రేపు గనులపై వినతిపత్రాలు.. లాభాల వాటాపై శ్వేతపత్రం విడుదల చేయాలని డిమాండ్

నస్పూర్, ఆర్.కె న్యూస్: సింగరేణి సంస్థలో గుర్తింపు సంఘం కాలపరిమితి ముగిసినందున, కోల్ ఇండియా తరహాలోనే జేబీసీసీఐ ప్రాతినిధ్య జాతీయ సంఘాలన్నింటికీ సమాన హోదా, ప్రాతినిధ్యం కల్పించాలని సింగరేణి కోల్ మైన్స్ కార్మిక సంఘ్ (బీఎంఎస్) డిమాండ్ చేసింది. ఆదివారం శ్రీరాంపూర్ ఏరియా వైస్ ప్రెసిడెంట్ నాతాడి శ్రీధర్ రెడ్డి అధ్యక్షతన జరిగిన ముఖ్య కార్యకర్తల సమావేశంలో వర్కింగ్ ప్రెసిడెంట్ యాదగిరి సత్తయ్య పాల్గొని మాట్లాడారు. సంస్థలో 2023 డిసెంబర్ 27న 7వ దఫా గుర్తింపు సంఘం ఎన్నికలు జరగ్గా, గడువు ముగిసిందని తెలిపారు. గత గుర్తింపు, ప్రాతినిధ్య సంఘాలు కార్మికులకిచ్చిన హామీలను నెరవేర్చడంలో, 12వ వేతన ఒప్పంద ప్రధానాంశాలు సహా పరిశ్రమ పరిరక్షణ, దీర్ఘకాలిక సమస్యల పరిష్కారంలో ఘోరంగా విఫలమయ్యాయని విమర్శించారు. గుర్తింపు సంఘం గడువు ముగిసిన తర్వాత కూడా ఏదైనా ఒక సంఘానికే ప్రాధాన్యత ఇవ్వడం నిబంధనలకు విరుద్ధమన్నారు. తదుపరి గుర్తింపు ఎన్నికలు నిర్వహించేంతవరకు అన్ని జేబీసీసీఐ ప్రాతినిధ్య సంఘాలను చర్చలు, సమావేశాలకు సమానంగా ఆహ్వానించాలని డిమాండ్ చేశారు. ఈ మేరకు సోమవారం (సెప్టెంబర్ 14న) అన్ని గనుల మేనేజర్లు, డిపార్ట్‌మెంట్ అధికారులు, జీఎం కార్యాలయాల్లో వినతిపత్రాలు సమర్పించనున్నట్లు వెల్లడించారు. అలాగే 2025-26 ఆర్థిక సంవత్సరానికి సంబంధించిన వాస్తవ లాభాలను యాజమాన్యం వెంటనే ప్రకటించి, శ్వేతపత్రం విడుదల చేయాలని, కార్మికుల కష్టార్జితమైన లాభాల వాటాను చెల్లించడంలో జరుగుతున్న జాప్యాన్ని నివారించాలని డిమాండ్ చేశారు. ఈ సమావేశంలో ఏరియా కార్యదర్శి రాజారాం కిరణ్ కుమార్, జాయింట్ సెక్రటరీలు జెల్ల తిరుపతి, అప్పాల బీరయ్య, ఆర్గనైజింగ్ సెక్రటరీలు మిట్ట మధుకర్, కనవేని సాగర్, ఆఫీస్ సెక్రటరీ బుర్ర అరుణ్ కుమార్ గౌడ్, పిట్ సెక్రటరీలు కొమ్మ బాపు, బొంపల్లి రమేష్, గొల్ల సురేష్, కుంట రాజు, అసిస్టెంట్ పిట్ సెక్రటరీలు చల్ల శ్రీనివాస్, కాళహస్తి రాజరాజేశ్వరరావు తదితరులు పాల్గొన్నారు.