KYATHAM RAJESH

నలుగురు నిందితుల నుంచి ఓమ్ని వ్యాన్, బైక్, 70 కేజీల రాగి తీగ స్వాధీనం

మంచిర్యాల ఏసీపీ రత్నపురం ప్రకాష్

నస్పూర్, ఆర్.కె న్యూస్: మంచిర్యాల, పెద్దపల్లి జిల్లాల్లో విద్యుత్ ట్రాన్స్‌ఫార్మర్ల కాపర్ వైర్ చోరీలకు పాల్పడుతున్న నలుగురు సభ్యుల అంతర్-జిల్లా దొంగల ముఠాను సీసీసీ నస్పూర్ పోలీసులు అరెస్ట్ చేశారు. గురువారం నస్పూర్ పోలీస్ స్టేషన్‌లో ఏర్పాటు చేసిన విలేకరుల సమావేశంలో మంచిర్యాల ఏసీపీ రత్నపురం ప్రకాష్ వివరాలు వెల్లడించారు. ఆగస్టు 27న నస్పూర్ గేట్ వద్ద గల ట్రాన్స్‌ఫార్మర్ రిపేర్ షాప్ షట్టర్ పగులగొట్టి 170 కేజీల కాపర్ వైర్ చోరీ చేసిన ఘటనపై కాంట్రాక్టర్ ఎల్పుల విజయ్ ఫిర్యాదుతో పోలీసులు కేసు నమోదు చేశారు. జల్సాలు, వ్యసనాల కోసం దొంగతనాలకు అలవాటుపడిన పాత నేరస్థులు మనుపాటి శేఖర్, మేకల లక్ష్మణ్, నూకిని ప్రశాంత్, కోట విష్ణులను గురువారం నస్పూర్ తెలంగాణ తల్లి చౌరస్తా వద్ద వాహనాల తనిఖీల్లో అదుపులోకి తీసుకున్నారు. నిందితుల నుంచి 70 కేజీల కాపర్ వైర్, నేరాలకు ఉపయోగించిన ఓమ్ని వ్యాన్, పల్సర్ బైక్, మూడు సెల్‌ఫోన్లను స్వాధీనం చేసుకున్నారు. కమిషనరేట్ పరిధిలో దాదాపు 12 చోట్ల వీరు కాపర్ వైర్ చోరీలకు పాల్పడినట్లు విచారణలో తేలింది. తక్కువ సమయంలో కేసును ఛేదించడంలో చొరవ చూపిన సీసీఎస్ ఏసీపీ కె. రవీందర్, ఇన్‌స్పెక్టర్ టి. గోపి, మంచిర్యాల రురల్ సర్కిల్ ఇన్‌స్పెక్టర్ గోపతి రవీందర్, ఎస్సైలు ముద్దసాని శివకేశవులు, దుర్గం లలిత, ఎం. ప్రశాంత్, జితేందర్, ఏఎస్సై ఇజాజ్, హెడ్ కానిస్టేబుళ్లు దేవేంద్రప్ప, ప్రేమ్‌సింగ్, రవి, కానిస్టేబుళ్లు భరత్, జయచంద్ర, రామేశ్వర్, సతీష్, అఫ్జల్ అలీ, వెంకటసాయి, నరేందర్‌లను ఏసీపీ రత్నపురం ప్రకాష్ అభినందించారు.

