KYATHAM RAJESH

మిగిలిన 84 సీట్ల భర్తీకి కౌన్సెలింగ్.. వెల్లడించిన ప్రిన్సిపాల్ కూర్మ రాజేందర్

నస్పూర్, ఆర్.కె న్యూస్: శ్రీరాంపూర్ లోని సింగరేణి పాలిటెక్నిక్ కాలేజీలో సింగరేణి ఉద్యోగుల పిల్లల ప్రత్యేక కోటా కింద మిగిలిపోయిన సీట్ల భర్తీ కోసం నిర్వహించే స్పాట్ కౌన్సెలింగ్ తేదీని ముందుకు మార్చినట్లు కళాశాల ప్రిన్సిపాల్ (ఏజీఎం) కూర్మ రాజేందర్ ఒక ప్రకటనలో తెలిపారు. టెక్నికల్ ఎడ్యుకేషన్ అధికారుల ఆదేశాల ప్రకారం జూలై 8 లోపే అడ్మిషన్ల ప్రక్రియ పూర్తి కావాల్సి ఉన్నందున, గతంలో జూలై 8న జరగాల్సిన కౌన్సెలింగ్‌ను ప్రభుత్వ సూచనల మేరకు జూలై 4న (శనివారం) నిర్వహించనున్నారు. జూన్ 11న జరిగిన మొదటి విడత కౌన్సెలింగ్ అనంతరం కాలేజీలోని 5 బ్రాంచ్‌లలో మొత్తం 84 సీట్లు మిగిలిపోయాయి. వీటిలో సివిల్ ఇంజినీరింగ్‌లో 22, కంప్యూటర్ ఇంజినీరింగ్ 11, ఎలక్ట్రికల్ అండ్ ఎలక్ట్రానిక్ ఇంజినీరింగ్ 07, మెకానికల్ ఇంజినీరింగ్ 21, మైనింగ్ ఇంజినీరింగ్‌లో 23 సీట్లు ఖాళీగా ఉన్నాయి. జూన్ 18 నుండి ప్రారంభమైన దరఖాస్తుల స్వీకరణ గడువు జూలై 2తో (నేటితో) ముగియనుంది. అర్హులైన అభ్యర్థులు జూలై 4న జరిగే స్పాట్ కౌన్సెలింగ్‌కు 4 సెట్ల సర్టిఫికెట్ల జిరాక్స్ కాపీలు, ఆన్‌లైన్ అప్లికేషన్ కాపీపై సంబంధిత మైన్/విభాగపు అధికారి సంతకం, ఆఫీస్ స్టాంప్‌తో పాటు సుమారు రూ. 20,000 నగదుతో నేరుగా హాజరుకావాల్సి ఉంటుంది. ఈ కౌన్సెలింగ్‌లో సింగరేణి ఉద్యోగుల పిల్లలకు మొదటి ప్రాధాన్యత ఉంటుందని, అప్పటికీ సీట్లు మిగిలితే ఇతరులకు కేటాయిస్తామని ప్రిన్సిపాల్ స్పష్టం చేశారు.

• సీఐటీయూ రాష్ట్ర ప్రధాన కార్యదర్శి పాలడుగు భాస్కర్
• కనీస వేతనాల జీవోను కార్మికులందరికీ వర్తింపజేయాలి
• ఆశ, అంగన్‌వాడీల సమస్యలపై నస్పూర్ ప్రెస్ క్లబ్‌లో సీఐటీయూ జిల్లా విస్తృత స్థాయి సమావేశం

