KYATHAM RAJESH

సింగరేణి విశ్రాంత ఉద్యోగులు, కాలనీ పెద్దల ఆధ్వర్యంలో ఆత్మీయ సత్కారం

మంచిర్యాల, ఆర్.కె న్యూస్: మంచిర్యాల జిల్లా కేంద్రంలోని 51వ డివిజన్ లక్ష్మీనగర్ కాలనీ నివాసి పోడేటి వెంకన్న గౌడ్ ఏఎస్సై నుంచి ఎస్సైగా పదోన్నతి పొంది సిర్పూర్ కాగజ్‌నగర్‌కు బదిలీ అయిన సందర్భంగా ఆదివారం కాలనీలో ఆత్మీయ సన్మాన కార్యక్రమం నిర్వహించారు. సింగరేణి విశ్రాంత ఉద్యోగుల సంఘం, కాలనీ పెద్దల ఆధ్వర్యంలో ఏర్పాటు చేసిన ఈ కార్యక్రమానికి 51వ డివిజన్ కార్పొరేటర్ నీలి స్వప్న-శ్రీనివాస్ ముఖ్య అతిథులుగా హాజరై, వెంకన్న గౌడ్‌ను శాలువాతో ఘనంగా సత్కరించి పుష్పగుచ్ఛం అందజేశారు. ఈ సందర్భంగా నీలి శ్రీనివాస్ మాట్లాడుతూ… జన్నారం సమీపంలోని గోడిశాల అనే మారుమూల గ్రామంలో సామాన్య రైతు కుటుంబంలో జన్మించిన వెంకన్న గౌడ్ కానిస్టేబుల్ స్థాయి నుంచి హెడ్ కానిస్టేబుల్, ఏఎస్సైగా బాధ్యతలు నిర్వర్తించి, ఇప్పుడు ప్రతిభతో ఎస్సైగా పదోన్నతి సాధించడం ఎంతో గర్వించదగ్గ విషయమన్నారు. పోలీస్ శాఖలో చేరిన నాటి నుంచి ఇప్పటివరకు ఎలాంటి రిమార్క్ లేకుండా ఉన్నతాధికారుల, ప్రజల మన్ననలు పొందుతూ నిబద్ధతతో విధులు నిర్వహించడం అభినందనీయమని కొనియాడారు. భవిష్యత్తులో ఆయన మరిన్ని ఉన్నత పదవులను అధిరోహించాలని ఆకాంక్షించారు. ఈ కార్యక్రమంలో గజెల్లి వెంకటయ్య, గోపతి లక్ష్మణ్, గూడ రాజిరెడ్డి, మంచాల రామయ్య, గూడ శ్రీనివాస్, మామిడాల సత్యనారాయణ, సింగ్, చుంచు పోషన్న, గుజ్జ శంకర్, కృష్ణారెడ్డి, బిల్లా రాజయ్య, శ్రీనివాస్ టీచర్, ఆర్ఎంపీ డాక్టర్ వెంకట్‌రెడ్డి, కె. చంద్రమౌళి, ఎం. రాజయ్య, సుభాష్ రెడ్డి, రిజ్వాన్, అక్కల తిరుపతి, ఏఎస్సై సురేష్ గౌడ్, భోజన్న తదితరులు పాల్గొన్నారు.

శ్రీరాంపూర్ సీహెచ్‌పీలో స్వచ్ఛతా శ్రమదానం.. పార పట్టి శుభ్రం చేసిన జీఎం మునిగంటి శ్రీనివాస్