కనీస పెన్షన్ రూ.15 వేలు చెల్లించాలి: జిల్లా అధ్యక్షులు గజెల్లి వెంకటయ్య

నస్పూర్, ఆర్.కె న్యూస్: ఈనెల 9న నస్పూర్ పట్టణంలోని సింగరేణి గార్డెన్స్‌లో సింగరేణి విశ్రాంత ఉద్యోగుల మహా ఆత్మీయ సమ్మేళనం నిర్వహిస్తున్నట్లు సింగరేణి విశ్రాంత ఉద్యోగుల సంఘం మంచిర్యాల జిల్లా అధ్యక్షులు గజెల్లి వెంకటయ్య వెల్లడించారు. నస్పూర్ ప్రెస్ క్లబ్‌లో గురువారం ఏర్పాటు చేసిన విలేకరుల సమావేశంలో మాట్లాడారు. ఈ సమ్మేళనానికి సీఎంపీఎఫ్ గోదావరిఖని రీజినల్ కమిషనర్-1 భరత్ కుమార్, రీజినల్ కమిషనర్-2 డాక్టర్ గోవర్ధన్, శ్రీరాంపూర్ జనరల్ మేనేజర్ మునిగంటి శ్రీనివాస్, డీజీఎం (పర్సనల్) ఎస్. అనిల్ కుమార్ అతిథులుగా హాజరవుతారని తెలిపారు. రాజకీయ పార్టీలు, కార్మిక సంఘాలకు అతీతంగా నిర్వహిస్తున్న ఈ వేదిక ద్వారా సమస్యలపై చర్చించి తదుపరి కార్యాచరణ రూపొందిస్తామని స్పష్టం చేశారు. సింగరేణి సంస్థలో 35 నుంచి 45 సంవత్సరాల పాటు సేవలందించిన సుమారు 16,900 మంది విశ్రాంత ఉద్యోగులు కేవలం రూ. 350 నుంచి రూ.1,000 వరకు మాత్రమే పెన్షన్ పొందుతూ తీవ్ర దుర్భర పరిస్థితులు ఎదుర్కొంటున్నారని ఆవేదన వ్యక్తం చేశారు. వృద్ధాప్యంలో దినసరి కూలీలుగా, వ్యవసాయ పనులకు వెళ్లాల్సి వస్తోందని పేర్కొన్నారు. గత 25 ఏళ్లుగా పెన్షన్ పెంపు లేదని, కేంద్ర రాష్ట్ర ప్రభుత్వాలు, కోల్ బెల్ట్ ప్రజాప్రతినిధులు తమ సమస్యలను పట్టించుకోవడం లేదని విమర్శించారు. ప్రజాప్రతినిధులకు ఇస్తున్న డబుల్ పెన్షన్ విధానాన్ని వెంటనే రద్దు చేయాలని డిమాండ్ చేశారు. విశ్రాంత ఉద్యోగులకు కనీస పెన్షన్ 15,000 రూపాయలు చెల్లించాలని, సీపీఆర్‌ఎంఎస్ మెడికల్ కార్డు పరిమితిని రూ. 25 లక్షలకు పెంచాలని డిమాండ్ చేశారు. ఖాళీగా ఉన్న సింగరేణి క్వార్టర్లను అర్హులైన విశ్రాంత కార్మికులకు కేటాయించాలని, అన్ని బ్యాంకులు రూ. 30 లక్షల ప్రమాద బీమా సౌకర్యం వర్తింపజేసేలా చొరవ చూపాలని కోరారు. సీఎంపీఎఫ్ ట్రస్ట్ బోర్డులో జరిగిన నిధుల అవకతవకలపై జాతీయ కార్మిక సంఘాలు మౌనం వీడాలని, పూర్తిస్థాయి విచారణ జరిపి బాధ్యులపై చర్యలు తీసుకోవాలని డిమాండ్ చేశారు. ఈ సమావేశంలో సంఘం ప్రతినిధులు రాళ్లబండి రాజన్న, పూదరి నర్సయ్య, నల్లగొండ సదాశివాచారి, బింగి రాజేశం, లక్ష్మణ్, బి. కృష్ణ, లక్ష్మీనారాయణ, వెంకటరత్నం, జ్ఞాని, సాయిలు పాల్గొన్నారు.

నిర్మల్, ఆర్.కె న్యూస్: నిర్మల్ జిల్లా కేంద్రంలోని ఆదర్శ నగర్‌లోని వశిష్ట ఉన్నత పాఠశాలలో కృష్ణాష్టమి వేడుకలు ఘనంగా నిర్వహించారు. పాఠశాల ప్రిన్సిపాల్ మాధవి శ్రీకృష్ణుని విగ్రహానికి ప్రత్యేక పూజలు నిర్వహించారు. విద్యార్థులు శ్రీకృష్ణుని వేషధారణ లో ఆటపాటలతో సందడి చేశారు. ఈ కార్యక్రమంలో పాఠశాల చైర్మన్ గొల్లపల్లి శ్రీనివాస్ గౌడ్, ప్రిన్సిపల్ మాధవి ఉపాధ్యాయ బృందం విద్యార్థులు పాల్గొన్నారు.