నస్పూర్, ఆర్.కె న్యూస్: దేశంలో బీజేపీ నరేంద్ర మోడీ ప్రభుత్వం, రాష్ట్రంలో కాంగ్రెస్ ప్రభుత్వం కార్మికుల జీతాలు పెంచకుండా నిత్యావసర సరుకులు, కూరగాయలు, పుస్తకాల ధరలు, ఆసుపత్రి ఖర్చులు పెంచుతూ కార్మికుల శ్రమను దోచుకుంటున్నాయని సెంటర్ ఆఫ్ ఇండియన్ ట్రేడ్ యూనియన్స్ (సీఐటీయూ) రాష్ట్ర ప్రధాన కార్యదర్శి పాలడుగు భాస్కర్ విమర్శించారు. నస్పూర్ ప్రెస్ క్లబ్‌లో గురువారం సీఐటీయూ జిల్లా అధ్యక్షులు అబ్బోజు రమణ అధ్యక్షతన నిర్వహించిన జిల్లా విస్తృత స్థాయి సమావేశానికి ఆయన ముఖ్య అతిథిగా హాజరై మాట్లాడారు. కేంద్రంలోని బీజేపీ ప్రభుత్వం ఏటా రెండు కోట్ల ఉద్యోగాలు ఇస్తామని చెప్పి, నేడు సుమారు రెండు లక్షల పరిశ్రమలను మూసివేసి కార్మికులను ఉపాధికి దూరం చేసిందని మండిపడ్డారు. రాష్ట్రంలోని కాంగ్రెస్ ప్రభుత్వం గత రెండేళ్లలో ఇచ్చిన హామీలను అమలు చేయలేదని పాలడుగు భాస్కర్ ఆరోపించారు. మహిళలకు కేవలం ఉచిత బస్సు సౌకర్యం కల్పిస్తే సరిపోదని, వారికి సరైన ఉపాధి చూపించి పనిచేసే మహిళా కార్మికులకు పనికి తగ్గ వేతనం ఇవ్వాలని డిమాండ్ చేశారు. రాష్ట్ర ప్రభుత్వం కనీస వేతనాల జీవోను ప్రకటించినప్పటికీ, అది రాష్ట్రంలోని ఆశాలు, అంగన్‌వాడీలు, మధ్యాహ్న భోజన కార్మికులు, ఐకేపీ వీఓఏ ఉద్యోగులు, హమాలీ, గ్రామ పంచాయతీ, మున్సిపల్, మెడికల్ రిప్స్ లాంటి రంగాల కార్మికులకు వర్తించకపోవడం అన్యాయమన్నారు. ప్రభుత్వం వీరిని కార్మికులుగా గుర్తించకుండా వెట్టిచాకిరీ చేయించుకుంటోందని ధ్వజమెత్తారు. ఇచ్చిన హామీలను వెంటనే అమలు చేయకపోతే ఆందోళనలను, పోరాటాలను తీవ్రతరం చేస్తామని హెచ్చరించారు.

• సింగరేణి వ్యాప్తంగా సీఎంఓఏఐ ఆధ్వర్యంలో కొనసాగుతున్న రిలే నిరాహార దీక్షలు
• శ్రీరాంపూర్ దీక్షా శిబిరాన్ని సందర్శించి ఐఎన్టీయూసీ పూర్తి మద్దతు ప్రకటన