నస్పూర్, ఆర్.కె న్యూస్:పరిసరాల పరిశుభ్రతతో పాటు గనులు, కార్యాలయాల్లో పేరుకుపోయిన ఈ-వేస్ట్‌ను సమర్థవంతంగా తొలగించి పర్యావరణ పరిరక్షణకు ప్రతి ఒక్కరూ కృషి చేయాలని శ్రీరాంపూర్ ఏరియా జనరల్ మేనేజర్ మునిగంటి శ్రీనివాస్ పిలుపునిచ్చారు. కేంద్ర ప్రభుత్వం, బొగ్గు మంత్రిత్వ శాఖ ఆదేశాల మేరకు సింగరేణి వ్యాప్తంగా స్పెషల్ క్యాంపెయిన్ 6.0 కార్యక్రమాలు ముమ్మరంగా కొనసాగుతున్నాయి. ఇందులో భాగంగా శనివారం శ్రీరాంపూర్ ఏరియా కోల్ హ్యాండ్లింగ్ ప్లాంట్ ప్రాంగణంలో ప్రత్యేక పరిశుభ్రతా కార్యక్రమాన్ని నిర్వహించారు. సీహెచ్‌పీ సందర్శనకు వచ్చిన జీఎం మునిగంటి శ్రీనివాస్ స్వయంగా పార పట్టి కన్వేయర్ బెల్ట్ పరిసరాల్లో పేరుకుపోయిన ముళ్లపొదలు, పిచ్చిమొక్కలు, వ్యర్థాలను తొలగించి శ్రమదానం చేశారు. జీఎం స్వయంగా రంగంలోకి దిగడంతో సీహెచ్‌పీ అధికారులు, కార్మికులు మరింత ఉత్సాహంతో శ్రమదానంలో పాల్గొన్నారు. ఈ సందర్భంగా జీఎం మాట్లాడుతూ.. కేంద్ర ప్రభుత్వ మార్గదర్శకాల ప్రకారం నిర్వహిస్తున్న ఈ ప్రత్యేక ఉద్యమాన్ని శ్రీరాంపూర్ ఏరియాలో బాధ్యతాయుతంగా అమలు చేయాలన్నారు. అక్టోబర్ 2 నుంచి 31 వరకు కొనసాగే ఈ కార్యక్రమంలో భాగంగా అన్ని గనులు, విభాగాలలో పేరుకుపోయిన పనికిరాని ఎలక్ట్రానిక్ వ్యర్థాలను ప్రత్యేకంగా ఏర్పాటు చేసిన డబ్బాల్లో చేర్చి, వాటిని పూర్తిస్థాయిలో డిస్పోజ్ చేయాలని ఆదేశించారు. ఈ కార్యక్రమంలో ఏరియా ఇంజనీర్ సురేష్, సీహెచ్‌పీ ఇన్‌చార్జ్ చంద్రలింగం, పిట్ సెక్రటరీ జిల్లాల రవి, అధికారులు, కార్మికులు తదితరులు పాల్గొన్నారు.

కుటుంబానికి అండగా ఉంటామని మేయర్ దర్ని మధుకర్ భరోసా

మంచిర్యాల, ఆర్.కె న్యూస్: మంచిర్యాల మున్సిపల్ కార్పొరేషన్ కార్యాలయంలో విధులు నిర్వహిస్తున్న ఉద్యోగి హబీబ్ బ్రెయిన్ స్ట్రోక్‌తో హైదరాబాద్‌లోని నిమ్స్ ఆసుపత్రిలో చికిత్స పొందుతూ కన్నుమూశారు. ఆయన మృతితో మున్సిపల్ వర్గాల్లో తీవ్ర విషాదం నెలకొంది. హబీబ్ భౌతికకాయానికి మంచిర్యాల మున్సిపల్ కార్పొరేషన్ మేయర్ దర్ని మధుకర్, డిప్యూటీ మేయర్ సల్ల రమ్య-మహేష్ శనివారం పూలమాలలు వేసి ఘనంగా నివాళులర్పించారు. అనంతరం మృతుడి కుటుంబ సభ్యులను పరామర్శించి ప్రగాఢ సానుభూతి తెలిపారు. ఈ కష్టకాలంలో హబీబ్ కుటుంబానికి కార్పొరేషన్ తరఫున అన్ని విధాలుగా అండగా ఉంటామని మేయర్ భరోసా ఇచ్చారు. ఈ కార్యక్రమంలో కార్పొరేటర్లు సుదమల్ల హరికృష్ణ, రాచకొండ గోపాల్ రావు, పూదరి సునీత-ప్రభాకర్, పలువురు మున్సిపల్ అధికారులు, సిబ్బంది పాల్గొని నివాళులర్పించారు.