శ్రీరాంపూర్ అధికారులతో సింగరేణి డైరెక్టర్ కే. వెంకటేశ్వర్లు సమీక్ష

నస్పూర్, ఆర్. కె న్యూస్: ఈ ఆర్థిక సంవత్సరం శ్రీరాంపూర్ ఏరియాకు కంపెనీ నిర్దేశించిన వార్షిక ఉత్పత్తి లక్ష్యం 64 లక్షల 30 వేల టన్నులను ఎట్టి పరిస్థితుల్లోనూ సాధించి తీరాలి” అని సింగరేణి డైరెక్టర్ (పీపీ) కే. వెంకటేశ్వర్లు ఆదేశించారు. శ్రీరాంపూర్ ఏరియా పర్యటనలో భాగంగా బుధవారం జీఎం కార్యాలయ కాన్ఫరెన్స్ హాల్లో ఏరియా జనరల్ మేనేజర్ మునిగంటి శ్రీనివాస్ సమక్షంలో సమీక్షా సమావేశం నిర్వహించారు. అన్ని గనుల ఏజెంట్లు, ప్రాజెక్టు అధికారులు, మేనేజర్లు, వివిధ విభాగాల ఇంజనీర్లతో కలిసి గనుల వారీగా ఉత్పత్తి, ఉత్పాదకత వివరాలను పరిశీలించారు. సంస్థ వార్షిక లక్ష్యాల సాధనలో శ్రీరాంపూర్ ఏరియా కీలక పాత్ర పోషించాలని పిలుపునిచ్చారు. భూగర్భ, ఉపరితల గనుల్లో ఉత్పత్తి వేగాన్ని మరింత మెరుగుపరుచుకోవాలని డైరెక్టర్ సూచించారు. గని పని ప్రదేశాల ప్లాన్లను క్షేత్రస్థాయిలో పరిశీలించి అధికారులకు అవసరమైన మార్గదర్శకాలు అందించారు. గనుల నిర్దేశిత లక్ష్యాల సాధనకు ఆటంకం కలగకుండా అవసరమైన యంత్రాలు, విడిభాగాలు, పనిముట్లను సకాలంలో సమకూర్చాలని సంబంధిత విభాగాల అధికారులను ఆదేశించారు. అన్ని విభాగాలు సమన్వయంతో పనిచేసి ఉత్పత్తిని పరుగులు పెట్టించాలని స్పష్టం చేశారు. ఈ సమీక్షా సమావేశంలో ఎస్వో టు జీఎం కృష్ణ ప్రసాద్, ఏరియా ఇంజనీర్ సురేష్, ఏజీఎంలు సుమలత, ఆనంద్ కుమార్, ఐకే ఓసీపీ ప్రాజెక్ట్ ఆఫీసర్ ఏవీ రెడ్డి, ఎస్ఆర్‌పీ ఓసీపీ ప్రాజెక్ట్ ఆఫీసర్ సీహెచ్. వెంకటేశ్వర్లు, ఏజెంట్లు ఎన్. శ్రీధర్, రవికుమార్, డీజీఎంలు విజయ్ కుమార్, రాజన్న, ఏరియా పర్చేజ్ ఆఫీసర్ చంద్రశేఖర్, వివిధ గనుల మేనేజర్లు, విభాగాధిపతులు పాల్గొన్నారు.

శ్రీరాంపూర్‌లో పనిచేయలేకపోవడమే నా సర్వీసులో తీరని లోటు

• సింగరేణి డైరెక్టర్ (పీపీ) కె. వెంకటేశ్వర్లు
• ఘనంగా ఎస్‌ఆర్‌పీ 1 స్వర్ణోత్సవ వేడుకలు