నస్పూర్, ఆర్.కె న్యూస్: సింగరేణి అభివృద్ధిలో అధికారులు కీలక పాత్ర పోషిస్తున్నందున, వారికి రావాల్సిన న్యాయమైన పీఆర్‌పీ (పర్ఫార్మెన్స్ రిలేటెడ్ పే) ప్రయోజనాలను ఆలస్యం చేయకుండా వెంటనే అందించాలని తెలంగాణ రాష్ట్ర కనీస వేతన సలహా మండలి చైర్మన్, ఐఎన్టీయూసీ సెక్రటరీ జనరల్ డాక్టర్ బి. జనక్ ప్రసాద్ డిమాండ్ చేశారు. సింగరేణి అధికారులకు సంబంధించిన పీఆర్‌పీ నిలుపుదలను వ్యతిరేకిస్తూ సింగరేణి వ్యాప్తంగా కోల్ మైన్స్ ఆఫీసర్స్ అసోసియేషన్ ఆఫ్ ఇండియా ఆధ్వర్యంలో నిర్వహిస్తున్న రిలే నిరాహార దీక్షలకు ఆయన సంఘీభావం ప్రకటించారు. గురువారం శ్రీరాంపూర్ ఏరియాలో ఏర్పాటు చేసిన దీక్షా శిబిరాన్ని సందర్శించి తమ పూర్తి మద్దతును తెలియజేశారు. ఈ సందర్భంగా ఆయన మాట్లాడుతూ అధికారుల న్యాయమైన సమస్యలను ప్రభుత్వం, సంస్థ యాజమాన్యం సానుకూల దృక్పథంతో పరిష్కరించాలని కోరారు. అధికారుల పీఆర్‌పీ నిలుపుదల అంశాన్ని ఇప్పటికే పలుమార్లు ప్రభుత్వ దృష్టికి తీసుకెళ్లినట్లు బి. జనక్ ప్రసాద్ వెల్లడించారు. అధికారులకు పీఆర్‌పీ చెల్లించేందుకు ఎలాంటి సాంకేతిక, పరిపాలన పరమైన ఇబ్బందులు లేవని స్పష్టం చేశారు. లాభాల సాధనలో నిరంతరం శ్రమిస్తున్న అధికారుల హక్కులను కాలరాయడం సరికాదన్నారు. యాజమాన్యం తక్షణమే స్పందించి నిలిపివేసిన నిధులను విడుదల చేయాలని కోరారు. ఈ కార్యక్రమంలో ఐఎన్టీయూసీ కేంద్ర కమిటీ సీనియర్ ఉపాధ్యక్షుడు జెట్టి శంకర్ రావు, సెంట్రల్ నాయకులు కలవేన శ్యామ్, రిక్కల గోపాల్ రెడ్డి, ఏంబడి తిరుపతి, మహేందర్ రెడ్డి, చందు, మోహన్, రామకృష్ణ పాల్గొన్నారు.

నూతన గృహాలను ప్రారంభించిన మేయర్ ధర్ని మధుకర్

నస్పూర్, ఆర్.కె న్యూస్:  తెలంగాణ రాష్ట్ర ప్రభుత్వం ప్రతిష్టాత్మకంగా ప్రవేశపెట్టిన “ఇందిరమ్మ ఇళ్లు” పథకం కింద మంచిర్యాల మున్సిపల్ కార్పొరేషన్ పరిధిలోని 18వ, 32వ డివిజన్లలో నిర్మించుకున్న నూతన గృహాల ప్రారంభోత్సవాలు గురువారం ఘనంగా జరిగాయి. మంచిర్యాల మున్సిపల్ కార్పొరేషన్ మేయర్ దర్ని మధుకర్ ముఖ్య అతిథిగా హాజరై ఈ నూతన గృహాలను ప్రారంభించారు. 18వ డివిజన్‌కు చెందిన లబ్ధిదారులు చిలుకూరు కీర్తన – సంతోష్ దంపతులు పూర్తి చేసుకున్న ఇందిరమ్మ ఇంటిని మేయర్ దర్ని మధుకర్, స్థానిక కార్పొరేటర్ రాచమళ్ళ కమల శ్రీనివాస్‌తో కలిసి ప్రారంభించారు. ఈ కార్యక్రమంలో 17వ డివిజన్ కార్పొరేటర్ లగిశెట్టి రాజయ్య, వార్డు ఆఫీసర్ కుమార్, మంచిర్యాల జిల్లా ఓబీసీ అధ్యక్షులు ఒడ్డె రాజమౌళి, హాజీపూర్ మండల యూత్ కాంగ్రెస్ సోషల్ మీడియా కో-ఆర్డినేటర్ ఆడెపు రమేష్, మాజీ మార్కెట్ కమిటీ డైరెక్టర్ నారిశెట్టి సంతోష్, కాంగ్రెస్ నాయకులు, మహిళా నాయకురాళ్లు పాల్గొన్నారు.