నస్పూర్, ఆర్.కె న్యూస్: మంచిర్యాల మున్సిపల్ కార్పొరేషన్ పరిధిలోని 27వ డివిజన్‌లో అనారోగ్యంతో మరణించిన కుటుంబాలను ఎమ్మెల్యే కొక్కిరాల ప్రేమ్ సాగర్ రావు ఆదేశాల మేరకు మేయర్ ధర్ని మధుకర్, టీపీసీసీ సభ్యుడు, నస్పూర్ పట్టణ ఇంచార్జి నూకల రమేష్, స్థానిక కార్పొరేటర్ కొండ్ర రాజేశ్వరి-లింగయ్య పరామర్శించారు. బాధిత కుటుంబాలకు మనోధైర్యం కల్పించి, మరణించిన రెండు కుటుంబాలకు ఎమ్మెల్యే అందించిన రూ. 5,000 చొప్పున ఆర్థిక సహాయాన్ని అందజేశారు. ఈ కార్యక్రమంలో డివిజన్ నాయకులు, కార్యకర్తలు పాల్గొన్నారు.

సోన్, ఆర్.కె న్యూస్: సోన్ మండల కేంద్రంలోని గ్రామ పంచాయతీ కార్యాలయంలో బుధవారం లబ్ధిదారులకు ఇందిరమ్మ ఇండ్ల మంజూరు పత్రాలను ఎమ్మెల్యే ఏలేటి మహేశ్వర్ రెడ్డి పంపిణీ చేశారు. వివిధ గ్రామాలకు సంబంధించిన 119 ఇందిరమ్మ ఇండ్లు మంజూరు అయినట్లు తెలిపారు. ఈ సందర్భంగా ఎమ్మెల్యే, బీజేఎల్పీ నేత ఏలేటి మహేశ్వర్ రెడ్డి మాట్లాడుతూ ఇండ్లు లేని పేదల సొంతింటి కలను సాకారం చేసుకోవాలని, గత ప్రభుత్వంలో ఇండ్లు లేక ఎంతో మంది ఇబ్బంది పడ్డారని, ఇంకా ఎవరికైతే పేదవారికి ఇందిరమ్మ ఇండ్లు మంజూరు కాలేదో, అర్హులైన ప్రతి ఒక్కరికీ ఇందిరమ్మ ఇండ్లు వచ్చేలా చూస్తామన్నారు. ఈ కార్యక్రమంలో ఎంపీడీవో రామకృష్ణ, తాసిల్దార్ సంతోష్ కుమార్,ఎంపీఓ జ్యోతి, పంచాయతీ కార్యదర్శులు, వివిధ గ్రామాల సర్పంచులు, లబ్ధిదారులు పాల్గొన్నారు.

ఏఐటీయూసీ అధ్యక్షుడు వాసిరెడ్డి సీతారామయ్య..
ఎస్ఆర్‌‌పీ-3, ఎస్ఆర్‌‌పీ-1 గనుల్లో 465 మంది చేరిక ఎస్ఆర్‌‌పీ

