నస్పూర్, ఆర్.కె న్యూస్: మంచిర్యాల మున్సిపల్ కార్పొరేషన్ పరిధిలోని 34వ డివిజన్‌లో మంగళవారం ఉదయం కురిసిన భారీ వర్షానికి పలుచోట్ల విద్యుత్ స్తంభాలపై చెట్లు విరిగిపడటంతో పాటు ఒక ఇల్లు పాక్షికంగా కూలిపోయింది. విషయం తెలుసుకున్న స్థానిక కార్పొరేటర్ అగ్గు సాగర్, వార్డు అధ్యక్షుడు పెంచాల వేణు, నాయకుడు బైరం ప్రభాకర్, ఇతర స్థానిక నేతలతో కలిసి వెంటనే క్షేత్రస్థాయికి చేరుకున్నారు. వర్షం కారణంగా దెబ్బతిన్న ప్రాంతాలను పరిశీలించి, విద్యుత్ స్తంభాలపై పడిన చెట్ల కొమ్మలను తొలగింపజేశారు. ఇల్లు కూలిపోయిన బాధితులను పరామర్శించి ధైర్యం చెప్పారు. డివిజన్ పరిధిలో వర్షం వల్ల ఉత్పన్నమైన విద్యుత్, పారిశుద్ధ్య సమస్యలను తక్షణమే పునరుద్ధరించి, ప్రజలకు ఎలాంటి తీవ్ర ఇబ్బందులు కలగకుండా స్థానిక నాయకులు, సిబ్బందితో కలిసి సమస్యలను పరిష్కరించారు.
వర్షపు నీరు నిలిచిపోయిన రహదారులు, పొంగిపొర్లుతున్న డ్రైనేజీల పరిస్థితిని స్వయంగా తనిఖీ చేసి, నీటి పారుదల వేగవంతం అయ్యేలా తక్షణ చర్యలు చేపట్టాలని సిబ్బందిని ఆదేశించారు.ముఖ్యంగా కార్పొరేషన్ పరిధిలోని 9వ డివిజన్ తిరుమల టౌన్‌షిప్, 32వ డివిజన్ రాంనగర్ ఆదిపరాశక్తి దేవాలయం వద్ద వాగులు, డ్రైనేజీలు పొంగిపొర్లుతుండటంతో, జేసీబీ సహాయంతో తక్షణమే పూడిక తొలగించి నీటిని సురక్షితంగా మళ్లించే ఏర్పాట్లు చేశారు.స్థానిక ప్రజల నుంచి సమస్యలపై సమాచారం అందగానే స్పందించిన మేయర్, స్వయంగా ఆయా డివిజన్లలో పర్యటిస్తూ మున్సిపల్ అధికారులను, పారిశుధ్య సిబ్బందిని అప్రమత్తం చేశారు. వర్షాకాలంలో పారిశుద్ధ్యంపై ప్రత్యేక దృష్టి సారించాలని, చెత్తాచెదారాన్ని ఎప్పటికప్పుడు తొలగిస్తూ డ్రైనేజీల్లో నీటి ప్రవాహానికి అడ్డంకులు లేకుండా పర్యవేక్షించాలని సూచించారు. అత్యవసర పరిస్థితుల్లో ప్రజలకు నిరంతరం వేగవంతమైన సేవలు అందుబాటులో ఉంచాలని అధికారులకు స్పష్టం చేశారు. ఈ కార్యక్రమంలో మేయర్‌తో పాటు స్థానిక కాంగ్రెస్ నాయకులు, మున్సిపల్ కార్పొరేషన్ అధికారులు, సిబ్బంది, ఆయా డివిజన్ల ప్రజలు పాల్గొన్నారు.