32వ డివిజన్‌లో ఇందిరమ్మ ఇల్లు ప్రారంభం
అలాగే మంచిర్యాల గౌరవ శాసనసభ్యులు కొక్కిరాల ప్రేమ్ సాగర్ రావు సహకారంతో 32వ డివిజన్‌కు చెందిన లబ్ధిదారులు మర్రి రాజమణి – సత్యనారాయణ దంపతులు నిర్మించుకున్న ఇందిరమ్మ ఇంటిని కూడా మేయర్ దర్ని మధుకర్ ప్రారంభించారు. ఈ కార్యక్రమంలో 32వ డివిజన్ కాంగ్రెస్ పార్టీ అధ్యక్షులు గోపతి తిరుపతి, యూత్ కాంగ్రెస్ అధ్యక్షులు పిట్టల రవి, స్థానిక నేతలు పాల్గొన్నారు. ఈ రెండు కార్యక్రమాలలో మేయర్ ధర్ని మధుకర్ లబ్ధిదారులకు నూతన గృహ ప్రవేశ శుభాకాంక్షలు తెలియజేశారు. ఇందిరమ్మ ఇళ్ల గృహ ప్రవేశానికి విచ్చేసిన మేయర్, కార్పొరేటర్లను లబ్ధిదారులు మర్యాదపూర్వకంగా శాలువాలతో ఘనంగా సత్కరించి కృతజ్ఞతలు తెలుపుకున్నారు. ఈ రెండు డివిజన్లలో జరిగిన వేడుకలకు స్థానిక ప్రజలు పెద్ద సంఖ్యలో తరలివచ్చారు.

అధికారుల సమస్యలపై అసెంబ్లీలో పోరాడుతాం.. ఉపముఖ్యమంత్రి స్పందించకపోవడం దారుణం

నస్పూర్, ఆర్.కె న్యూస్: సీఎంఓఏఐ కేంద్ర కమిటీ పిలుపు మేరకు పే అప్‌గ్రేడేషన్, పీఆర్‌పీ బకాయిల చెల్లింపు తదితర న్యాయమైన డిమాండ్ల సాధనకై సింగరేణి అధికారులు చేపట్టిన రిలే నిరాహార దీక్షలు బుధవారం నాటికి మూడవ రోజుకు చేరాయి. శ్రీరాంపూర్ ఏరియాలోని అధికారుల దీక్షా శిబిరాన్ని మాజీ మంత్రి, బీఆర్ఎస్ ఎమ్మెల్యే తన్నీరు హరీష్ రావు సందర్శించి తమ సంపూర్ణ సంఘీభావాన్ని ప్రకటించారు. ఈ సందర్భంగా హరీష్ రావు మాట్లాడుతూ.. సింగరేణి అధికారులు గత మూడు రోజులుగా శాంతియుతంగా దీక్షలు చేస్తున్నప్పటికీ, సింగరేణి సంస్థ పరిధిలోని ఉపముఖ్యమంత్రి మల్లు భట్టి విక్రమార్క స్పందించకపోవడం అత్యంత దారుణమన్నారు. గతంలో తమ ప్రభుత్వ హయాంలో అధికారులకు ఇలాంటి దుస్థితి రాలేదని గుర్తుచేశారు. సింగరేణి సంస్థను నిర్వీర్యం చేసే కుట్రలు జరుగుతున్నాయని ఆరోపించిన ఆయన, సంస్థ ఉనికిని కాపాడుకోవడానికి అధికారులు, ఉద్యోగులు కలిసికట్టుగా పోరాడాలని పిలుపునిచ్చారు. అధికారుల న్యాయమైన సమస్యల పరిష్కారం కోసం రాబోయే అసెంబ్లీ సమావేశాల్లో గళమెత్తుతామని హామీ ఇచ్చారు. శ్రీరాంపూర్ ఏరియాలో బుధవారం జరిగిన దీక్షలో ఐకే-1ఏ మేనేజర్ కోటయ్య, ఆర్ అండ్ డీ మేనేజర్ అమర్నాథ్, సీనియర్ పీఓలు సంతన్, ఓంకారి బాబు, అరుణ్, రామాచారి, డీవై ఎస్ఈ మల్లేష్ తదితరులు పాల్గొన్నారు. యాజమాన్యం, ప్రభుత్వం నుండి డిమాండ్లపై స్పష్టమైన హామీ వచ్చే వరకు వెనక్కి తగ్గేదే లేదని అధికారులు స్పష్టం చేశారు. జూలై 13 వరకు కొనసాగే ఈ రిలే నిరాహార దీక్షలను జయప్రదం చేయాలని, ప్రతి ఒక్క అధికారి ఇందులో భాగస్వాములు కావాలని సీఎంఓఏఐ ప్రతినిధులు కోరారు.

