాండ్ చేశారు. ఈ లక్ష్య సాధన కోసం జరిగే ఉద్యమాల్లో మహిళలు పెద్ద ఎత్తున భాగస్వాములు కావాలని పిలుపునిచ్చారు. నేటి తరం మహిళలు అలేఖ్యను స్ఫూర్తిగా తీసుకుని విద్యా, ఉద్యోగ, రాజకీయ రంగాల్లో రాణించాలని ఆకాంక్షించారు. భవిష్యత్తులో ఆమె మరిన్ని ఉన్నత పురస్కారాలు అందుకోవాలని ఆకాంక్షించారు. ఈ కార్యక్రమంలో జాతీయ బీసీ హక్కుల పోరాట సమితి అధ్యక్షుడు గుమ్ముల శ్రీనివాస్, వేముల అశోక్, రాజన్న చారి, మంచిర్ల సదానందం, కొట్టే నటేశ్వర్ తో పాటు పలువురు సంఘ సభ్యులు పాల్గొన్నారు.