KYATHAM RAJESH 
పర్యావరణ పరిరక్షణే లక్ష్యంగా ఆర్.కె-7 కార్మికుడు జాడి రాజ్‌కుమార్ చొరవ
నస్పూర్, ఆర్.కె న్యూస్: వినాయక చవితి పర్వదినాన్ని పురస్కరించుకుని పర్యావరణహిత వేడుకలను ప్రోత్సహించే ఉద్దేశంతో శ్రీరాంపూర్ ఏరియా ఆర్‌కే-7 గని సింగరేణి కార్మికుడు జాడి రాజ్‌కుమార్ ఆధ్వర్యంలో ఆదివారం ఉచిత మట్టి వినాయక విగ్రహాల పంపిణీ కార్యక్రమం నిర్వహించారు. నస్పూర్ మండల కేంద్రంలోని సీసీసీ కార్నర్ సెంటర్ వద్ద ప్రజలకు మట్టి గణపతులను ఉచితంగా అందజేశారు. ఈ సందర్భంగా రాజ్‌కుమార్ మాట్లాడుతూ, ప్లాస్టర్ ఆఫ్ ప్యారిస్ (పీవోపీ) విగ్రహాలు, రసాయన రంగుల వల్ల జలవనరులు తీవ్రంగా కలుషితమవుతున్నాయని ఆందోళన వ్యక్తం చేశారు. ప్రకృతిని రక్షించుకోవాల్సిన బాధ్యత ప్రతి పౌరుడిపై ఉందని, భక్తితో పాటు సామాజిక స్పృహను చాటుతూ ప్రతి ఒక్కరూ మట్టి వినాయకులనే ప్రతిష్టించాలని పిలుపునిచ్చారు. పర్యావరణంపై ఉన్న మక్కువతో ప్రతి ఏటా తనవంతు బాధ్యతగా మట్టి విగ్రహాలను ఉచితంగా పంపిణీ చేస్తున్నట్లు ఆయన తెలిపారు. మట్టి వినాయకుడు – మన ప్రకృతికి మేలు, మన భవిష్యత్తుకు భరోసా అనే నినాదంతో పర్యావరణ పరిరక్షణకు అందరూ నడుం బిగించాలని కోరారు. ఈ కార్యక్రమంలో పలువురు స్థానికులు పాల్గొని విగ్రహాలను స్వీకరించారు.