నస్పూర్, ఆర్.కె న్యూస్: శ్రీరాంపూర్ ఏరియాలో జులై 9న నిర్వహించనున్న 24వ ఏరియా స్థాయి త్రైపాక్షిక భద్రతా సమీక్షా సమావేశంపై జీఎం మునిగంటి శ్రీనివాస్ బుధవారం అధికారులతో సన్నాహక సమావేశం నిర్వహించారు. డీజీఎంఎస్ ఇన్‌స్పెక్టర్లు, యూనియన్ ప్రతినిధులు హాజరయ్యే ఈ భేటీకి అధికారులు పూర్తి వివరాలతో సిద్ధంగా ఉండాలని ఆయన ఆదేశించారు. ముఖ్యంగా గత సమావేశంలో లేవనెత్తిన అంశాల ప్రగతిపై దృష్టి పెట్టాలని, వైద్య సేవలపై ప్రధానంగా చర్చ జరిగే అవకాశం ఉన్నందున వైద్య అధికారులు నివేదికలతో సన్నద్ధం కావాలని సూచించారు. గనుల ఏజెంట్లు, ప్రాజెక్ట్ అధికారులు తమ పరిధిలోని భద్రతా ప్రమాణాలపై పూర్తి అవగాహన కలిగి ఉండాలని స్పష్టం చేశారు. ఈ సన్నాహక సమావేశంలో బెల్లంపల్లి రీజియన్ సేఫ్టీ జీఎం రఘుకుమార్, ఏరియా ఇంజనీర్ రమణారావు, డీజీఎం (ఐఈడి) రాజన్న, ఏఎస్ఓ విజయ్‌కుమార్, ఆర్‌కే-7 గ్రూప్ ఇంజనీర్ ఎన్. శ్రీధర్, ఎస్‌ఆర్‌పీ గ్రూప్ ఏజెంట్ రవికుమార్, డీవై సీఎంఓ రమేష్ బాబు, డీజీఎం (వర్క్‌షాప్) కృష్ణారెడ్డి, సీహెచ్పీ ఇన్‌చార్జ్ చంద్రలింగం, గనుల మేనేజర్లు, సేఫ్టీ ఆఫీసర్లు, ప్రాజెక్ట్ ఇంజనీర్లు, ఇతర అధికారులు పాల్గొన్నారు.