నస్పూర్, ఆర్.కె న్యూస్: పరిస్థితులు మారాయి, పోటీ పెరిగింది, నల్లనిదంతా బొగ్గు అని చెప్పి అమ్మే రోజులు పోయాయి, తక్కువ ఖర్చుతో నాణ్యమైన బొగ్గును అందిస్తేనే సంస్థ మనుగడ సాధ్యమని సింగరేణి సంస్థ డైరెక్టర్ (ప్రాజెక్ట్స్ అండ్ ప్లానింగ్) కె. వెంకటేశ్వర్లు స్పష్టం చేశారు. శ్రీరాంపూర్ ఏరియాలోని ఎస్‌ఆర్‌పీ 1 భూగర్భ గని 50 వసంతాలు పూర్తి చేసుకున్న సందర్భంగా గని ప్రాంగణంలో బుధవారం నిర్వహించిన స్వర్ణోత్సవ వేడుకలకు ముఖ్య అతిథిగా హాజరై మాట్లాడారు. ముందుగా ఏఐటీయూసీ రాష్ట్ర అధ్యక్షుడు వాసిరెడ్డి సీతారామయ్యతో కలిసి గోల్డెన్ జూబ్లీ పైలాన్‌ను ప్రారంభించి, స్వర్ణోత్సవ జ్ఞాపికను ఆవిష్కరించారు. దక్షిణ భారతదేశంలో ఏకైక బొగ్గు ఉత్పత్తి సంస్థ అయిన సింగరేణిలో ఒక అండర్‌గ్రౌండ్ మైన్ ఒడిదుడుకులను తట్టుకొని వంద శాతం ఉత్పత్తితో 50 ఏళ్లు పూర్తి చేసుకోవడం హర్షణీయమన్నారు. నా 35 ఏళ్ల సింగరేణి ఉద్యోగ ప్రస్థానంలో ఎన్నో హోదాల్లో పనిచేసి డైరెక్టర్ స్థాయికి ఎదిగినా, ఒక్కసారైనా శ్రీరాంపూర్ ఏరియాలో పనిచేసే అవకాశం రాకపోవడమే నా సర్వీసులో మిగిలిపోయిన తీరని కోరిక అని అన్నారు. దేశంలోనే అత్యధిక ఉత్పత్తి వ్యయం సింగరేణిలోనే ఉందని, ధర తగ్గిస్తేనే వినియోగదారులు కొనుగోలుకు ఆసక్తి చూపుతున్నారని డైరెక్టర్ పేర్కొన్నారు. రైల్వే నాలుగో లైన్ నిర్మాణం పూర్తయితే దేశంలో ఎక్కడి నుంచైనా బొగ్గు రవాణా సులభతరం అవుతుందని, ఇది సంస్థకు మరింత పోటీని తెచ్చిపెడుతుందని హెచ్చరించారు. భూగర్భ గనుల్లో నష్టాలు రాకుండా యంత్రాలను పూర్తిస్థాయి సామర్థ్యంతో వినియోగించుకోవాలని కోరారు. సంస్థలో యువ ఉద్యోగుల సంఖ్య పెరిగిందని, వారు గైర్హాజరు కాకుండా విధులు నిర్వర్తిస్తూ జీరో హార్మ్ లక్ష్యంతో రక్షణతో కూడిన ఉత్పత్తి సాధించాలని సూచించారు. బొగ్గుతో పాటు సంస్థ ఇతర వ్యాపారాలపై దృష్టి సారించిందని, కర్ణాటకలో బంగారు గనుల అన్వేషణ చేపడుతోందని తెలిపారు. ఒక దశలో తీవ్ర నష్టాల కారణంగా మూసివేత అంచున చేరిన ఎస్‌ఆర్‌పీ 1 గనిని కార్మికులు, సంఘాలు ఐక్యంగా శ్రమించి లాభాల బాట పట్టించారని ఏఐటీయూసీ అధ్యక్షుడు వాసిరెడ్డి సీతారామయ్య కొనియాడారు. అనంతరం శ్రీరాంపూర్ జీఎం మాట్లాడుతూ, ఉత్పత్తి, రక్షణ విభాగాల్లో ఎస్‌ఆర్‌పీ 1 గని శ్రీరాంపూర్ ఏరియాకే గర్వకారణమని పేర్కొన్నారు. 2018లోనే ఫైవ్ స్టార్ రేటింగ్ సాధించి మిగిలిన గనులకు ఆదర్శంగా నిలిచిందని గుర్తుచేశారు. ఈ వేడుకల్లో బెల్లంపల్లి రీజియన్ క్వాలిటీ జీఎం వీరభద్ర రావు, ఆర్జీ రీజియన్ క్వాలిటీ జీఎం వెంకట్ రమణ, విశ్రాంత సీజీఎం సుగుణాకర్ రెడ్డి, ఏఐటీయూసీ బ్రాంచ్ సెక్రటరీ బాజీ సైదా, ఐఎన్‌టీయూసీ ఉపాధ్యక్షుడు జెట్టి శంకర్ రావు, సీఎంఓఏఐ అపెక్స్ కౌన్సిల్ సీనియర్ ఉపాధ్యక్షుడు ఏవీ రెడ్డి, గని ఏజెంట్ రవికుమార్, మేనేజర్ ఆత్మారాం సహానీ, అధికారులు, ఉద్యోగులు, విశ్రాంత కార్మికులు పాల్గొన్నారు.