నస్పూర్, ఆర్.కె న్యూస్: అగ్రిమెంట్లు చేయించేది మనమే.. వాటిని అమలు చేయించే బాధ్యత కూడా మనదే. కుదిరిన ఒప్పందాలు కాగితాలకే పరిమితం కాకుండా కార్మికుల న్యాయమైన హక్కులన్నీ అమలయ్యే వరకు ఏఐటీయూసీ రాజీలేని పోరాటం చేస్తుందని గుర్తింపు సంఘం ఏఐటీయూసీ అధ్యక్షుడు వాసిరెడ్డి సీతారామయ్య స్పష్టం చేశారు. శ్రీరాంపూర్ ఏరియాలోని ఎస్ఆర్‌‌పీ-3 గనిలో 309 మంది, ఎస్ఆర్‌‌పీ-1 గనిలో 156 మంది మైనింగ్ స్టాఫ్, ట్రేడ్స్‌‌మెన్ యువ కార్మికులు ఏఐటీయూసీలో చేరారు. మంగళవారం మురళీ చౌదరి, దాడి రాజయ్యల అధ్యక్షతన జరిగిన గేట్ మీటింగ్‌లలో యూనియన్ రాష్ట్ర అధ్యక్షుడు వాసిరెడ్డి సీతారామయ్య, ప్రధాన కార్యదర్శి కొరిమి రాజ్ కుమార్, డిప్యూటీ ప్రధాన కార్యదర్శులు కందికట్ల వీరభద్రయ్య, ముస్కే సమ్మయ్య, బ్రాంచ్ సెక్రెటరీ ఎస్కే బాజీ సైదా, అసిస్టెంట్ బ్రాంచ్ సెక్రెటరీ మోత్కూరి కొమురయ్యలు కార్మికులకు కండువాలు కప్పి యూనియన్‌లోకి ఆహ్వానించారు. గుర్తింపు సంఘం అధ్యక్షుడు వాసిరెడ్డి సీతారామయ్య, ప్రధాన కార్యదర్శి కొరిమి రాజ్ కుమార్‌లు మాట్లాడుతూ.. ఏఐటీయూసీ చేపట్టిన సేవ్ సింగరేణి జాతా, హెడ్ ఆఫీస్ ముట్టడి, సమ్మె నోటీసు వంటి ఉద్యమాల వల్లే సమ్మె లేకుండానే ఆర్ఎల్సీ వద్ద 24 ప్రధాన డిమాండ్లపై ఒప్పందం సాధించామన్నారు. సింగరేణి భవిష్యత్తు యువ కార్మికులపైనే ఆధారపడి ఉందని, వారికి యూనియన్‌లో కీలక బాధ్యతలు అప్పగిస్తామని చెప్పారు. సంస్థ విస్తరణకు, యువత ఉద్యోగాల కోసం వేలం ప్రక్రియలో యాజమాన్యం చురుగ్గా పాల్గొని కొత్త గనులను దక్కించుకోవాలని డిమాండ్ చేశారు. ఈ కార్యక్రమంలో జాయింట్ సెక్రెటరీ రాచర్ల చంద్రమోహన్, జీఎం చర్చల ప్రతినిధులు బద్రి బుచ్చయ్య, అడ్డు శ్రీనివాస్, సురేష్, జిల్లా కార్యదర్శి అప్రోజ్ ఖాన్, మీడియా అధికార ప్రతినిధి రాజ్ కుమార్, ఎస్ఆర్‌‌పీ-3 అసిస్టెంట్ పిట్ సెక్రెటరీలు అంబాల రవి, కారుకూరి నగేష్, వైస్ ప్రెసిడెంట్ తౌటం మల్లేష్, ఎస్సార్పీ-1 అసిస్టెంట్ పిట్ సెక్రెటరీ పరశురాం తదితరులు పాల్గొన్నారు.

• శ్రీ వాసుదేవాయ హెల్త్ కేర్ ట్రస్ట్, నిర్మల పాలిక్లినిక్ ఆధ్వర్యంలో ఉచిత పరీక్షలు, మందుల పంపిణీ
• పెద్ద సంఖ్యలో హాజరై సద్వినియోగం చేసుకున్న గ్రామస్తులు

మంచిర్యాల ప్రతినిధి, ఆర్.కె న్యూస్: హాజీపూర్ మండలంలోని దొనబండ గ్రామంలో స్థానిక ప్రజల ఆరోగ్య పరిరక్షణే ధ్యేయంగా శ్రీ వాసుదేవాయ హెల్త్ కేర్ ట్రస్ట్ సౌజన్యంతో, నిర్మల పాలిక్లినిక్ ఆధ్వర్యంలో ఉచిత వైద్య శిబిరం నిర్వహించారు. ఈ శిబిరానికి గ్రామ సర్పంచ్ బేతు రమాదేవి రవి సహకారం అందించగా, దాతలు గుత్తికొండ ప్రశాంత్, మంగళిపల్లి రాజేష్ ఆర్థిక సహకారంతో ప్రజలకు ఉచిత వైద్య పరీక్షలు జరిపి, అవసరమైన మందులను ఉచితంగా అందజేశారు. శిబిరంలో జనరల్ మెడిసిన్, ఆర్థోపెడిక్ విభాగాలతో పాటు బీపీ, షుగర్ పరీక్షలు నిర్వహించి, కుటుంబ ఆరోగ్య సలహాలను అందించారు. ప్రముఖ జనరల్ ప్రాక్టీషనర్ డాక్టర్ జి. శ్రీకాంత్ రోగులకు వైద్య పరీక్షలు నిర్వహించి, తగిన ఆరోగ్య సూచనలు చేశారు. ఈ సందర్భంగా డాక్టర్ శ్రీకాంత్ మాట్లాడుతూ… వర్షాకాలం నేపథ్యంలో విష జ్వరాలు, ఫైలేరియా వంటి వ్యాధులు ప్రబలకుండా దోమల నియంత్రణ, పరిసరాల పరిశుభ్రత పాటించాలని సూచించారు. ముందస్తు ఆరోగ్య పరీక్షలు, నిరంతర జాగ్రత్తలతోనే పలు దీర్ఘకాలిక వ్యాధులను నివారించవచ్చని అవగాహన కల్పించారు. ఈ కార్యక్రమంలో గ్రామస్తులు పెద్ద సంఖ్యలో పాల్గొని వైద్య సేవలను సద్వినియోగం చేసుకున్నారు.