శ్రీరాంపూర్ ఏరియాలోని అన్ని గనులపై కార్మిక సంఘాల ఉమ్మడి ధర్నా

నస్పూర్, ఆర్.కె న్యూస్: బొగ్గు గని కార్మికులకు సంబంధించిన 12వ వేజ్ బోర్డు వేతన కమిటీని వెంటనే ఏర్పాటు చేయాలని, కార్మిక వ్యతిరేక నాలుగు లేబర్ కోడ్లను రద్దు చేయాలని డిమాండ్ చేస్తూ సింగరేణి జాయింట్ యాక్షన్ కమిటీ ఆధ్వర్యంలో బుధవారం శ్రీరాంపూర్ ఏరియాలో నిరసన జ్వాలలు మిన్నంటాయి. ఏఐటీయూసీ, ఐఎన్టీయూసీ, సీఐటీయూ, హెచ్‌ఎంఎస్ సంఘాల ఉమ్మడి ఆధ్వర్యంలో ఏరియాలోని అన్ని బొగ్గు గనులు, విభాగాల పై భారీ ధర్నాలు నిర్వహించి, యాజమాన్య ప్రతినిధులకు వినతి పత్రాలు అందజేశారు. ఈ సందర్భంగా జేఏసీ ముఖ్య నాయకులు మాట్లాడుతూ.. 11వ వేజ్ బోర్డు కాలపరిమితి ముగిసినప్పటికీ, కేంద్ర ప్రభుత్వం మరియు యాజమాన్యం నిర్లక్ష్య వైఖరి కారణంగా నేటి వరకు 12వ వేజ్ బోర్డు కమిటీని ఏర్పాటు చేయకపోవడం దారుణమన్నారు. కార్మికుల హక్కులను కాలరాసే నాలుగు లేబర్ కోడ్లను అమలు చేయాలనే కుట్రలో భాగంగానే ఈ వేతన కమిటీ ఏర్పాటును కాలయాపన చేస్తున్నారని వారు మండిపడ్డారు. ఇప్పటికైనా కేంద్ర ప్రభుత్వం, యాజమాన్యం తక్షణమే స్పందించి వేతన కమిటీని నియమించాలని, లేనిపక్షంలో భవిష్యత్తులో సింగరేణి వ్యాప్తంగా ఆందోళనలను మరింత ఉధృతం చేస్తామని హెచ్చరించారు. ఈ ఉమ్మడి నిరసన కార్యక్రమంలో ఏఐటీయూసీ శ్రీరాంపూర్ బ్రాంచ్ కార్యదర్శి ఎస్ కె బాజీ సైదా, నాయకులు కొట్టే కిషన్ రావు, మోత్కూరి కొమురయ్య, రాచర్ల చంద్రమోహన్, నాగభూషణం, బద్రి బుచ్చయ్య, ఫిట్ కార్యదర్శులు దాడి రాజయ్య, మురళి చౌదరి, మోతే లచ్చన్న, మారపల్లి సారయ్య, ఆకుల లక్ష్మణ్, గునిగంటి నర్సింగ్‌రావు, ఐఎన్టీయూసీ నాయకులు శీలం చిన్నయ్య, జగన్, శ్రీధర్, గోపాల్ రెడ్డి, నంబయ్య, అశోక్, సీఐటీయూ నాయకులు సుధాకర్, సందీప్, హెచ్‌ఎంఎస్ నాయకులు శశిధర్, ప్రసాద్, సురేందర్ తదితరులతో పాటు కార్మికులు పాల్గొన్నారు.

• భూగర్భ గనుల్లో రికార్డు స్థాయి ప్రగతి.. వర్షాకాలానికి పక్కా ప్రణాళికలు
• జనరల్ మేనేజర్ మునిగంటి శ్రీనివాస్