సోన్, ఆర్.కె న్యూస్: సోన్ మండల కేంద్రంలో దివంగత ముఖ్యమంత్రి వైఎస్ రాజశేఖర్ రెడ్డి వర్ధంతి కార్యక్రమాన్ని మండల కాంగ్రెస్ పార్టీ నాయకులు ఘనంగా నిర్వహించారు.ఈ సందర్భంగా వైఎస్ఆర్ చిత్రపటానికి పూలమాలలు వేసి ఘన నివాళులు అర్పించారు. సమాజానికి ఆయన చేసిన సేవలను, ప్రవేశపెట్టిన సంక్షేమ పథకాలను ఈ సందర్భంగా నాయకులు స్మరించుకున్నారు. ఈ నివాళి కార్యక్రమంలో మండల అధ్యక్షుడు మొయినుద్దీన్, ఆత్మ డైరెక్టర్ గాండ్ల లింగన్న, మాజీ వైస్ ఎంపీపీ మురళీధర్ రెడ్డి, మాజీ సర్పంచ్ వినోద్ , మహమ్మద్ అబూద్, అజహర్, జగన్, అనిల్, దాసరి రాజేశ్వర్, ప్రసాద్, దేవేందర్, నీరటి చిన్నయ్య, ప్రదీప్ , కొంతం అమృత్, కొంతం గంగాధర్, సుధాకర్, రిజ్వాన్,రాజేందర్ మరియు స్థానిక నాయకులు, కార్యకర్తలు పాల్గొని వైఎస్ఆర్ అమర్ రహే అంటూ నినాదాలు చేశారు.

నస్పూర్‌లో ప్లకార్డులతో నిరసన

నస్పూర్, ఆర్.కె న్యూస్: ఆదివాసీ యువతి ఊక శిరీషపై అత్యాచారానికి ఒడిగట్టి హత్య చేసిన దుండగులను వెంటనే గుర్తించి కఠినంగా శిక్షించాలని డిమాండ్ చేస్తూ బుధవారం నస్పూర్ మండల కేంద్రంలో ఐక్య విద్యార్థి సంఘాల ఆధ్వర్యంలో ప్లకార్డులతో నిరసన ప్రదర్శన నిర్వహించారు. ఈ సందర్భంగా ఐక్య విద్యార్థి సంఘాల నాయకుడు చిప్పకుర్తి శ్రీనివాస్ మాట్లాడుతూ, కుటుంబానికి చేదోడువాదోడుగా ఉన్న ఆదివాసీ బిడ్డ శిరీష దారుణ హత్యకు గురికావడం అత్యంత బాధాకరమన్నారు. ఘటన జరిగి ఇన్ని రోజులైనా నిందితులను పట్టుకోకపోవడం ప్రభుత్వం, పోలీసు యంత్రాంగం నిర్లక్ష్యానికి నిదర్శనమని మండిపడ్డారు. మహిళలు, యువతులపై అఘాయిత్యాలకు పాల్పడేవారికి కఠిన శిక్షలు పడేలా చేసి ప్రజల్లో, ఆడబిడ్డల్లో భరోసా కల్పించాల్సిన బాధ్యత ప్రభుత్వంపై ఉందన్నారు. కేసును నిష్పక్షపాతంగా, వేగవంతంగా దర్యాప్తు చేసి దోషులను చట్టం ముందు నిలబెట్టాలని డిమాండ్ చేశారు. బాధిత కుటుంబానికి ప్రభుత్వం అన్ని విధాలా అండగా నిలిచి న్యాయం చేయాలని, భవిష్యత్తులో ఇలాంటి అమానుష ఘటనలు పునరావృతం కాకుండా కఠిన రక్షణ చర్యలు చేపట్టాలని కోరారు. ఈ కార్యక్రమంలో ఐక్య విద్యార్థి సంఘాల ప్రతినిధులు జుమ్మిడి గోపాల్, పూరెళ్ల నితీష్, వంశీ, పవన్, ప్రశాంత్, అలేఖ్య, హరిణి, శివాని తదితరులు పాల్గొన్నారు.