బీజేపీ జిల్లా అధ్యక్షుడు నాగునూరి వెంకటేశ్వర్ గౌడ్
సీసీసీ టౌన్‌షిప్‌లో ఘనంగా అంగన్‌వాడీ, ఆశా వర్కర్లకు సన్మానం

నస్పూర్, ఆర్.కె న్యూస్: చిన్నారుల ఆరోగ్య పరిరక్షణతో పాటు సమాజ వికాసంలో అంగన్‌వాడీ కార్యకర్తలు, ఆశా వర్కర్లు అందిస్తున్న సేవలు ఎనలేనివని బీజేపీ మంచిర్యాల జిల్లా అధ్యక్షుడు నగునూరి వెంకటేశ్వర్ గౌడ్ కొనియాడారు. ప్రధానమంత్రి నరేంద్ర మోదీ 76వ జన్మదినం, ఆయన ప్రజాజీవితంలో 25 ఏళ్లు పూర్తి చేసుకున్న సందర్భాన్ని పురస్కరించుకుని నిర్వహిస్తున్న సేవా సంకల్ప్ అభియాన్ లో భాగంగా నస్పూర్ మండల కేంద్రంలోని సీసీసీ టౌన్‌‌షిప్‌లో బీజేపీ మహిళా మోర్చా ఆధ్వర్యంలో అంగన్‌వాడీ ఉత్సవాలు నిర్వహించారు. ఈ సందర్భంగా అంగన్‌వాడీ, ఆశా కార్యకర్తలను శాలువాలతో ఘనంగా సత్కరించారు. ఈ కార్యక్రమానికి ముఖ్య అతిథిగా హాజరైన నగునూరి వెంకటేశ్వర్ గౌడ్ మాట్లాడుతూ.. ప్రధాని నరేంద్ర మోదీ ప్రజా సేవకు ప్రతీకగా సెప్టెంబర్ 17 నుంచి అక్టోబర్ 17 వరకు నెల రోజుల పాటు సేవా పక్షోత్సవాలను చేపడుతున్నామని వివరించారు. ఇందులో భాగంగా సెప్టెంబర్ 25 నుంచి అక్టోబర్ 7 వరకు దేశవ్యాప్తంగా అంగన్‌వాడీ ఉత్సవాలు నిర్వహిస్తున్నట్లు పేర్కొన్నారు. దేశ భవిష్యత్తు చిన్నారుల ఆరోగ్యంపైనే ఆధారపడి ఉంటుందని, పసిపిల్లలకు పోషకాహారం, ప్రాథమిక విద్యనందించి భావి భారత పౌరులుగా తీర్చిదిద్దడంలో అంగన్‌వాడీలు తల్లిలాంటి పాత్ర పోషిస్తున్నారని ప్రశంసించారు. ఇంటి వద్ద తల్లిదండ్రులు ఎంతటి ప్రేమతో చూసుకుంటారో, అంగన్‌వాడీ కేంద్రాలకు వచ్చే ప్రతి చిన్నారిని అంతే ఆప్యాయతతో సంరక్షిస్తున్న కార్యకర్తల సేవలు వెలకట్టలేనివని అన్నారు. గర్భిణులు, బాలింతల ఆరోగ్య పరిరక్షణలోనూ అంగన్‌వాడీ కేంద్రాల సేవలు కీలకమని స్పష్టం చేశారు. ఈ కార్యక్రమంలో సేవా సంకల్ప్ అభియాన్ జిల్లా కన్వీనర్ పట్టి వెంకటకృష్ణ, జిల్లా ప్రధాన కార్యదర్శి వెంకటేశ్వరరావు, జిల్లా ఉపాధ్యక్షులు కమలాకర్ రావు, మహిళా మోర్చా జిల్లా అధ్యక్షురాలు పచ్చ స్వప్న, శ్రీరాంపూర్ జోన్ మహిళా మోర్చా అధ్యక్షురాలు రేణుక, సేవా సంకల్ప్ అభియాన్ కో-కన్వీనర్ బొంగోని శిరీష, నాయకులు స్వరూపరాణి, సృజన, శ్రీరాంపూర్ జోన్ అధ్యక్షులు సత్రం రమేష్, ప్రధాన కార్యదర్శులు పొన్నవేని సదయ్య, బద్రి శ్రీకాంత్, నాయకులు సామ్రాజ రమేష్, బొజ్జ నర్సయ్య, సత్యనారాయణ, బుద్దె రవి, తేజు, మహిళా ప్రతినిధులు స్వరూప, రూప, సుకన్య తదితరులు పాల్గొన్నారు.