నస్పూర్, ఆర్.కె న్యూస్: జూన్ మాసంలో 80 శాతం గ్రేడ్ సాటిస్ఫాక్షన్‌తో క్వాలిటీ బొగ్గు ఉత్పత్తి విషయంలో సింగరేణి సంస్థలోనే శ్రీరాంపూర్ ఏరియా ప్రథమ స్థానంలో నిలిచిందని ఏరియా జనరల్ మేనేజర్ మునిగంటి శ్రీనివాస్ వెల్లడించారు. సోమవారం మీడియా ప్రతినిధులతో ఆయన మాట్లాడుతూ శ్రీరాంపూర్ ఏరియా జూన్ నెల ఉత్పత్తి లక్ష్యం 4,06,500 టన్నులకు గాను 3,39,151 టన్నులు సాధించినట్లు తెలిపారు. ఇందులో భూగర్భ గనులు రికార్డు స్థాయిలో ఓవరాల్‌గా 96 శాతం ఉత్పత్తి సాధించాయని, ఎస్‌ఆర్‌పీ 1 గని అత్యధికంగా 122 శాతం ప్రగతి కనబరిచిందని పేర్కొన్నారు. ఉపరితల గనులకు సంబంధించి జూన్ మాసంలో 2,25,577 టన్నుల ఉత్పత్తి సాధించినట్లు మునిగంటి శ్రీనివాస్ చెప్పారు. ఎస్‌ఆర్‌పీ ఓసీలో రెండో కాంట్రాక్టు ప్రారంభం కావడం, ఇందారం ఓసీలో కొత్త కాంట్రాక్ట్ ఒప్పందం పూర్తి కావడంతో రానున్న రోజుల్లో ఉత్పత్తి మరింత పెరగనుందన్నారు. 2026-2027 ఆర్థిక సంవత్సరానికి యాజమాన్యం నిర్దేశించిన 64 లక్షల 30 వేల టన్నుల వార్షిక ఉత్పత్తి లక్ష్యాన్ని ముందస్తు ప్రణాళికలతో అధిగమిస్తామన్నారు. వర్షాకాలం నేపథ్యంలో గనుల్లో పంపింగ్ వ్యవస్థ, రక్షణ చర్యలు పూర్తి చేశామని వెల్లడించారు. ఏరియాలో ఇప్పటివరకు 3,856 మందికి డిపెండెంట్ ఉద్యోగాలు కల్పించామని, విరమణ పొందిన 9,766 మందికి మెడికల్ కార్డులు అందజేశామని వివరించారు. ఈ సమావేశంలో డీజీఎం (పర్సనల్) ఎస్. అనిల్ కుమార్, డీజీఎం (ఐఈడీ) రాజన్న, డీవై పీఎం క్రాంతి కుమార్ పాల్గొన్నారు.

విజేతలను అభినందించిన జిల్లా కలెక్టర్ కుమార్ దీపక్

నస్పూర్, ఆర్.కె న్యూస్: మహారాష్ట్రలోని నాసిక్‌లో గత నెల 25 నుండి 30 వరకు నిర్వహించిన జాతీయ స్థాయి పెన్కాక్ సిలాట్ పోటీల్లో మంచిర్యాల జిల్లాకు చెందిన క్రీడాకారులు అద్భుత ప్రతిభ కనబరిచి పతకాలు సాధించారు. జాతీయ స్థాయిలో రాణించి జిల్లా కీర్తిని చాటిన ఈ విజేతలను బుధవారం మంచిర్యాల జిల్లా కలెక్టర్ కుమార్ దీపక్ కలెక్టరేట్‌లోని తన ఛాంబర్‌లో ప్రత్యేకంగా అభినందించారు. ఈ సందర్భంగా కలెక్టర్ మాట్లాడుతూ.. జిల్లా క్రీడాకారులు జాతీయ స్థాయి పెన్కాక్ సిలాట్ పోటీల్లో రాణించి పతకాలు సాధించడం ఎంతో భినందనీయమన్నారు. ఈ పోటీల్లో కె. మోక్షిత్ బంగారు పతకం సాధించగా.. ఇ. దక్ష, వి. అక్షర వేదశ్రీ, ఎ. శ్రీ మహాలక్ష్మి శర్మ, టి. ఆరుష్, జి. విగ్నేష్‌లు రజత పతకాలు కైవసం చేసుకున్నారు. అలాగే పి. రితేష్, జి. అచ్యుత్ శ్రీ దేవాన్ష్, టి. నయనశ్రీ, టి. నిహానిష్, టి. శివాజీలు కాంస్య పతకాలు సాధించి ప్రతిభ చాటారు. క్రీడాకారులు ఇదే ఉత్సాహంతో భవిష్యత్తులో మరిన్ని ఉన్నత శిఖరాలను అధిరోహించాలని కలెక్టర్ ఆకాంక్షించారు. ఈ కార్యక్రమంలో పెన్కాక్ సిలాట్ మంచిర్యాల జిల్లా సెక్రటరీ దాసరి రాజేశ్వర్, మాస్టర్ పోచంపల్లి వెంకటేష్, స్టేట్ టెక్నికల్ చైర్మన్ రంగు శ్రీనివాస్, కోశాధికారి మెయిన్, జెట్టి కృష్ణ తదితరులు పాల్గొన్నారు.