నస్పూర్, ఆర్.కె న్యూస్: మంచిర్యాల జిల్లా నస్పూర్ మండల కేంద్రంలో బుధవారం నిర్వహించిన సమావేశంలో ఎంఆర్‌పీఎస్ మండల నూతన కమిటీని ఏకగ్రీవంగా ఎన్నుకున్నారు. ఎంఆర్‌పీఎస్ జిల్లా ఇన్‌చార్జి లింగంపల్లి శ్రీనివాస్ అధ్యక్షతన ఈ సమావేశం జరిగింది. మండల నూతన అధ్యక్షుడిగా బచ్చల రమేష్, అధికార ప్రతినిధిగా గుంపుల స్వామి, ప్రధాన కార్యదర్శులుగా కొయ్యల శేఖర్, కంపెల్లి విజయ్ ఎన్నికయ్యారు. ఈ సందర్భంగా నూతన కార్యవర్గ సభ్యులు మాట్లాడుతూ దళితుల హక్కుల పరిరక్షణకు, సామాజిక న్యాయ సాధనకు నిరంతరం ఐక్యంగా కృషి చేస్తామని స్పష్టం చేశారు. ఈ కార్యక్రమంలో మంచిర్యాల నియోజకవర్గ ఇన్‌చార్జి చిప్పకుర్తి మల్లేష్, నస్పూర్ మండల ఇన్‌చార్జి గద్దల బానయ్య, నాయకులు సుందిల్ల మల్లేష్, ఇరికిల్ల పురుషోత్తం, నక్క అంజన్న, మంథని మల్లేష్, చుంచు శంకర్ వర్మ, జూపెల్లి సాయిలు తదితరులు పాల్గొన్నారు.

సోన్, ఆర్‌.కె. న్యూస్: సోన్ మండల కేంద్రంలో కొనసాగుతున్న డిజిటల్ క్రాప్ బుకింగ్ ప్రక్రియను జిల్లా వ్యవసాయ అధికారి సుజాత మంగళవారం పరిశీలించారు. ఈ సందర్భంగా ఆమె మాట్లాడుతూ.. గ్రామ వాలంటీర్ల సహకారంతో రైతులు సాగు చేస్తున్న పంటల వివరాలను ఆన్‌లైన్‌లో నమోదు చేయనున్నట్లు తెలిపారు. రైతులు తాము సాగు చేసిన పంటలు, రకాల వివరాలను గ్రామ వాలంటీర్లకు అందించి డిజిటల్ క్రాప్ బుకింగ్‌కు సహకరించాలని కోరారు. నమోదు చేసిన పంట వివరాలు పంట ఉత్పత్తుల విక్రయంతో పాటు ప్రభుత్వ పథకాలు, వ్యవసాయ సేవలు పొందేందుకు ఉపయోగపడతాయని తెలిపారు. కార్యక్రమంలో ఏడీఏ రాజశేఖర్‌రెడ్డి, ఏవో వినోద్‌కుమార్‌, ఏఈవో ఉమామహేశ్వరి, గ్రామ వాలంటీర్‌ శ్రవణ్‌, రైతులు రాజేశ్వర్‌, శ్రీనివాస్‌, సుమేష్‌ తదితరులు పాల్గొన్నారు.