సోన్, ఆర్.కె న్యూస్: మండల కేంద్రంలోని అభ్యాస గురుకులం పాఠశాలలో జోనల్ లెవెల్ యోగసెలెక్షన్స్ పోటీలు నిర్వహించారు. ఈ పోటీలకు ఆదిలాబాద్, నిర్మల్, మంచిర్యాల, కొమరం భీమ్ ఆసిఫాబాద్ యోగ క్రీడాకారులు పాల్గొన్నారు. ఈ పోటీలలో అండర్ 14,అండర్ 17 ట్రేడిషనల్, రితామిక్ సోలో, రితమిక్ డబల్,ఆర్టిస్టిక్ సోలో, ఆర్టిస్టిక్ డబల్ విభాగంలలో పోటీలు నిర్వహించడం జరుగుతుంది. ఈ కార్యక్రమానికి ఎస్జీఎఫ్ఐ సెక్రటరీ రాథోడ్ లక్ష్మన్, యోగ నేచురోపతి డాక్టర్ అన్నపూర్ణ, పీడీ లు ఇమ్రాన్, దర్శనం దేవేందర్, త్రివేణి, పాఠశాల ప్రిన్సిపాల్ ప్రదీప్ కుమార్, యోగ కోచ్ ప్రదీప్, మల్లేష్ , పాఠశాల ఉపాధ్యాయులు మరియు విధార్థులు పాలొగొన్నారు.

పరామర్శించిన టీబీజీకేఎస్ నాయకులు
మెరుగైన వైద్యం కోసం హైదరాబాద్‌లోని అమోర్ ఆసుపత్రికి రెఫర్

నస్పూర్, ఆర్.కె న్యూస్: శ్రీరాంపూర్ ఏరియాలోని ఎస్సార్పీ-3 గనిలో శనివారం మొదటి బదిలీ లో విధులు నిర్వహిస్తుండగా దుర్గం శంకర్ అనే సపోర్ట్‌మ్యాన్ ప్రమాదవశాత్తు గాయపడ్డారు. ప్రమాదంలో ఆయన కుడిచేతి బొటనవేలికి తీవ్ర గాయమై రక్తస్రావం జరిగింది. ఈ విషయం తెలుసుకున్న తెలంగాణ బొగ్గు గని కార్మిక సంఘం నాయకులు వెంటనే స్పందించి ఆసుపత్రికి చేరుకొని కార్మికుడిని పరామర్శించారు. అనంతరం ఏరియా వైద్యులతో మాట్లాడి, మెరుగైన వైద్య చికిత్స కోసం దుర్గం శంకర్‌ను హైదరాబాద్‌లోని అమోర్ సూపర్ స్పెషాలిటీ ఆసుపత్రికి రెఫర్ చేయించారు. కార్మికుడికి మెరుగైన వైద్యం అందించేలా చొరవ తీసుకుంటామని నాయకులు భరోసా ఇచ్చారు. ఈ కార్యక్రమంలో టీబీజీకేఎస్ రాష్ట్ర ప్రధాన కార్యదర్శి కేతిరెడ్డి సురేందర్ రెడ్డి, సెంట్రల్ జాయింట్ సెక్రెటరీ పొగాకు రమేష్, సెంట్రల్ నాయకులు నీలం సదయ్య, శ్రీరాంపూర్ ఏరియా కార్యదర్శులు గడ్డం మహిపాల్ రెడ్డి, రామిడి మహేందర్ రెడ్డి, ఎస్సార్పీ-3 గని పిట్ సెక్రటరీ తీగల వెంకటరెడ్డి తదితరులు పాల్గొన్నారు.