• గుర్తింపు సంఘం జీఎం చర్చల ప్రతినిధి బద్రి బుచ్చయ్య
• శ్రీరాంపూర్ ప్రాజెక్ట్ ఆఫీసర్‌కు గుర్తింపు సంఘం వినతిపత్రం సమర్పణ

నస్పూర్, ఆర్.కె న్యూస్: శ్రీరాంపూర్ ఓపెన్ కాస్ట్ ప్రాజెక్ట్‌లో విధులు నిర్వహిస్తున్న వే బ్రిడ్జ్, క్లరికల్ సిబ్బంది ఎదుర్కొంటున్న వివిధ దీర్ఘకాలిక సమస్యలను యాజమాన్యం తక్షణమే పరిష్కరించాలని గుర్తింపు సంఘం (ఏఐటీయూసీ) జీఎం చర్చల ప్రతినిధి బద్రి బుచ్చయ్య డిమాండ్ చేశారు. బుధవారం శ్రీరాంపూర్ ఓపెన్ కాస్ట్ ప్రాజెక్ట్ ఆఫీసర్ సిహెచ్. వెంకటేశ్వర్లును కలిసి కార్మికుల సమస్యలపై వినతిపత్రం సమర్పించారు. ఈ సందర్భంగా బద్రి బుచ్చయ్య మాట్లాడుతూ, ఓసీపీ వే బ్రిడ్జ్‌లో పనిచేస్తున్న క్లర్కులకు పని భారం దృష్ట్యా ఇన్సెంటివ్ కల్పించాలని, రెండు దశాబ్దాల క్రితం నాటి వే బ్రిడ్జ్‌ను సురక్షిత ప్రదేశానికి మార్చాలని కోరారు. కార్యాలయం, సర్వే విభాగ సిబ్బందికి పార్కింగ్, క్లరికల్ సిబ్బందికి ఫర్నిచర్ ఏర్పాటు చేయడంతో పాటు విద్యుత్ అంతరాయం కలగకుండా ఇన్వర్టర్ వ్యవస్థను అందుబాటులోకి తీసుకురావాలని బద్రి బుచ్చయ్య కోరారు. ముఖ్యంగా డీజీఎంఎస్ మార్గదర్శకాలు, మైన్స్ యాక్ట్ నిబంధనలకు అనుగుణంగా తగిన రక్షణ చర్యలు చేపట్టాలని కోరారు. దీనిపై ప్రాజెక్ట్ ఆఫీసర్ సిహెచ్. వెంకటేశ్వర్లు సానుకూలంగా స్పందిస్తూ, సమస్యలను పరిశీలించి త్వరలోనే తగిన చర్యలు తీసుకుంటామని హామీ ఇచ్చారు. ఈ కార్యక్రమంలో శ్రీరాంపూర్ ఓపెన్ కాస్ట్ పిట్ సెక్రటరీ మోతె లచ్చన్న, సీనియర్ నాయకులు మోహన్ రెడ్డి, శ్రీరాంపూర్ ఓసీపీ క్లరికల్ ఇన్‌చార్జ్ రమేష్, సత్యనారాయణ, మహిళా ప్రతినిధి సరోజ, ఇతర ఉద్యోగులు పాల్గొన్నారు.